Luda yã takada kũ Bisã yão 1 SAMUƐLI 25

Dauda kũ Nabalao kũ Abigailio

1 Samuɛli gà, akũ Isarailanↄ kàkara ń pínki, òtɛn ↄ́ↄ dↄ a ganaa musu, akũ ò a vĩ̀ a bɛa zaa Rama. Abire gbɛra Dauda gɛ̀ɛ Parani sɛ̃̀ntɛ. 2 Maↄni gbɛ̃ke kun, à bↄkↄtɛ vĩ Kamɛli gwe. Aruzɛkɛde zↄ̃kↄ̃ↄmɛ, à sãnↄ vĩ wàa gɛ̃ro kũ blènↄ wàa sↄↄro. Akũ à sù Kamɛli de à a sãnↄ kã zↄ̃zↄ̃. 3 A tↄ́n Nabala, a nanↄ tↄ́n Abigaili. Nↄgbɛ̃ pìi laakari vĩ akũsↄ̃ a kakana mana, ama a gↄ̃ pì gbɛ̃ke wé'i vĩro, a yãkɛnanↄn dↄ̀rↄ vĩro. Kalɛbu burimɛ.

4 Gↄrↄ kũ Dauda kú sɛ̃̀ntɛ, à mà Nabala sù a sãnↄ kã zↄ̃zↄ̃. 5 Akũ à a ìbanↄ zĩ̀ gbɛ̃nↄn kuri, à pìńnɛ: À futɛ à gɛ́ Nabala kĩnaa zaa Kamɛli, à fↄ kpáamɛnɛ 6 à onɛ à pi: Luda n dↄ̃ kũ aafiaao kũ n ↄnnwo kũ n gbɛ̃nↄ ń pínki. 7 Ma mà n su kũ sãkãkɛ̃rɛrinↄ. Kũ n sãdãrinↄn kú kũoo, odi wari daḿmaro, ń kunna Kamɛli gũn, pↄ́ke dí kĩaḿmaro. 8 Ǹ n zĩkɛrii pìnↄ la, oni onnɛ. Ǹ tó ma ìbanↄ n pↄnna e, zaakũ dikpɛ zĩmɛ. N zↄ̀blerii pìnↄ kũ makũ n nɛ́o ǹ ó gba pↄ́ kũ n è.

9 Kũ Dauda ìbaa pìnↄ kà, ò yã pìi bàba Nabalanɛ kũ Dauda tↄ́o, akũ ò zɛ̀i. 10 Akũ Nabala pìńnɛ: Dín Dauda ũu? Dín Yɛsɛ nɛ́ pì ũu? Zↄ̀ kũ ò kɛ̃̀ n dikirinↄa gbãranↄn dasi. 11 Á ye mà a burodi kũ ma ío kũ nↄ̀bↄ kũ ma dɛ̀ ma sãkãkɛ̃rɛrinↄnɛo sɛ́tɛ mà kpá gbɛ̃ kũ má ń boki dↄ̃ronↄan yá? 12 Akũ Dauda gbɛ̃nↄ ɛ̀ra ò dà zɛ́n ò tà. Kũ ò kà, ò yã pìnↄ gbã̀nɛ pínki. 13 Akũ Dauda pì a gbɛ̃ pìnↄnɛ: Á baadi a fɛ̃nɛda loko. Akũ ń baadi a fɛ̃nɛda lòko kũ Daudao se. Gbɛ̃ kũ ò gɛ̀ɛ kũ Daudaonↄ kà wàa pla taka, akũ gbɛ̃nↄn wàa do gↄ̃̀ kũ asonↄ.

