Luda yã takada kũ Bisã yão NAANAA 15

Luda bàka kunna kũ Abramuo

1 Abire gbɛra Dikiri yã ò Abramunɛ wɛ́gupu'enaa gũn à pì:

Abramu! Ǹsun vĩna kɛro.

Makũmɛ n sɛ̃gbako ũ,

n láada nigↄ̃ zↄ̃kↄ̃ manamana.

2 Akũ Abramu pì: Dikiri Luda, bↄ́n ĩni ma gbaa? Má nɛ́ vĩro. Damasuku gbɛ̃ Ɛliɛza mɛ́ anigↄ̃ de ma bɛ túbibleri ũ. 3 Kũ ńdi ma gba nɛ́ro, ma bɛ zĩkɛri pì mɛ́ anigↄ̃ de ma túbibleri ũ. 4 Akũ Dikiri pìnɛ: Àpi mɛ́ anigↄ̃ de n túbibleri ũro. Nɛ́ kũ ani bo n wóplɛn mɛ́ anigↄ̃ de n túbibleri ũ. 5 Akũ à bò kãao bàai à pì: Ǹ musu gwa ǹ susunɛnↄ naro, tó ĩni fↄ̃. Lɛmɛ n burinↄ nigↄ̃ de lɛ. 6 À Dikiri náani kɛ̀, akũ Dikiri tò yã bò kãao nna a náani kũ à kɛ̀ yãi. 7 À pìnɛ dↄ: Dikirimɛ ma ũ, makũ mɛ́ ma n bo Uru, Kaladia bùsun, de mà bùsu díkĩna kpámma yãi. 8 Akũ Abramu pì: Dikiri Luda, deran manigↄ̃ dↄ̃ kũ anigↄ̃ de ma pↄ́ ũu? 9 À wèa à pì: Ǹ zùnunu wɛ̃̀ aakↄ̃ sɛ́ kũ blè wɛ̃̀ aakↄ̃o kũ sãkaro wɛ̃̀ aakↄ̃o kũ potɛ̃nɛtɛ̃nnao kũ lukulukuuo. 10 Akũ à pↄ́ pìnↄ sɛ̀ à sùo pínki à pàrapara à gògokↄ̃a, akũ à kàtɛ à ń arɛ dↄ̀dↄkↄ̃a, ama adi bãnↄ parapararo. 11 Kũ yumburukunↄ sù ò dìdi nↄ̀bↄↄ pìnↄa, akũ Abramu pɛ̀ḿma.

12 Kũ ifãntɛ̃ tɛn gɛ̃ kpɛ́n, i zↄ̃kↄ̃ Abramu kũ̀, akũ gusira zↄ̃kↄ̃ vĩnade dàala. 13 Akũ Dikiri pìnɛ: Ǹgↄ̃ dↄ̃ kũ n burinↄ nigↄ̃ nibↄ ble bùsu kũ à de ń pↄ́ ũro gũn, onigↄ̃ zↄ̀ ble gwe, onigↄ̃ wɛ́ tãḿma ari wɛ̃̀ wàa pla. 14 Ama mani wari dↄ buri kũ òtɛn zↄ̀ bleńnɛa, n burinↄ ni bↄtɛ kũ aruzɛkɛ zↄ̃kↄ̃ↄo. 15 Mↄkↄ̃n sↄ̃, ĩnigↄ̃ aafiamɛ ari ǹ gɛ́ zĩ kũo, gbasa ǹ ká n dizinↄla oni n vĩ. 16 N nasionↄ mɛ́ oni ɛra ò su la, zaakũ Amↄrinↄ durunna dí papa kↄ̀ro.

17 Kũ ifãntɛ̃ gɛ̃̀ kpɛ́n, gu sì, akũ Abramu è kĩni kũ àtɛn túsukpɛ bo kũ sɛ̃̀tɛo tɛn gɛ̃ nↄ̀bↄ kũ à pàrapara pìnↄ dagura. 18 Zĩ birea Dikiri pì a bàka nigↄ̃ kú kũ Abramuo à pì: Mani bùsu díkĩna kpá n burinↄa zaa Misila bùsu lɛ́zɛki swai ari swada kũ òdi pi Yuflati, 19 bùsu kũ Keninↄn kun kũ Kenizinↄ kũ Kadamↄnunↄ 20 kũ Itinↄ kũ Pɛrizinↄ kũ Rɛfaimunↄ 21 kũ Amↄrinↄ kũ Kanaanↄ kũ Gigasinↄ kũ Yebusinↄo.