Luda yã takada kũ Bisã yão NAANAA 13

Abramu kɛ̃kↄ̃ana kũ Lutuo

1 Akũ Abramu bò Misila à sù Nɛgɛvi kũ a nanↄo kũ a aruzɛkɛnↄ pínki kũ Lutuo. 2 Abramu bi aruzɛkɛdemɛ, à pↄ́kãdenↄ vĩ dasi kũ andurufuuo kũ wuraao. 3 Bona Nɛgɛvi à sↄ̃̀sↄ̃ gu kũ guo ari à gɛ̀ɛ à kào Bɛtɛli, gu kũ à bùraa kàtɛn káaku Bɛtɛli dagura kũ Aio, 4 gu kũ à sa'oki bòn yã. Akũ à Dikiri sìsi gwe.

5 Lutu dìgↄ̃ tɛ́ kũ Abramuo lɛɛlɛ. À sãnↄ kũ zùnↄ kũ bizakutanↄ vĩ se. 6 Ń pↄ́kãdenↄn dasi, gu pìi sɛ̃̀ dí mↄ́ḿma ń pínkiro. A yã mɛ́ à tò oni fↄ̃ ògↄ̃ kú gu dokↄ̃nↄ lɛɛlɛ doro. 7 Akũ lɛ́kpakↄ̃a gɛ̃̀ Abramu pↄ́dãrinↄ kũ Lutu pↄ́dãrinↄ dagura. Zĩ kũ̀a sↄ̃ Kanaanↄ kũ Pɛrizinↄn kú bùsuu pìn. 8 Akũ Abramu pì Lutunɛ: À mana lɛ́kpakↄ̃a gↄ̃ kú ó daguraro, ke ma pↄ́dãrinↄ kũ n pↄ́dãrinↄ dagura, zaakũ danɛnↄn ó ũ. 9 Ǹ bùsu gwa da n arɛ pínki. Ò kɛ̃kↄ̃a. Tó n gɛ ↄzɛi, mani gɛ́ ↄplai. Tó n gɛ ↄplaimɛ sↄ̃, mani gɛ́ ↄzɛi. 10 Kũ Lutu gu gwà, à è Yoda guvutɛ pínki mↄtↄ vĩ manamana. Ari Dikiri gↄ̃ gɛ́ Sↄdↄmu kũ Gↄmↄrao kakatɛ, guvutɛ pì de lán Dikiri swadakoo bà, lán Misila bùsuu bà, ari à gɛ̀ɛ pɛ́ Zoaa. 11 Akũ Lutu Yoda guvutɛ sɛ̀ pínki. Ò kɛ̃̀kↄ̃a, akũ Lutu dà zɛ́n à tà ifãboki kpa. 12 Abramu gↄ̃̀ Kanaanↄ bùsun, Lutu sↄ̃ à kú Yoda guvutɛ wɛ̃tɛnↄ dagura. À bùraa kàtɛ Sↄdↄmu sarɛ. 13 Sↄdↄmudenↄ sↄ̃ ò vãni, durunnakɛri sànↄmɛ ń ũ Dikiri kĩnaa.

14 Lutu tanaa gbɛra Dikiri pì Abramunɛ: Gu kũ ń zɛ́n ǹ wɛ́ sɛ́ ǹ gugbãnduru kũ gɛ̀nↄmidↄkio kũ ifãbokio kũ ifãlɛtɛo gwa. 15 Zĩtɛ kũ n è pínki, ma kpàmma, anigↄ̃ de mↄkↄ̃n kũ n burinↄ pↄ́ ũ ari gↄrↄ sĩnda pínki. 16 Mani tó n burinↄ kɛ dasi lán bùsu'atɛ̃ bà. Tó gbɛ̃ke ni fↄ̃ à bùsu'atɛ̃ naro, de ani fↄ̃ à n burinↄ naro. 17 Ǹ futɛ ǹ gɛ̃ bùsuu pìn ǹ a gbã̀na kũ a yàasaao gwa, zaakũ ma kpàmmamɛ. 18 Abramu fùtɛ à gɛ̀ɛ à vùtɛ Mamare gbiri lí kũ ò kú Ɛblↄnunↄ sarɛ, akũ à Dikiri gbagbaki bò gwe.