Luda yã takada kũ Bisã yão 2 SAMUƐLI 12

Annabi Natã kpãkɛ̃na Daudai

1 Dikiri Natã zĩ̀ Daudaa. Kũ à kà, à pìnɛ: Gↄ̃gbɛ̃ gbɛ̃nↄn pla kenↄ mɛ́ ò kú wɛ̃tɛ ke gũn, gbɛ̃ do bi aruzɛkɛdemɛ, gbɛ̃ do sↄ̃ takasidemɛ. 2 Aruzɛkɛde pì sãnↄ kũ zùnↄ vĩ dasidasi, 3 takaside pì sↄ̃ à pↄ́ke vĩro, sã núnu fítinna mɛ̀n doken à lù. Akũ à dàto ari à zↄ̃kↄ̃ kũ̀ a bɛa kũ a nɛ́nↄ. Òdigↄ̃ pↄ́ dokↄ̃nↄ ble òdigↄ̃ í mi ta dokↄ̃nↄn, àdi wùtɛ a pↄtɛ, akũ àtɛni a gwa lán a zĩda nɛ́nↄkpare bà. 4 Kũ nibↄↄ kìpa aruzɛkɛde pìia, akũ adi we à sã ke zùu kũ̀ a kpàsaa gũn à nibↄↄ pìi yàri kɛoro. Takaside sã núnu fítinna pìin à sìa à a nibↄↄ pìi yàrii kɛ̀o. 5 Akũ Dauda pↄ fɛ̃̀ aruzɛkɛde pì yã musu manamana, à pì Natãnɛ: Dikiri kun! À kũ̀ ò gbɛ̃ kũ à yã pìi kɛ̀ dɛmɛ. 6 Lákũ à kɛ̀ lɛ nà, adi a wɛ̃nda gwaro, ani sã pì fĩna bo lɛu siikↄ̃. 7 Akũ Natã pì Daudanɛ: Mↄkↄ̃mmɛ ade pì ũ. Dikiri Isarailanↄ Luda mɛ́ à yã dí ò à pì: Ma n ka Isarailanↄ kína ũ, ma n bo Solu ↄĩ, 8 akũ ma n dikirii pì bɛ kpàmma, ma a nↄnↄ nànnɛ n ↄĩ. Ma Isarailanↄ kũ Yudanↄ kpàmma n gbɛ̃nↄ ũ. Tó adinↄ kɛ̀mma fíti yã, de mà a pãndenↄ karannɛ dↄ. 9 Bↄ́yãi n ma yã gya bòo? N yã kũ má yeiro kɛ̀, n Iti buri Uria dɛ̀ kũ fɛ̃nɛdao, n a nↄ sìa n sɛ̀. N tò Amↄninↄ a dɛ̀ zĩ̀i gũn. 10 Zaa gbãra yã pãsĩ ni kɛ̃ n bɛa ziki doro, zaakũ n ma gya bò, n Iti buri Uria nↄ sìa n sɛ̀. 11 Akũ Dikiri ɛ̀ra à yã dí ò dↄ à pì: Ǹ ma! Mani tó n zĩda bedenↄ sunyĩ kɛnnɛ. Mani n nↄnↄ símma mà ń kpá n gbɛ̃dake kea n wára, ani wútɛ kũńwo gupuraa. 12 N yã pìi kɛ̀ asiri gũmmɛ. Makũ sↄ̃ mani yã pì kɛnnɛ gupuraa Isarailanↄ wára ń pínki.

