Luda yã takada kũ Bisã yão 2 SAMUƐLI 8

Dauda zĩ̀blena buri kenↄa

1 Abire gbɛra Dauda zĩ̀i blè Filisitininↄa à ń búsa à ń wɛ́ra Gata sìḿma. 2 À zĩ̀i blè Mↄabunↄa, akũ à tò ò wùtɛ kↄ̃ sarɛ zĩtɛ. À bàa yↄ̃̀ḿma. Tó à bà pla daguraa dɛ̀dɛ, àdi bà do dagura tó bɛ̃nɛ. Akũ Mↄabunↄ gↄ̃̀ Dauda zↄ̀blerinↄ ũ, akũ òdigↄ̃ táfe bonɛ. 3 Dauda zĩ̀i blè Reobo nɛ́ Adadɛza, Zoba kínaa, gↄrↄ kũ kína pìi ɛ̀ra àtɛn gɛ́ ↄ tↄ̃ Yuflati swasarɛdenↄa. 4 Akũ à a sↄ̃gonↄ kũ̀kũ mɛ̀n wàa sↄↄro kũ sↄ̃godenↄ gbɛ̃nↄn dúbu suppla kũ gbɛ̃ kũ ò tɛ́ gɛ̀sɛnↄ gbɛ̃nↄn dúbu baro. Akũ à ń sↄ̃nↄ gbátĩnↄ zↄ̃̀zↄ̃ pínki, mɛ̀n basↄↄro mɛ́ ò bò. 5 Siria kũ ò kú Damasukunↄ sù Adadɛza leo, akũ Dauda ń gbɛ̃nↄ dɛ̀dɛ dúbu baro awɛɛpla. 6 À gudãkpãrinↄ dìtɛditɛ Siria bùsun, akũ ò gↄ̃̀ a zↄ̀blerinↄ ũ, òdigↄ̃ táfe bonɛ. Dikiri tò Dauda zĩ̀i blè gu kũ à gɛ̀ɛn pínki. 7 Dauda Adadɛza ìbanↄ wura sɛ̃gbakonↄ sɛ̀tɛ à tào Yurusalɛmu. 8 À mↄ̀gotɛ̃ sɛ̀tɛ dasidasi Adadɛza wɛ̃tɛ kũ òdi pi Teba kũ Berotaioo gũn.

9 Kũ Amata kína Tohu mà Dauda zĩ̀i blè Adadɛza zĩ̀karinↄa ń pínki, 10 akũ à a nɛ́ Adoramu zĩ̀ fↄ kpáa. À a sáabu kpà zĩ̀ kũ à blè Adadɛzaa yãi, zaakũ Tohu zĩ̀i kà kãao yã. Adoramu sù kũ wura pↄ́nↄ kũ andurufu pↄ́nↄ kũ mↄ̀gotɛ̃ pↄ́nↄ, 11 akũ kína Dauda kàtɛ Dikiri pↄ́ ũ lákũ à kɛ̀ kũ buri kũ à gbãna blèḿmanↄ andurufu pↄ́nↄ kũ wura pↄ́nↄ nà pínki, 12 Ɛdↄmunↄ kũ Mↄabunↄ kũ Amↄninↄ kũ Filisitininↄ kũ Amalɛkinↄ. Lɛn à kɛ̀ lɛ kũ pↄ́ kũ à sì Zoba kína Adadɛza, Reobo nɛ́aao. 13 Lɛn Dauda tↄ́ bò lɛ. Kũ à zĩ̀i blè Sirianↄa à sù, à Ɛdↄmunↄ dɛ̀dɛ Guvutɛ Wisiden gbɛ̃nↄn dúbu baro plansari. 14 Akũ à gudãkpãrinↄ dìtɛditɛ Ɛdↄmu bùsun dↄ, akũ Ɛdↄmu pìnↄ gↄ̃̀ a zↄ̀blerinↄ ũ. Gu kũ Dauda gɛ̀ɛn pínki Dikiri dì tó à zĩ̀ blemɛ.

15 Daudamɛ Isaraila buri sĩnda pínki kína ũ, à yã mana kɛ̀ a gbɛ̃nↄnɛ a zɛ́a. 16 Zeruya nɛ́ Yoabumɛ zĩ̀karinↄ gbɛ̃ zↄ̃kↄ̃ ũ. Ailudi nɛ́ Yosafatamɛ baarukpari ũ. 17 Aitubu nɛ́ Zadↄki kũ Abiata nɛ́ Aimɛlɛkioomɛ sa'orikinↄ ũ. Serayamɛ takadakɛ̃ri ũ. 18 Yoyada nɛ́ Bɛnayamɛ dogarinↄ gbɛ̃ zↄ̃kↄ̃ ũ. Dauda zĩda nɛ́gↄ̃gbɛ̃nↄmɛ a kpàasinↄ ũ.