Luda yã takada kũ Bisã yão 1 KINANƆ 11

Sulemanu nↄnↄ

1 Kína Sulemanu yè buri pãnde nↄgbɛ̃nↄi dasi. Firi'auna nɛ́nↄgbɛ̃ baasi, akũ à Mↄabunↄ kũ Amↄninↄ kũ Ɛdↄmunↄ kũ Sidↄ̃denↄ kũ Itinↄ sɛ̀sɛ nↄnↄ ũ. 2 Dikiri pì Isarailanↄnɛ òsun buri pìnↄ sɛ́ro, zaakũ oni ń sãtɛmɛ, de ò tɛ́ ń tãnanↄi. Bee kũ abireo ń yenyĩ Sulemanu kũ̀ gbãna. 3 À kínanɛnↄ sɛ̀sɛ nↄnↄ ũ gbɛ̃nↄn wàa aakↄ̃ kũ basↄↄroo, akũsↄ̃ à nↄ yìgisaridenↄ vĩ dↄ wàa do kũ basↄↄroo. Akũ a nↄ pìnↄ a sã̀tɛ. 4 Kũ zĩkũ tɛn gɛ̃n, a nↄnↄ tò à tɛ̀ tãnanↄi, adi a swɛ̃̀ kpá Dikiri a Ludaa mámmam lán a de Dauda bàro. 5 À tɛ̀ Sidↄ̃denↄ tãna Asatorɛi kũ Amↄninↄ tãna Mↄlɛki kũ Luda zã̀aguo. 6 À yã kũ Dikiri yeiro kɛ̀, adi tɛ́i kũ nɛ̀sɛdoo lán a de Dauda bàro. 7 Akũ à gɛ̀ɛ à tãnagbagbaki bò sĩ̀sĩ kũ à kú Yurusalɛmu ifãboki kpa musu Mↄabunↄ tãna gina Kɛmↄsinɛ kũ Amↄninↄ tãna gina Mↄlɛkio. 8 Lɛn à kɛ̀ lɛ a buri pãnde nↄnↄnɛ ń pínki, akũ ò turaretiti kpàta ń tãnanↄnɛ ò sa òḿma.

9 Akũ Dikiri Isarailanↄ Luda pↄ fɛ̃̀ Sulemanui kũ à kpɛ lìnɛ a swɛ̃̀ kúa doro yãi, zaakũ Dikiri bò à sùa yã gɛ̃̀n pla. 10 Bee kũ Dikiri pìnɛ àsun tɛ́ tãnanↄiro, adi yã kũ Dikiri dìtɛ pì maro. 11 Akũ Dikiri pìnɛ: Zaakũ n kɛ̀ lɛ, ńdi zɛ kũ ma bàka kunna kũnwo yã kũ ma dìtɛnnɛoro, mani kpata símma mà n zↄ̀blerinↄ doke ká n gɛ̃nɛ ũ. 12 Ama n de Dauda yãi mani kɛ lɛ n gↄrↄaro, n nɛ́n mani kɛnɛ. 13 Bee kũ abireo mani kpata sía pínkiro. Buri lɛu don mani tó n nɛ́ pìinɛ ma zↄ̀bleri Dauda kũ Yurusalɛmu kũ ma sɛ̀ ma pↄ́ ũo yãi.