14 À sù à lè zĩkɛrii pìnↄ doke gɛ̀ɛ à ò Nabala nanↄ Abigailinɛ à pì: Dauda gbɛ̃nↄ zĩ̀ ò bò sɛ̃̀ntɛ, ò sù ò fↄ kpà ó dikiria, akũ à pàtaḿma. 15 Gbɛ̃ pìnↄ sↄ̃ ò yã mana kɛ̀wɛrɛ manamana, odi wari dawáro. Ó kunna kũńwo sɛ̃̀ntɛ, pↄ́ke dì sãtɛwáro. 16 Gↄrↄ kũ ótɛn sã dã ń sarɛ fãnantɛ̃ kũ gwãanio pínki, òdigↄ̃ likawái lán bĩni bà. 17 Ǹ laasun lɛ́ yã kũ ĩni kɛa, zaakũ ò zɛ̀o ò yã vãni kɛ ó dikiriinɛ kũ a ↄndenↄ ń pínki. Àpi manaro, àdi gbɛ̃ lɛ́damma maro.

18 Akũ Abigaili burodii kàkara likalika mɛ̀n wàa do kũ sèwɛ̃o tùru pla kũ sã kũ ò kɛ̀kɛnↄ mɛ̀n sↄↄro kũ pↄ́blewɛ kpatanaao kpɛ̃nɛ sↄↄro kũ geepi kàranↄ mɛ̀n basↄↄro kũ kaka nɛ́ kori kàranↄ mɛ̀n wàa do, ò yĩ̀ zaakinↄnɛ. 19 Akũ à pì a zĩkɛrinↄnɛ: Àgↄ̃ do arɛ, manigↄ̃ tɛ́ á kpɛ. Adi yãke o a zã Nabalanɛro. 20 Akũ à di a zaakia, àtɛn kipa sĩ̀sĩia. Kũ à bò sĩ̀sĩ kpɛ, ò dàkarɛ kũ Daudao, àtɛn kipa sĩ̀sĩia se kũ a gbɛ̃nↄ, òtɛn su. 21 Dauda tɛn o a gbɛ̃nↄnɛ: Ma gbɛ̃ pì pↄ́nↄ dã̀kpãnɛ sɛ̃̀ntɛ pãmɛ. Ódi a pↄ́ke sɛ́ro, akũ à yã mana kũ ma kɛ̀nɛ fĩna bòmɛnɛ kũ a vãnio. 22 Tó ma a gↄ̃gbɛ̃ ke tò bɛ̃nɛ ari gu gↄ̃ gɛ́ dↄ, Luda yã kɛmɛnɛ pãsĩpãsĩ.

23 Kũ Abigaili a è, akũ à kìpa a zaakia likalika, à kùtɛ Daudanɛ à arɛ pɛ̀tɛ. 24 Akũ à kùtɛ a gbá sarɛ à pì: Baa, taari pìi gↄ̃̀ ma mɛ̀n do musu. Ǹ makũ n zↄ̀bleri gba zɛ́ mà yã onnɛ. Ǹ sã dↄ makũ n zↄ̀bleri yãi. 25 Baa, Nabala manaro. Ǹsun a yã daro. À de lán a tↄ́ bàmɛ. A tↄ́n Yↄ̃nkↄ, akũsↄ̃ yↄ̃nkↄyãn àdigↄ̃ kɛ. Makũ n zↄ̀bleri sↄ̃, mádi gbɛ̃ kũ n ń zĩnↄ ero. 26 Baa, lákũ Dikiri kun akũsↄ̃ ń kun nà, Dikiri gìnnɛ ǹ gbɛ̃ dɛ ǹ mↄra káḿma n zĩda. Dikiri tó n ibɛrɛnↄ kũ gbɛ̃ kũ òtɛni n kpákpa kũ a vãnionↄ gↄ̃ lán Nabala bà. 27 Tera sà Baa, ǹ gba kũ makũ n zↄ̀bleri ma suonnɛ dí sí ǹ kpá n ìbanↄa. 28 Ǹ sùru kɛ kũ makũ n zↄ̀bleriio kũ ma taario dↄ. Dikiri ni tó n burinↄ gↄ̃ kí ble gↄrↄ sĩnda pínki, zaakũ ndì zĩ̀ ká Dikirinɛmɛ, oni a vãni ke emma zikiro. 29 Bee tó gbɛ̃ke fùtɛ àtɛn pɛ́tɛnyĩ à n dɛ, Dikiri n Luda ni n wɛ̃̀ndiba dↄ kũ mↄ̀kakↄ̃anaamɛ, ani n ibɛrɛnↄ wɛ̃̀ndi da gbɛ̀mban à zu. 30 Baa, tó Dikiri yã mana kɛ̀nnɛ lákũ à lɛ́ sɛ̀nnɛ nà pínki, tó à n ditɛ Isarailanↄ gbɛ̃ zↄ̃kↄ̃ ũ, 31 n laasun sún wari dↄmma à n da yãn gbɛ̃dɛna pã ke fĩnabona n zĩdanɛ yã musuro. Baa, tó Dikiri yã mana kɛ̀nnɛ, ǹ tó makũ n zↄ̀bleri ma yã gↄ̃ dↄngu.

