20
Dokayã mɛ̀n kurinↄ
1 Luda yã díkĩna ò pínki à pì: 2 Makũmɛ Dikiri á Luda ũ. Ma á bↄ́tɛ zↄ̀blen Misila.
3 Àsungↄ̃ dikiri ke vĩ ma gbɛraro.
4-5 Àsun pↄ́ke taka kɛ à kútɛ à donyĩ kɛnɛro, pↄ́ kũ à kú musu ke zĩtɛ ke í gũnn yá, zaakũ makũ Dikiri á Luda, nɛ̀sɛgↄ̃bademɛ ma ũ. Madì gbɛ̃ kũ à yemaironↄ yã vãni wí ń burinↄ musu ari à gɛ́ pɛ́ ń sãkpɛnↄa kũ ń nasionↄ. 6 Gbɛ̃ kũ ò yemai ò ma dokayãnↄ kũnanↄ sↄ̃, madìgↄ̃ gbɛ̃kɛ vĩ kũńwomɛ ari ń buria.
7 Àsun makũ Dikiri á Luda tↄ́ sí pãpãro, zaakũ gbɛ̃ kũ à ma tↄ́ sì pãpã mani tó à bo pãro.
8 Àgↄ̃ dↄn kámmabogↄrↄ bi ma pↄ́mɛ. 9 Àgↄ̃ á bura zĩ kũ á zĩ sĩnda pínkio kɛ gↄrↄ suddo, 10 a supplade gↄ̃ deárɛ kámmabogↄrↄ ũ, zaakũ makũ Dikiri á Luda ma pↄ́mɛ. Àsun zĩ ke kɛ gↄrↄ pì zĩro, ákↄ̃nↄ ke á nɛ́gↄ̃gbɛ̃ ke á nɛ́nↄgbɛ̃ ke á zĩkɛri gↄ̃gbɛ̃ ke nↄgbɛ̃ ke á pↄ́kãde ke nibↄ kũ à kú á bɛa. 11 Zaakũ gↄrↄ suddon ma musu kũ zĩtɛo kɛ̀ kũ ísirao kũ pↄ́ kũ ò kú ń gũnnↄ pínki, akũ ma kámma bò a gↄrↄ supplade zĩ. A yã mɛ́ à tò ma arubarikaa dà kámmabogↄrↄ pìn ma dìtɛ ma pↄ́ ũ. 12 Àgↄ̃ á de kũ á dao bɛ̀ɛrɛ dↄ̃, de à gì kɛ bùsu kũ makũ Dikiri á Luda matɛn kpááwan.
13 Àsun gbɛ̃ dɛro.
14 Àsun zina kɛro.
15 Àsun kpãni oro.
16 Àsun yã dí á gbɛ̃dakearo.
17 Àsun á gbɛ̃dake ↄn ni dɛro. Àsun a nↄ ni dɛro ke a zĩkɛri gↄ̃gbɛ̃ ke nↄgbɛ̃ ke a zù ke a zaaki ke pↄ́ kũ à vĩnↄ pínki.
18 Gbɛ̃ sĩnda pínki legũpũtãnaa mà kũ kuru yĩsãmpanaao, ò legũpinaa è kũ túsukpɛo dↄ kpi musu, akũ vĩna ń kũ òtɛn lukaluka ò zɛ zã̀ dire. 19 Ò pì Musanɛ: Ǹ yã owɛrɛ n zĩda, óni ma. Ǹsun tó Luda yã owɛrɛro, de òsun gagaro yãi. 20 Musa pìńnɛ: Àsun tó vĩna á kũro, zaakũ kũ à á yↄ̃ à gwa yãin à sù, de àgↄ̃ a vĩna vĩ akũsↄ̃ àsun durunna kɛro yãi. 21 Ò zɛ zã̀ dire, akũ Musa nà túsukpɛ gègetee pìii, gu kũ Luda kun pìn.
Dikiri gbagbaki yã
22 Akũ Dikiri pì Musanɛ: Ǹ yã dí o Isarailanↄnɛ: A mà kũ á zĩdao lákũ ma yã òárɛ zaa musu nà. 23 Àsun tãna ke kɛ à namaro. Àsun andurufu ke wura pi tãnanↄ ũro. 24 À ma gbagbaki bo kũ ɛ̃o à sa oa kũ sãnↄ kũ zùnↄ, sa'opↄ kũ òdi ká tɛ́n à tɛ́ kũ kũ kɛnnakũkↄ̃o sa'opↄo. Gu kũ ma dìtɛárɛ àgↄ̃ ma sísin, mani su á kĩnaa mà arubarika daágu. 25 Tó átɛni ma gbagbaki pì bo kũ gbɛ̀ɛo, àsun bo kũ gbɛ̀ anaaoro, zaakũ tó a gã pɛ̀tɛa, a tò à gbã̀a lɛ̀n gwe. 26 Àsun ma gbagbaki bo à a didiki kɛro, de á pótompokɛ sún bo gbagbaki pìiaro yãi.