13 Akũ Dauda pì Natãnɛ: Ma durunna kɛ̀ Dikirinɛ. Akũ Natã pìnɛ: Dikiri n durunna kɛ̃̀mma, ĩni garo. 14 Ama lákũ n dↄkɛ kũ Dikirio manamana nà yã pì kɛnaa musu, nɛ́gↄ̃gbɛ̃ kũ nↄgbɛ̃ pìi ì kũnwo ni gamɛ. 15 Kũ Natã tà bɛ, akũ Dikiri tò nɛ́ kũ Uria nanↄ ì kũ Daudao pì gyã kũ̀. 16 Akũ Dauda tɛn Luda wɛ́ kɛ nɛ́ pì yã musu kũ lɛ́yĩnaao, gwãani àdigↄ̃ wútɛ zĩtɛmɛ. 17 A bɛ gbɛ̃ zↄ̃kↄ̃nↄ dìgↄ̃ zɛala de ò a futɛ zĩtɛ, ama àdi wero, àdi pↄ́ ble kũńworo. 18 A gↄrↄ supplade zĩn nɛ́ pìi gà. Vĩna Dauda ìbanↄ kũ̀, odi fↄ̃ ò ònɛ kũ nɛ́ pìi gàro. Ò pì: Gↄrↄ kũ nɛ́ pì kun, o yã ònɛ, adi ó yã maro. Deran óni onɛ nà sà kũ nɛ́ pìi gàa? Ani yã vãni kɛ. 19 Dauda è a ìbanↄ tɛn yã kpãni okↄ̃nɛ, akũ à dↄ̃̀ kũ nɛ́ pìi gàmɛ. À ń lá à pì: Nɛ́ pìi gàn yá? Akũ ò wèa ò pì: Ee! À gàmɛ. 20 Dauda fùtɛ zĩtɛ à zú ò, à nísi dↄ̀kↄ à a pↄ́kasanↄ lìtɛ, akũ à gɛ̀ɛ à kùtɛ Dikirinɛ a kpɛ́n. Kũ à ɛ̀ra à tà bɛ, à pↄ́ble gbɛ̀ka, akũ ò kpàa à blè. 21 A ìbanↄ a là ò pì: À kɛ̀ dera ntɛn yã kɛ lɛɛ? Gↄrↄ kũ nɛ́ pì kun, n lɛ́ yĩ̀ n ↄ́ↄ dↄ̀. Kũ à gà sà, n futɛ n pↄ́ blè. 22 À wèḿma à pì: Gↄrↄ kũ nɛ́ pì kun, ma lɛ́ yĩ̀ ma ↄ́ↄ dↄ̀, zaakũ ma pì, ke Dikiri ni ma wɛ̃nda gwa à tó nɛ́ pì gↄ̃ kun gwɛɛ, dí mɛ́ à dↄ̃ↄ? 23 Lán à gà nà sà, bↄ́yãin manigↄ̃ lɛ́yĩna dↄↄ? Mani fↄ̃ mà a vun yá? Mani gɛ́ a kĩnaa, ama ani ɛra à su ma kĩnaaro.

24 Dauda a nanↄ Basɛba laakarii kpàtɛnɛ, akũ à gɛ̀ɛ à wùtɛ kãao. À nɛ́ ì gↄ̃gbɛ̃ ũ, akũ à tↄ́ kpànɛ Sulemanu. Dikiri yei, 25 akũ à annabi Natã zĩ̀a à tↄ́ kpà nɛ́ pìinɛ Yɛdidaya Dikiri yenyĩ pì yãi.

Raba sina Amↄninↄa

26 Ari tera Yoabu kpɛ́ àtɛn zĩ̀ ká kũ Amↄninↄ zaa Raba, akũ à kínabɛ sì. 27 Akũ à gbɛ̃nↄ zĩ̀ Daudaa à pì: Ma zĩ̀i kà kũ Rabadenↄ, akũ ma ń ítↄki sì. 28 Ǹ zĩ̀kari kparanↄ kakara sà, ǹ mↄ́ ǹ lika wɛ̃tɛ pìii ǹ sí. Tó lɛnlo, mani sí, oni ma tↄ́ kpánɛ. 29 Akũ Dauda zĩ̀karinↄ kàkara ń pínki, à gɛ̀ɛ à lɛ̀tɛ Rabaa à sì. 30 Ò ń kína wura fùraa gò a mìia ò kù Daudanɛ. A tìkisi kà kiloo baraakuri, akũsↄ̃ gbɛ̀ bɛ̀ɛrɛde kúa. À wɛ̃tɛ pì pↄ́nↄ nàkↄ̃a manamana, 31 akũ à gbɛ̃ kũ ò kú gwenↄ kũ̀kũ à bↄ̀tɛ kũńwo, à ń dá sàkasaka zĩn kũ diga zĩo kũ kpása zĩo, akũsↄ̃ à tò ò kúnku bò. Lɛn à kɛ̀ Amↄni wɛ̃tɛnↄnɛ lɛ pínki, akũ à ɛ̀ra à tà Yurusalɛmu kũ a zĩ̀karinↄ ń pínki.