Sulemanu ibɛrɛnↄ

14 Akũ Dikiri tò Ɛdↄmu gbɛ̃ Adada kũ à de kínɛ ũ ibɛrɛɛ sɛ̀ kũ Sulemanuo. 15 Gↄrↄ kũ Dauda tɛn zĩ̀ ká kũ Ɛdↄmunↄ yã, a zĩ̀karinↄ don'arɛde Yoabu gɛ̀ɛ à Isarailanↄ gɛ̀nↄ vĩ̀, akũ à Ɛdↄmu bùsu gↄ̃gbɛ̃nↄ dɛ̀dɛ gwe ń pínki. 16 Àkũ kũ a gbɛ̃nↄn kú gwe ari mↄ suddo ari ò gɛ̀ɛ ò Ɛdↄmu bùsu gↄ̃gbɛ̃ pìnↄ dɛ̀dɛo ń pínki. 17 Kũ Adada bàa sì, àtɛn tá Misila kũ a de ìba kenↄ. Gↄrↄ birea sↄ̃ Adada bi kɛfɛnnamɛ. 18 Ò bò Midiã ò gɛ̀ɛ Parani, akũ ò Paranide kenↄ sɛ̀ ò gɛ̀ɛ kũńwo Misila kína Firi'auna kĩnaa. Firi'auna kpɛ́ kpàa kũ pↄ́bleo kũ zĩtɛo. 19 Adada yã kà Firi'aunanɛ manamana, akũ à a nanↄ Tapɛnɛsi dakũna kpàa nↄ ũ. 20 Akũ Tapɛnɛsi dakũna pì nɛ́ ì gↄ̃gbɛ̃ ũ, òdi pinɛ Genuba, akũ Tapɛnɛsi nɛ́ pìi gwà Firi'auna ↄnn kũ Firi'auna nɛ́nↄo lɛɛlɛ. 21 Gↄrↄ kũ Adada kú Misila, à mà kũ Dauda gà akũsↄ̃ a zĩ̀karinↄ don'arɛde Yoabu gà dↄ. Akũ à pì Firi'aunanɛ: Ǹ ma gba zɛ́ mà tá ma bùsun. 22 Akũ Firi'auna a là à pì: Bↄ́ mɛ́ àtɛn kĩamma ma kĩnaa, gbasa ń ye ǹ tá n bùsunn? À wèa à pì: Pↄ́ke tɛn kĩamaro, ǹ ma gba zɛ́ dé!

23 Akũ Luda tò dↄ Ɛliada nɛ́ Rɛzↄ̃ kũ à bàa sì a dikiri Zoba kína Adadɛzanɛ yã fùtɛ Sulemanui. 24 Kũ Dauda Adadɛza gbɛ̃nↄ dɛ̀dɛ, akũ Rɛzↄ̃ gbɛ̃nↄ kàkaraai ò kɛ̀ gbãnamↄnnɛrinↄ gã̀ ũ, akũ à gↄ̃̀ ń don'arɛde ũ. Ò gɛ̀ɛ ò vùtɛ Damasuku, akũ à gwe sì. 25 Rɛzↄ̃mɛ Isarailanↄ ibɛrɛ ũ ari Sulemanu wɛ̃̀ndi lɛ́n, yãkete kũ Adada fùtɛo baasi. À kpata blè Siria bùsun, à gì Isarailanↄ kãi.

