Luda yã takada kũ Bisã yão 1 SAMUƐLI 29

Filisitini kínanↄ Dauda gbarɛna Zikilaga

1 Filisitininↄ ń zĩ̀karinↄ kàkara Afɛki, akũsↄ̃ Isarailanↄ bùra kú Yɛzɛrili ísɛ̃bokia. 2 Filisitini kínanↄ tɛn gɛ̃tɛ kũ ń zĩ̀kari gã̀nↄ, ń kenↄ gbɛ̃nↄn basↄsↄↄro, ń gã̀ kenↄ wàa sↄsↄↄro. Dauda kũ a gbɛ̃nↄ tɛ́ ń kpɛ kũ Akisio. 3 Akũ Filisitini kína pìnↄ Akisi là ò pì: Eberu dínↄ sↄ̃ bi? À wèḿma à pì: Daudan dí. Isarailanↄ kína Solu ìba kemɛ yã. À gↄrↄ pla kɛ̀ kũmao. À kú kũmao de wɛ̃̀ dola. Naana zaa gↄrↄ kũ à sù ma kĩnaa ari gbãra, mádi yãke earo. 4 Akũ kína pìnↄ pↄ fɛ̃̀ kãao ò pì: Ǹ gↄ̃gbɛ̃ pì gbarɛ à tá gu kũ n kpàawan. Ani le à gɛ́ kũoo zĩ̀lanlo, de àsun bo ó kpɛ gwero yãi. Deran ani le à kɛ nna kũ a dikiriio nà, tó adi kɛ à tà kũ ó gbɛ̃kenↄ mìio baasiroo? 5 Dauda kũ ò lɛ̀ɛ sì ò ũ wã̀ a yã musun gweroo? Kũ ò pì:

Solu gbɛ̃nↄ dɛ̀dɛ wàa sↄsↄↄro,

Dauda sↄ̃ mɛ̀n dúbu lɛu ũgbangba.

6 Akũ Akisi Dauda sìsi à pìnɛ: Ma sì kũ Dikirio n kɛmɛnɛ gbɛ̃ mana ũmɛ, n gɛna kũmao zĩ̀lan kɛ̀mɛnɛ nna, zaakũ naana zaa gↄrↄ kũ n su ma kĩnaa ari gbãra, mádi yãke emmaro. Ama ń yã dí kɛ ó kínanↄnɛro. 7 Ǹ ɛra ǹ tá kũ aafiaao de ǹsun yãke kɛ à kɛńnɛ ĩniro. 8 Akũ Dauda Akisi là à pì: Bↄ́n ma kɛ̀ɛ? Naana zaa gↄrↄ kũ ma su n kĩnaa ari gbãra, bↄ́n n èmaa? Bↄ́yãin mani gí gɛ́ mà zĩ̀ ká kũ ma dikiri kína ibɛrɛnↄoroo? 9 Akũ Akisi pìnɛ: Má dↄ̃ kũ ń manamɛnɛ lán Luda malaika bà, ama ó kínanↄ pì ǹsun gɛ́ kũoo zĩ̀lanlo. 10 Tó gu dↄ̀, ǹ futɛ kↄnkↄkↄnkↄ kũ n dikiri Solu zↄ̀bleri kũ ò sù kũnwonↄ, à tá. 11 Akũ Dauda fùtɛ kↄnkↄkↄnkↄ kũ a gbɛ̃nↄ, òtɛn tá Filisitininↄ bùsun. Filisitininↄ sↄ̃ ò gɛ̀ɛ Yɛzɛrili.