Luda yã takada kũ Bisã yão 1 TIMƆTI 5

Gyaanↄnↄ kũ don'arɛdenↄ yã

1 Ǹsun kpãkɛ̃ mare zↄ̃kↄ̃ↄiro. Ǹ lɛ́ daa lán n de bà. Ǹ lɛ́ da kɛfɛnnanↄa lán n vĩ̀ni kũ n dakũnanↄ bà. 2 Ǹ lɛ́ da nↄgbɛ̃ zↄ̃kↄ̃ↄa lán n da bà, ǹ lɛ́ da nↄ gbãnaa lán n dãre bà kũ nɛ̀sɛpurao.

3 Ǹ kpá gyaanↄ kũ ò gbɛ̃ke vĩronↄi. 4 Tó gyaanↄ nɛ́nↄ vĩ ke daikorenↄ, ò ń danɛnↄ gwanaa dada gĩa ń donyĩkɛnaa gũn, ò fĩna bo ń denↄnɛ kũ ń danↄ, zaakũ abirekũ dì ká Ludagu. 5 Gyaanↄ kũ à gbɛ̃ke vĩro wɛ́ dↄ Ludai, àgↄ̃ adua kɛ àgↄ̃ kpányĩ gbɛkaa gwãani kũ fãnantɛ̃o. 6 Gyaanↄ kũ a zĩda pↄyeinaa dì donɛ arɛ bi gɛ̀ɛmɛ, bee tó à bɛ̃nɛ. 7 Ǹ yã pìnↄ dańnɛ de gbɛ̃ke sún ń taari ero. 8 Tó gbɛ̃ tɛni a danɛnↄ gwaro, atɛ̃nsa a ↄndenↄ, à bò Luda yã kpɛmɛ, Yesusaride deala. 9 Nↄgbɛ̃ kũ à de ò da gyaanↄnↄ tɛ́n di: Nↄgbɛ̃ kũ à kà wɛ̃̀ baaakↄ̃, akũsↄ̃ à zã kɛ̀ gɛ̃̀n do, 10 ò a dↄ̃ yãmanakɛri ũ, nɛ́gwari mana ũ, nibↄkũri Luda gbɛ̃nↄ gbá pìpiri ũ, takaside kpanyĩri ũ, nↄgbɛ̃ kũ à mɛ̀ɛ kpà yãmanakɛna pínkia ũ. 11 Ǹsun gyaanↄ nↄ gbãnanↄ danlo, zaakũ tó ń gↄ̃ nidɛnaa fùtɛ, ń nana Kirisia ni busamɛ, onigↄ̃ ye ò zã kɛ, 12 ò ń zĩda da yãn, kũ ò lɛ́ kũ ò sɛ̀nɛ yã gbòro yãi. 13 Abire gbɛra òdi ma'ã dada, òdigↄ̃ gɛ̃gɛ̃ ↄn kũ ↄnnwo. Adi kɛ ma'ãdenↄmɛ ń ũ adoro, òdi gↄ̃ gbɛ̃piri gudɛrinↄ ũmɛ dↄ, òdi yã kũ à de ò oro o. 14 Abire yãi má ye gyaanↄ nↄ gbãnanↄ zã kɛ, ò nɛ́ i ò laakari dↄ bɛa, de òsun ó ibɛrɛnↄ gba zɛ́ ò ó tↄ́ vãni síro yãi. 15 Ń gbɛ̃kenↄ bò ò tɛ̀ Setanyĩ kↄ̀. 16 Tó Yesude nↄgbɛ̃ ke gyaanↄnↄ vĩ a bɛa, àgↄ̃ kpáńyĩ. Àsun tó ò gↄ̃ sↄsinɛ aso ũro, de ò le ò kpá gyaanↄ kũ ò gbɛ̃ke vĩronↄi yãi.

17 Gbɛ̃ zↄ̃kↄ̃ kũ àdi dońnɛ arɛ a zɛ́aa kà ò fĩna bonɛ lɛu pla, atɛ̃nsa gbɛ̃ kũ à waazikɛna kũ yãdannɛnaao kokari vĩ. 18 Luda yã pì: Àsun lɛ́sↄ da zù kũ àtɛn pↄ́ gbɛ̃nɛro. À pì dↄ: Zĩkɛrii kà à a làada le. 19 Ǹsun gbɛ̃ kũ à sù kũ gbɛ̃ zↄ̃kↄ̃ káarao yã síro, séto sèedadenↄ kà gbɛ̃nↄn pla ke aakↄ̃ baasiro. 20 Ǹ kpãkɛ̃ gbɛ̃ kũ ò durunna kɛ̀nↄi gbɛ̃ sĩnda pínki wára, de vĩna le à gbɛ̃ kparanↄ kũ. 21 Ma nannɛ Luda kũ Kirisi Yesuooi kũ malaika kũ à ń sɛ́nↄ, ǹgↄ̃ yã pìnↄ kũna, ǹsun gbɛ̃ke tɛ̃̀ boro. Ǹsun yãke kɛ gbɛ̃kenɛ úblembɛ yãiro. 22 Ǹsun wã ǹ ↄ na gbɛ̃a ǹ a da Luda zĩnlo. Ǹsun tó n ↄ gↄ̃ kú gbɛ̃ke durunna gũnlo. Ǹgↄ̃ n zĩda kũna gbãsĩ sari. 23 Ǹsun í pã mi atɛ̃nɛro. Ǹgↄ̃ sèwɛ̃ gá fíti n nɛ̀sɛ yãi kũ n gyãkɛna gɛ̃̀n baaakↄ̃o.

24 Gbɛ̃kenↄ durunna dì bo gupuraa ari ògↄ̃ gɛ́ a yã gↄ̃gↄ̃ kũńwo, gbɛ̃kenↄ sↄ̃ ń pↄ́ dì bo likalikaro. 25 Lɛmɛ dↄ yãmanakɛnaa dì bo gupuraa, bee a kũ odi ero ni le à gↄ̃ utɛnaro.