1 Filisitininↄ ń zĩ̀karinↄ kàkara, òtɛn zĩ̀ soru kɛ Soko, Yudanↄ bùsun, akũ ò bùraa kàtɛ Ɛfɛsi Damimu, Soko kũ Azekao dagura. 2 Solu kũ Isarailanↄ sↄ̃ ò kↄ̃ kàkara ò bùraa kàtɛ Ela gusaran, òtɛn soru kɛ ò gɛ́ Filisitininↄi kũ zĩ̀io. 3 Filisitininↄn kú sĩ̀sĩia dire kpa, Isarailanↄn kú sĩ̀sĩia la, guvutɛ kú ń dagura. 4 Akũ Gata gↄ̃sa gbãna kũ òdi pinɛ Gↄlaya bò Filisitininↄ bùran. A gbã̀na kà gã̀sãkuru suddo. 5 À mↄ̀gotɛ̃ fùra kuna, à mↄ̀gotɛ̃ uta kũ à de lán kpↄ̀tɛkɛɛ bà dana kũ a tìkisii kà kiloo baaakↄ̃. 6 À mↄ̀gotɛ̃ sòkoto yĩna dↄ, akũsↄ̃ à mↄ̀gotɛ̃ sári lɛ̀kɛtɛ lokona a kpɛ kpa. 7 À sári sↄ̃ntɛ kũna, a pá de lán bizatãri gòdo lí bà. A wɛ́ tìkisii kà kiloo suppla. A sɛ̃gbakosɛri tɛ́ a arɛ.

8 Gↄlaya zɛ̀ à lɛ́ zù Isaraila zĩ̀karinↄi à pì: Bↄ́ yã mɛ́ à tò a bↄtɛ kũ zĩ̀ioo? Á dↄ̃ kũ Filisitinimɛ ma ũroo? Ákↄ̃nↄ sↄ̃, Solu zↄ̀nↄn á ũ. À gbɛ̃ke bo á tɛ́ à kipa à su ma kĩnaa. 9 Tó ani fↄ̃ à zĩ̀ ká kũmao à ma dɛ, ma gbɛ̃nↄ ni gↄ̃ á zↄ̀nↄ ũ. Tó makũ mɛ́ ma a dɛ̀ sↄ̃, áni gↄ̃ ó zↄ̀nↄ ũ, ánigↄ̃ zↄ̀ blewɛrɛ. 10 Akũ Filisitini pìi ɛ̀ra à pì: Matɛn kùsɛɛ biri Isaraila zĩ̀karinↄa gbãra. À gbɛ̃ wɛtɛmɛnɛ de ò zĩ̀ ká kũ kↄ̃o. 11 Kũ Solu kũ Isarailanↄ a yã pìi mà ń pínki, ò bídi kɛ̀, swɛ̃̀ɛ kɛ̃̀ńgu.

12 Dauda bi Ɛflata gbɛ̃ Yɛsɛ nɛ́mɛ. Yɛsɛ bi Bɛtilihamu kũ à kú Yudanↄ bùsun gbɛ̃mɛ. À nɛ́gↄ̃gbɛ̃nↄ ì gbɛ̃nↄn sↄraakↄ̃. Solu gↄrↄa à zↄ̃kↄ̃ kũ̀ à zĩ kũ̀ manamana. 13 A nɛ́ gbãna gbɛ̃nↄn aakↄ̃nↄn kú zĩ̀lan kũ Soluo. A daudu tↄ́n Ɛliabu, a plade tↄ́n Abinadabu, a aakↄ̃de tↄ́n Sama. 14 Daudamɛ Yɛsɛ nɛ́ kpɛde ũ. A vĩ̀ni pìnↄ tɛ́ Solui, 15 ama Dauda dì gɛ́ Solu kĩnaa à ɛra à su Bɛtilihamu a de sãnↄ dã. 16 Filisitini pìi dì bo à a zĩda mↄńnɛ kↄnkↄ kũ ↄkↄsio ari gↄrↄ bupla.

17 Zĩkea Yɛsɛ pì a nɛ́ Daudanɛ: Ǹ ése kpatana kpɛ̃nɛ do dí kũ burodi mɛ̀n kuri dínↄ sɛ́ ǹ gɛ́o n vĩ̀ninↄnɛ likalika ń bùran. 18 Ǹ gàsi mɛ̀n kuri dínↄ sɛ́ ǹ kpá ń gã̀ gbɛ̃ zↄ̃kↄ̃ↄa. Ǹ gɛ́ ǹ ń gwa, tó ò aafia, ǹ su kũ sèedaao kũ ò kun aafia. 19 Ò kú kũ Soluo kũ Isarailanↄ pínki Ela guvutɛn, òtɛn zĩ̀ ká kũ Filisitininↄ.

