Luda yã takada kũ Bisã yão ƐSITA 5

Ɛsita wɛ́kɛna kínaa

1 A gↄrↄ aakↄ̃de zĩ Ɛsita a kína nanↄ bizanↄ yĩ̀, akũ à gɛ̀ɛ à zɛ̀ kínabɛ ↄnn kpɛ́ kũ à kun kpɛ́lɛlɛa. Kína vutɛna kíblegbaaa kpɛ́ gũn gwe, a arɛ dↄna kpɛ́lɛlɛa. 2 Kũ à a nanↄ Ɛsita è zɛna kpɛ́lɛlɛa, a pↄ kɛ̀a nna, akũ à a wura gò kũ a kũna dↄ̀a. Ɛsita nài à ↄ kɛ̀ a gòo pì lɛ́a. 3 Kína a là à pì: Ɛsita, bↄ́mɛɛ? Bↄ́n ntɛn gbɛkamaa? Bee tó ma kpata kpadomɛ mani kpámma. 4 À wèa à pì: Kí, tó à kɛ̀nnɛ mana, ǹ Amana sísi pↄ́ble kũ matɛn kɛnnɛa gbãra. 5 Akũ kína pì ò su kũ Amanao gↄ̃̀nↄ, de ò gɛ́ ò yã kũ Ɛsita gbɛ̀kaa pì kɛ. Akũ kína kũ Amanao gɛ̀ɛ de ò pↄ́ble kũ Ɛsita kɛ̀ńnɛ pì ble.

6 Kũ òtɛn sèwɛ̃ mi, kína Ɛsita là à pì: Bↄ́n ntɛn wɛ́ kɛ maa? Mani kɛnnɛ. Yã kpaten ntɛn gbɛkamaa? Bee tó ma kpata kpadomɛ mani kpámma. 7 Ɛsita wèa à pì: Yã kũ matɛn wɛ́ kɛmman dí. 8 Kína, tó ma n pↄnna lè, tó à kɛ̀nnɛ, ǹ yã kũ matɛn wɛ́ kɛmma kɛmɛnɛ, à mↄ́ à pↄ́ble kũ mani kɛárɛ zia ble, mani yã kũ n ma lai onnɛ.

9 Kũ Amana bò zĩ birea, a pↄ kɛ̀ nna àtɛn yáa dↄ. Ama kũ à Mↄdekai è kínabɛ gãnu gũn adi futɛ à zɛ̀arɛro adi vĩna kɛarɛro, akũ à pↄ fɛ̃̀i. 10 À a zĩda kũ̀ à tà bɛ. Kũ à a gbɛ̃nnanↄ sìsi kũ a nanↄ Zɛrɛsio, 11 akũ àtɛn ĩa dã a aruzɛkɛ zↄ̃kↄ̃ kũ a nɛ́gↄ̃gbɛ̃ dasinↄ yã musu. À pì a karanaa lè kína kĩnaa à a gba gbãna de a ìba kparanↄla kũ gbãnadenↄo ń pínki. 12 À pì dↄ: Madon kína nanↄ Ɛsita ma sisi à pↄ́ble kɛ̀mɛnɛ kũ kínao. À ɛ̀ra à ma sisi mà pↄ́ ble kũ kínao zia dↄ. 13 Bee kũ abireo tó ma Yuda buri Mↄdekai è vutɛna kínabɛ gãnu gũn, yã birenↄ pínki dì kɛmɛnɛ pↄ́ke ũro. 14 Akũ a nanↄ Zɛrɛsi kũ a gbɛ̃nnanↄ pìnɛ: Ǹ tó gbɛ̃nↄ lí pɛ́tɛnnɛ a lei kà gã̀sãkuru bupla akuri, ǹ wɛ́ kɛ kínaa zia kↄnkↄ à n gba zɛ́ ǹ Mↄdekai lokoa, gbasa ǹ gɛ́ kũ kínao ǹ pↄ́ ble kũ pↄnnao. Yã pìi kà Amanagu manamana, akũ à lí pìi pɛ̀tɛ.

ƐSITA
<
5
>