Samsi.
95.
Au laoma! Te wana lau Guyau lisina, tau famwahulida te wowoʼen ma kwadeda. 
Te laoma lisina ma lautoꞌida; dagugu laꞌilaꞌi te ginaulidi yo te wana ma kwadeda ya lau lisina. 
Guyau mate In Hewa Wananaha Yaubadana, yaubada mahudoꞌidi edi wasawasa. 
Tanoꞌubu mahudoꞌina mate in, enehena, gon yai ya hasai be–, oya yai yo. 
Gabogabo yo tanohi pitapitalina ya fatubudi, mate In tanuwagadi. 
Au laoma te tuli bono be Guyau tau fatubuda te fadebasae. 
Paꞌana in eda Yaubada na ita ena gana ganahewana yai doha sipi tau itaꞌita watanidi ena sipi ya bobodiyedi. Aee–, aho te ibe ami ataꞌatahi lau lisina! 
Tabu nuwamiu au guduguduidi doha afa wahamiu somo sa ginauli Meliba yai, lahaina yai Masa yai, nuꞌu pitapitalina yai. 
Amainiya afa tamamiu sa lau itagu. Ginauli E ginaulidi sa itadi haꞌa. Na hola sa anpateigu. 
Bolima 40 egu manabala hiti ni lisidi yai. Ayawa, “Dodoga ni, nuwadi sa anꞌanloya gaibu, egu laulau hige ti sibaidi.” 
Be manabala yai E angwala bena tabu ti luhulau egu aba anꞌanyawasi yai.