20 Dauda fùtɛ kↄnkↄkↄnkↄ, à a sãnↄ tò kũ sãdãri pãndeo. À a aso sɛ̀, akũ à dà zɛ́n lákũ Yɛsɛ òarɛ nà. Kũ à kà zĩ̀karinↄ bùran, à sù à lè òtɛn gɛ́ zĩ̀lan, òtɛn wiki gbãna lɛ́. 21 Isarailanↄ kũ Filisitininↄ tɛn soru kɛ ò arɛ dↄkↄ̃a. 22 Akũ Dauda a aso nà pↄ́dãkpãriinɛ a ↄĩ, akũ à bàa lɛ̀ à gɛ̀ɛ zĩ̀lan. À a vĩ̀ninↄ lè gwe, akũ à fↄ kpàḿma. 23 Kũ àtɛn yã o kũńwo, Filisitininↄ gↄ̃sa gbãna Gↄlaya, Gata gbɛ̃ bò Filisitini zĩ̀karinↄ tɛ́, à ɛ̀ra à fùtɛ kũ a yã pìio. Dauda yã pìi mà. 24 Kũ Isarailanↄ a è, swɛ̃̀ɛ kɛ̃̀ńgu, ò lɛ̀kↄ̃a ń pínki. 25 Òtɛn okↄ̃nɛ òtɛn pi: Ádi gↄ̃gbɛ̃ pì e à bòroo? Tó à bò, àdi kùsɛɛ biriwámɛ. Gbɛ̃ kũ à a dɛ̀, kína ni ade gba aruzɛkɛ zↄ̃kↄ̃, ani a gba a nɛ́nↄgbɛ̃ dↄ nↄ ũ, akũsↄ̃ a bedenↄ ni bɛ'ↄgↄ kpá doro.

26 Akũ Dauda gbɛ̃ kũ ò zɛna a sarɛnↄ là à pì: Bↄ́n oni kɛ gbɛ̃ kũ à Filisitini pìi dɛ̀ à Isarailanↄ bò wé'i gũnnɛɛ? Dín Filisitini gyↄfↄrↄde pì ũ, gbasa àtɛn kùsɛɛ biribiri Luda Wɛ̃̀ndide zĩ̀karinↄaa? 27 Akũ ò pìnɛ lákũ gbɛ̃nↄ tɛn o nà: Lɛn oni kɛ gbɛ̃ kũ à a dɛ̀nɛ lɛ. 28 Kũ a vĩ̀ni zↄ̃kↄ̃de Ɛliabu mà Dauda tɛn yã o kũ gbɛ̃nↄ, a pↄ fɛ̃̀i à pì: À kɛ̀ dera n su laa? Dín n sã fíti nↄ tònɛ gbárannan? Má n karambaani kũ n nɛ̀sɛ vãnio dↄ̃. N su zĩ̀ gwamɛ. 29 Dauda pì: Bↄ́n ma kɛ̀ɛ? Bee yã mani oroo? 30 Akũ à kpɛ dↄ̀nɛ, à gɛ̀ɛ à yã dokↄ̃nↄ pìi là gbɛ̃ pãndea. Lákũ gbɛ̃ káaku ònɛ nà, lɛn ò ònɛ lɛ dↄ. 31 Ò yã kũ Dauda ò pìi gbã̀ Solunɛ, akũ à a sìsi.

32 Kũ Dauda sù, à pì Solunɛ: Gbɛ̃ke sún tó swɛ̃̀ kɛ̃agu Filisitini pì yã musuro. Makũ n zↄ̀blerii, mani gɛ́ zĩ̀ ká kãao. 33 Akũ Solu pìnɛ: Ĩni fↄ̃ ǹ gɛ́ zĩ̀ ká kũ Filisitini pìioro. Nɛ́ fítimɛ n ũ. Gↄ̃gbɛ̃ pì sↄ̃ bi zĩ̀kariimɛ zaa a kɛfɛnnakɛgↄrↄa. 34 Akũ Dauda pìnɛ: Makũ n zↄ̀blerii, makũ mɛ́ madìgↄ̃ ma de sãnↄ dã. Tó músu ke mani sù à sã kũ̀ kpàsan, 35 madì a gbɛsɛ mà a gbɛ̃ mà sã pì bo a lɛ́i. Tó à ɛ̀ra kũmao, akũ madì a kũ a lɛ́kãsãa mà gbɛ̃ mà dɛ. 36 Makũ n zↄ̀blerii, ma músuu dɛ̀, ma mani dɛ̀. Filisitini gyↄfↄrↄde pì ni gↄ̃ lán pↄ́ pìnↄ bà, zaakũ àtɛn kùsɛɛ biribiri Luda Wɛ̃̀ndide zĩ̀karinↄamɛ. 37 Dauda ɛ̀ra à pì: Lákũ Dikiri ma bo músu kũ manio lɛ́i nà, lɛn ani ma bo Filisitini pì ↄĩ lɛ. Akũ Solu pìnɛ: Ǹ gɛ́! Dikiri gↄ̃ kú kũnwo.

