1 Yã kũ à gↄ̃̀n dí, ó gbɛ̃nↄ, à adua kɛwɛrɛ, de Dikiri yã le à dagula likalika, àgↄ̃ bɛ̀ɛrɛ vĩńnɛ lákũ à vĩ á kĩnaa nà. 2 À adua kɛwɛrɛ de à ó bo gbɛ̃ vãni dↄ̀rↄsaridenↄ ↄĩ, zaakũ adi kɛ gbɛ̃ sĩnda pínki mɛ́ à Luda yã sìro. 3 Dikiri náani vĩ, ani á gba gbãna, ani á sí a vãnia. 4 O á náani kɛ̀ Dikiri gũn kũ átɛn yã kũ o òárɛnↄ kɛ, akũsↄ̃ ánigↄ̃ kɛ. 5 Dikiri tó à Luda yenyĩ kũ Kirisi mɛnao gbázɛ dↄ̃ á swɛ̃̀n.

6 Ó gbɛ̃nↄ, o naárɛ Dikiri Yesu Kirisii, à kɛ̃ ó gbɛ̃ kũ ò ma'ã vĩnↄa, kũ òdi zĩ kɛ kũ yã kũ o dàńnɛoronↄ. 7 Á dↄ̃ kũ á zĩdao, kũ à mana àgↄ̃ tɛ́ ó ágbai, zaakũ ma'ãdenↄn ó ũ gↄrↄ kũ ó kú á tɛ́ro. 8 Ódi gbɛ̃ke pↄ́ble sí o blè fĩnabonaa sariro, o zĩ kɛ̀ gwãani kũ fãnantɛ̃o, o wari kɛ̀ ari í sìwá, de òsun gↄ̃ á gbɛ̃kenɛ aso ũro yãi. 9 Ó a zɛ́ vĩ à kpáwái, ama o kɛ̀ lɛ de à ó ágba sɛ́ yãimɛ. 10 Gↄrↄ kũ ó kú kãáo, o dìtɛ kũ gbɛ̃ kũ à ye zĩkɛnaairo ni pↄ́ blero. 11 O mà kũ á gbɛ̃kenↄ ma'ã vĩ, òdi pↄ́ke kopiro, séde gudɛ. 12 O dìtɛ gbɛ̃ bire takanↄnɛ, o nańnɛ Dikiri Yesu Kirisii, ò vutɛki kũ ò zĩ kɛ ò ń zĩda gwa.

13 Ákↄ̃nↄ sↄ̃ ó gbɛ̃nↄ, àsun kpasa kũ yãmanakɛnaaoro. 14 Tó gbɛ̃ke dí yã kũ o òárɛ takada dí gũn daro, à a yã bo à dítɛ. Àsun kakara kãaoro, de wé'i le à a kũ yãi. 15 Ama àsun a sɛ́ á ibɛrɛ ũro, à lɛ́ daa á gbɛ̃ndo ũ.

16 Dikiri Aafiade á gba aafia gↄrↄ sĩnda pínki yã sĩnda pínki gũn. Dikiri gↄ̃ kú kãáo á pínki. 17 Makũ Pↄlu makũ mɛ́ ma fↄkpammana díkĩna kɛ̃̀ kũ ma zĩda ↄo. Abirekũmɛ ma takada pínki sèeda ũ, lɛn madì kɛ̃ lɛ. 18 Ó Dikiri Yesu Kirisi gbɛ̃kɛ kɛárɛ á pínki.