32 Akũ Dauda pì Abigailinɛ: Ò Dikiri Isarailanↄ Luda sáabu kpá, zaakũ à n zĩ ǹ damalɛ gbãra. 33 Ma n sáabu kpà se kũ lɛ́damma kũ n ma gbao, zaakũ mↄkↄ̃mmɛ n kpamɛnɛ gbãra, akũ mádi gbɛ̃ dɛ ma mↄra káḿma ma zĩdanɛro. 34 Tó abirekũnlo, kũ Dikiri Isarailanↄ Luda kũ à gìmɛnɛ mà yã vãni kɛnnɛo, tó ńdi wã n su n damalɛ yãro, de gu ni dↄ Nabala nɛ́gↄ̃gbɛ̃ kearo. 35 Akũ Dauda pↄ́ kũ Abigaili sùoarɛ sì à pì: Ǹ ká bɛ aafia. Ma n yã mà, ma yodaado kɛ̀nnɛ.

36 Kũ Abigaili kà Nabala kĩnaa, à è àtɛn pↄ́ ble lán kína bà. A pↄ kɛ̀ nna, à wɛ̃ gbɛ̃̀ à kã̀. Akũ a nanↄ pì dí lɛ́ bo à yãke ònɛ, bee fítiro, ari gu gɛ̀ɛ à dↄ̀o. 37 Kũ gu dↄ̀, wɛ̃ wère Nabalaa, akũ a nanↄ yã kũ à kɛ̀ɛ pìi ònɛ. Akũ swɛ̃̀ɛ kɛ̃̀agu, à gↄ̃̀ lán gbɛ̀ɛ bà. 38 Kũ à kɛ̀ lán gↄrↄ kuri taka bà, akũ Dikiri gòo tↄ̃̀a, à gà.

39 Kũ Dauda Nabala gana baaruu mà, à pì: Ò Dikiri kũ à zɛ̀ kũmao sáabu kpá, à wé'i kũ Nabala dàma bòmɛnɛ. À gìmɛnɛ mà yã vãni kɛ, akũ à tò Nabala vãnikɛnaa wì a zĩda musu. Abire gbɛra Dauda gbɛ̃nↄ zĩ̀ Abigailia ò onɛ á ye à a sɛ́ nↄ ũ. 40 Kũ Dauda ìbaa pìnↄ kà Abigaili kĩnaa Kamɛli, ò pìnɛ: Dauda mɛ́ à ó zĩmma, à ye à n sɛ́ nↄ ũ. 41 Akũ à fùtɛ à kùtɛ à a mìi pɛ̀tɛ à pì: A zↄ̀bleriin ma ũ, ma soru kɛ̀ mà a dikiri ìbanↄ gbá pípińnɛ. 42 Akũ à fùtɛ à dì zaakia gↄ̃̀nↄ. A nↄgbɛ̃ zĩkɛrinↄ gɛ̀ɛ kãao gbɛ̃nↄn sↄↄro. Ò dà zɛ́n kũ Dauda zĩ̀rinↄ, akũ à gↄ̃̀ a nↄ ũ. 43 Dauda Yɛzɛrili gbɛ̃ Ainↄama kũna nↄ ũ dↄ. Ń pla ń pínki a nↄnↄmɛ. 44 Solu a nɛ́ Mikala kũ à de Dauda nↄ ũ yã kpà Laisi nɛ́ Palatiɛli, Galimu gbɛ̃a.