Luda yã takada kũ Bisã yão NAANAA 22

Isaaku kpana sa'opↄ ũ

1 Abire gbɛra Luda Ibrahĩ yↄ̃̀ à gwà à pìnɛ: Ibrahĩ! Akũ à wèa à pì: Makũ di! 2 Akũ Luda pìnɛ: Ǹ n nɛ́ mɛ̀n do kũ ń yei Isaaku sɛ́ ǹ gɛ́o Mↄria bùsun, ǹ sa'opↄ kũ òdi ká tɛ́n à tɛ́ kũ o kãao kpi kũ mani onnɛa. 3 Kũ à fùtɛ kↄnkↄkↄnkↄ, à gàarii yĩ̀ a zaakinɛ, akũ à a zĩkɛrinↄ sɛ̀ gbɛ̃nↄn pla kũ a nɛ́ Isaaku pìio. À sa'oyakaa pàra, akũ à dà zɛ́n, àtɛn gɛ́ gu kũ Luda ònɛn. 4 A gↄrↄ aakↄ̃de zĩ kũ à wɛ́ sɛ̀, à gu pìi è zãa. 5 Akũ à pì a zĩkɛri pìnↄnɛ: À gↄ̃ kũ zaakio la. Makũ kũ kɛfɛnna dio óni gɛ́ arɛ ò donyĩ kɛ Ludanɛ, óni ɛra ò su ò á le la. 6 Ibrahĩ sa'oyakaa sɛ̀ à dì a nɛ́ pìinɛ, akũ à tɛ́ kũna kũ fɛ̃nɛo, òtɛn gɛ́ lɛɛlɛ. 7 Akũ Isaaku yã ò a denɛ à pì: Baa! À wèa à pì: Bↄ́mɛ nɛ́? Akũ à pìnɛ: Ó tɛ́ kũna kũ yàkaao, sãnɛ bↄ̀rↄ kũ óni ká tɛ́n à tɛ́ kũ kú mámɛɛ? 8 Akũ Ibrahĩ pì: Ma nɛ́, Luda mɛ́ ani sa'osã kpá. Akũ ò tɛ́kↄ̃i òtɛn gɛ́. 9 Kũ ò kà gu kũ Luda ònɛn, à sa'oki bò gwe à yàkaa kpàkpaala, akũ à a nɛ́ pìi yĩ̀ à dì yàkaa pìia sa'oki musu. 10 Kũ à fɛ̃nɛ sɛ̀ à ↄ bò de à a nɛ́ pìi kùtu kpá, 11 akũ Dikiri Malaika lɛ́ zùi zaa musu à pì: Ibrahĩ! Ibrahĩ! À wèa à pì: Makũ di! 12 Akũ à pì: Ǹsun ↄ na nɛ́ pìiaro ǹsun yãke kɛnɛro. Má dↄ̃ sà kũ ń ma vĩna vĩ, ńdi gímɛnɛ kũ n nɛ́ mɛ̀n dooro. 13 Ibrahĩ wɛ́ sɛ̀, akũ à sãkaroo è líwaka kà a bɛ̃nɛi. Akũ à gɛ̀ɛ à a kũ̀ à sa'opↄ kũ òdi ká tɛ́n à tɛ́ kũ òo a nɛ́ gɛ̃nɛ ũ. 14 Akũ à tↄ́ kpà gu pìinɛ Dikirinikpa, akũ òdigↄ̃ o ari kũ a gbãrao òdi pi: Dikiri ni kpá a kpi musu.

15 Dikiri Malaikaa ɛ̀ra à lɛ́ zù Ibrahĩi zaa musu dↄ 16 à pì: Makũ Dikiri ma la dà kũ ma kunnaao ma pì, lákũ n yã pìi kɛ̀ nà, ńdi gí kũ n nɛ́ mɛ̀n dooro, 17 mani arubarika dangu mà n buri karannɛ lán susunɛnↄ bà, onigↄ̃ dasi lán ísiralɛ bùsu'atɛ̃ bà. N burinↄ nigↄ̃ gbãna vĩ n ibɛrɛnↄa. 18 Mani arubarika da andunia buri sĩnda pínkigu n buri gãi, kũ n ma yã mà yãi.

19 Kũ Ibrahĩ ɛ̀ra à sù a zĩkɛrinↄ kĩnaa, ò fùtɛ ò tà Bɛsɛba, akũ à gↄrↄ pla kɛ̀ gwe.

20 Abire gbɛra ò ò Ibrahĩnɛ ò pì: N vĩ̀ni Nao nanↄ Milika nɛ́gↄ̃gbɛ̃nↄ ì. 21 A daudu tↄ́n Uzu. A dakũnanↄ tↄ́n dí: Buzu, Aramu de Kɛmuɛli, 22 Kɛsɛdi, Azo, Pilidasa, Yidilafa kũ Bɛtuɛlio. 23 Bɛtuɛli pì mɛ́ à Rɛbɛka ì. Nɛ́gↄ̃gbɛ̃ gbɛ̃nↄn sↄraakↄ̃ kũ Milika ì kũ Ibrahĩ vĩ̀ni Naon gwe. 24 A nↄ danyĩ Ruma nɛ́nↄ tↄ́n dí: Teba, Gaamu, Tasa kũ Maakao.