Yeroboamu bona Sulemanu kpɛ

26 Nɛbati nɛ́ Yeroboamu bi Sulemanu ìba kemɛ. Ɛflaimu burimɛ, kũ à bò Zɛrɛda, akũ à bò Sulemanu kpɛ. A da bi gyaanↄmɛ, a tↄ́n Zɛrua. 27 Lákũ à kɛ̀ nà à bò kína kpɛn dí. Sulemanu wɛ̀ɛ kũ òdi pi Milo tàta kũ bùsuuo, akũ à a de Dauda wɛ̃tɛ bĩni bò à pɛ̀kɛrɛ. 28 Yeroboamu bi nɛ́gↄ̃gbɛ̃ laakaridemɛ. Kũ Sulemanu è kɛfɛnna pì kokari vĩ, akũ à a dìtɛ zĩ gbãna kũ Yusufu burinↄ tɛn kɛ pì gbɛ̃ zↄ̃kↄ̃ ũ. 29 Gↄrↄ birean Yeroboamu bò Yurusalɛmu, akũ à dàkarɛ kũ annabi Ahia, Silo gbɛ̃o zɛ́n, à uta dufu dana. Ò kú sɛ̃̀n gwe ń pla. 30 Akũ Ahia a uta dufu pìi gà à kɛ̃̀ à pàrapara lɛu kuri awɛɛpla. 31 Akũ à pì Yeroboamunɛ à a paranaa pì sɛ́tɛ mɛ̀n kuri, zaakũ Dikiri Isarailanↄ Luda pì: Mani Sulemanu bo kpatammɛ mà Isaraila buri lɛu kuri kpámma. 32 Mani buri lɛu do tónɛ ma zↄ̀bleri Dauda kũ Yurusalɛmu kũ ma sɛ̀ Isaraila buri sĩnda pínki wɛ̃tɛnↄ tɛ́o yãi. 33 Mani kɛnɛ lɛ, kũ à ma zukũna à gɛ̀ɛ àtɛn Sidↄ̃denↄ tãna Asatorɛ kũ Mↄabunↄ tãna Kɛmↄsio kũ Amↄninↄ tãna Mↄlɛkio gbagba yãi. Adi tɛ́mairo, adi yã kũ à manamɛnɛ kɛro, adi ma ↄdↄki gwaro, à ma dokayãnↄ kũna lán a de Dauda bàro. 34 Bee kũ abireo mani kpata bo a ↄĩ sãnsãnlo, zaakũ ma gĩnakɛ ma a kɛ̀ kína ũ ari a wɛ̃̀ndi lɛ́mmɛ ma zↄ̀bleri Dauda kũ ma sɛ̀ yãi, kũ à ma yãditɛnanↄ kũna akũsↄ̃ à ma ↄdↄki gwà. 35 A nɛ́n mani kpata sí a ↄĩ mà Isaraila buri lɛu kurinↄ kpámma. 36 Isaraila buri lɛu don mani tó a nɛ́ pìinɛ, de ma zↄ̀bleri Dauda buri gↄ̃ kí blemɛnɛ Yurusalɛmu gↄrↄ sĩnda pínki, wɛ̃tɛ kũ ma sɛ̀ ma tↄ́ gↄ̃ kúaa pìi. 37 Mↄkↄ̃n sↄ̃, ma n sɛ Isarailanↄ kína ũ, de ǹgↄ̃ kí ble pↄ́ kũ n pↄ yeiia pínki. 38 Tó ntɛn yã kũ ma dìtɛnnɛ kɛ pínki, tó ń tɛ́mai, ntɛn yã kũ à manamɛnɛ kɛ, tó ntɛni ma ↄdↄki gwa akũsↄ̃ ń ma yãditɛnanↄ kũna lán ma zↄ̀bleri Dauda bà, manigↄ̃ kú kũnwo, manigↄ̃ n burinↄ ká Isaraila kpatan gↄrↄ sĩnda pínki, lákũ ma Dauda burinↄ kàn nà. 39 Mani Dauda burinↄ ɛra kpɛ yã kũ ò kɛ̀ɛ pì yãi, ama adi kɛ gↄrↄ sĩnda pínkinlo.

40 Sulemanu zɛ́ wɛ̀tɛ à Yeroboamu dɛ, akũ à fùtɛ à bàa sì à tà Misila kína Sisaki kĩnaa, à gↄ̃̀ gwe ari Sulemanu gɛ̀ɛ à gào. 41 Sulemanu yã kparanↄ kũ ↄ̃ndↄ̃yã kũ à kɛ̀nↄ pínki kú Sulemanu yãnↄ takadan. 42 Sulemanu kɛ̀ Isaraila buri sĩnda pínki kína ũ Yurusalɛmu wɛ̃̀ buplamɛ. 43 Kũ à gà, ò a vĩ̀ a de Dauda wɛ̃tɛn, akũ a nɛ́ Reoboamu vùtɛ a gɛ̃nɛ ũ.