38 Solu a zĩ̀ka'uta dànɛ à a mↄ̀gotɛ̃ fùraa kùnɛ, akũ à a mↄ̀ uta dànɛ. 39 Dauda Solu fɛ̃nɛda lòko zĩ̀ka'uta pìia. Kũ à nà táa, akũ à fùa, zaakũ adi dↄ́nɛ kɛoro. Akũ à pì Solunɛ: Mani fↄ̃ mà gɛ́ kũ pↄ́ pìnↄro, zaakũ mádi dↄ́nɛ kɛoro. Akũ à pↄ́ pìnↄ bↄ̀tɛ pínki à kàtɛ. 40 À a gòo sɛ̀, akũ à gɛ̀ɛ à gbɛ̀ pↄ́rↄpↄrↄ sɛ̀tɛ swawɛɛn mɛ̀n sↄↄro à kà a sãdãbↄkↄn. Akũ àtɛn na Filisitini pìii, à a gbɛ̀mba kũna.

41 Akũ Filisitini pì tɛn na Daudai, a sɛ̃gbakosɛri tɛn táa o a arɛ. 42 Kũ à Dauda gwà, à è nɛ́ fíti tɛ̃ra manamɛ, akũ à dↄkɛ̀ kãao 43 à pìnɛ: Gbɛ̃dan ma ũ, akũ n gbasa ntɛn sumai kũ gòoo yá? Akũ à a kà kũ a tãna tↄ́o. 44 Akũ à ɛ̀ra à pì: Ǹ namai ǹ gwa, bãnↄ ni n ble, nↄ̀bↄ pãsĩnↄ ni n só. 45 Dauda pìnɛ: Fɛ̃nɛda kũ sári lɛ̀kɛtɛɛo kũ sári sↄ̃ntɛon ntɛn suomai. Makũ sↄ̃, Dikiri Zĩ̀karide Isarailanↄ Luda kũ n kùsɛɛ bìribiria tↄ́n matɛn suomma. 46 Dikiri ni n namɛnɛ ma ↄĩ gbãra. Mani n dɛ mà n mì zↄ̃, mani Filisitini zĩ̀karinↄ gɛ̀nↄ kpá bãnↄa kũ nↄ̀bↄ pãsĩnↄo gbãra ò só, andunia ni dↄ̃ kũ Luda kú kũ Isarailanↄ. 47 Gbɛ̃ kũ ò kakarana lanↄ ni dↄ̃ kũ Dikiri dì zĩ̀ ble kũ fɛ̃nɛdao ke kũ sárioro. Dikiri mɛ́ a zĩ̀ gbãna vĩ, ani á nawɛrɛ ó ↄĩ.

48 Gↄrↄ kũ Filisitini pì tɛn na Daudai àtɛn su, akũ Dauda bàa lɛ̀ àtɛn su gu kũ oni zĩ̀ kán. 49 Akũ à ↄ dà a bↄ̀kↄn à gbɛ̀ɛ bò à dà a gbɛ̀mban. Kũ à Filisitini pìi gbã̀o, akũ à a pà a arɛa. Gbɛ̀ɛ pìi vlɛ̃̀ a arɛ pìi gũn, akũ à lɛ̀tɛ a gbɛrɛa. 50 Gbɛ̀mbaan Dauda zĩ̀i blèo Filisitini pìia. À a pào à nɛ̀, bee fɛ̃nɛda à kũnaro. 51 Akũ à bàa lɛ̀ à gɛ̀ɛ à zɛ̀ala, à a fɛ̃nɛda wòto a kpɛ́n à a dɛ̀ à a mìi zↄ̃̀o. Kũ Filisitininↄ è ń gↄ̃sa gbãna pìi gà, akũ ò lɛ̀kↄ̃a. 52 Akũ Isarailanↄ kũ Yudanↄ pɛ̀tɛńyĩ kũ wikio, ò pɛ̀ḿma ari Gata bĩnilɛa kũ Ɛkɛrↄnu bĩnilɛo. Gbɛ̃ kũ ò ń dɛdɛnↄ gɛ̀nↄ gↄ̃̀ katɛna sɛna zaa Saraimu zɛ́n ari Gata kũ Ɛkɛrↄnuo. 53 Kũ ò sù kũ pɛna Filisitininↄaao, akũ ò ń bùra pↄ́nↄ nàkↄ̃a ò tào. 54 Dauda Filisitini pìi mìi sɛ̀ à gɛ̀ɛo Yurusalɛmu, à a gↄ̃kɛbↄnↄ kàtɛ a kpɛ́n.

55 Gↄrↄ kũ Dauda tɛn na Filisitini pìii, Solu tɛni a gwa, akũ à a zĩ̀karinↄ gbɛ̃ zↄ̃kↄ̃ Abana là à pì: Dí nɛ́mɛ nɛ́gↄ̃gbɛ̃ pì ũu? À wèa à pì: Kína, kũ n kunnaao, má dↄ̃ro. 56 Akũ kína pì: Ǹ gbɛka ǹ ma dí nɛ́n kɛfɛnna pì ũ. 57 Kũ Dauda sù kũ Filisitini pì dɛnaao, Abana a sɛ̀ à gɛ̀ɛo Solu kĩnaa, à Filisitini pìi mì kũna. 58 Akũ Solu a là à pì: Kɛfɛnna, dí nɛ́mɛ n ũu? À wèa à pì: N zↄ̀bleri Yɛsɛ, Bɛtilihamu gbɛ̃ nɛ́mɛ ma ũ.