Luda yã takada kũ Bisã yão EBERUNƆ 7

Sa'oriki Mɛlɛkizɛdɛki

1 Mɛlɛkizɛdɛkimɛ Salɛmu kína ũ yã, Luda Musude sa'oriimɛ. Gↄrↄ kũ Ibrahĩ zĩ̀i blè kínanↄa àtɛn su, akũ Mɛlɛkizɛdɛki gɛ̀ɛ à dàalɛ, à sa mana ònɛ, 2 akũ Ibrahĩ aruzɛkɛ kũ àtɛn suo pínki kuride kpàa. Mɛlɛkizɛdɛki tↄ́ pìi pì, yãzɛde kína. Abire gbɛra Salɛmu kína bire pì, aafia kína. 3 À de kũ dao kũ dizinↄ vĩro, a wɛ̃̀ndi naana ke mìdɛna vĩro. À bò lán Luda Nɛ́ bàmɛ, sa'oriin a ũ gↄrↄ sĩnda pínki.

4 À gwa lákũ à zↄ̃kↄ̃ nà. Ó dizi káaku Ibrahĩ aruzɛkɛ kũ à sɛ̀tɛ zĩ̀lan kuride kpàa. 5 Musa doka dìtɛ Levi buri kũ ò de sa'ori ũnↄnɛ, ò pↄ́ kuride sí ń Isaraila dakenↄa, bee kũ ń Ibrahĩ burikɛo. 6 Mɛlɛkizɛdɛki bi Levi burinlo. Bee kũ abireo à Ibrahĩ pↄ́nↄ kuride sì, à sa mana ò Ibrahĩ kũ Luda lɛ́ sɛ̀nɛɛnɛ. 7 Sikaa sari gbɛ̃ kũ à sa mana ò gbɛ̃nɛ zↄ̃kↄ̃ de gbɛ̃ kũ à sa mana ònɛla. 8 Sa'ori kũ òdi pↄ́ kuride sí pìnↄ bi gbɛ̃ kũ òdi ganↄmɛ. Mɛlɛkizɛdɛki sↄ̃, gbɛ̃ kũ ò pì àdigↄ̃ kun gↄrↄ sĩnda pínkin a ũ. 9-10 Gↄrↄ kũ Mɛlɛkizɛdɛki gɛ̀ɛ à dà Ibrahĩlɛ, odi Levi i kↄ̀ro, à kú a dizi de Ibrahĩ wógbammɛ. Abire yãi oni fↄ̃ ò pi sé, gↄrↄ kũ Ibrahĩ pↄ́ kuride pìi kpà, Levi buri kũ òdi pↄ́ kuride kpáḿmanↄ mɛ́ ò kpà.

Yesu de lán Mɛlɛkizɛdɛki bà

11 Levi buri sa'orii pìnↄmɛ doka kũ Musa kpà Isarailanↄa zĩni ũ. Tó oni fↄ̃ ò tó gbɛ̃nↄ gↄ̃ papana, onigↄ̃ sa'ori pãnde ni vĩ lán Mɛlɛkizɛdɛki bà doro, sé Haruna buri sa'ori gã̀a. 12 Tó sa'orinↄ lìtɛ, séde doka litɛ. 13 Gbɛ̃ kũ ò yã birenↄ ò a musu bi Isaraila buri kũ a gbɛ̃ke dí sa'ona zĩ kɛ zikiromɛ. 14 Zaakũ ó dↄ̃ sãnsãn kũ ó Dikiri bò Yuda buri gũmmɛ. Ódi ma kũ Musa sa'ona yã ò buri pìi musuro. 15 Yã kũ yã pì wɛ́ bòn dí: Sa'ori pãnde bò lán Mɛlɛkizɛdɛki bà. 16 A gↄ̃na sa'ori ũ bi doka ke burikɛ yãnlo. A wɛ̃̀ndi kũ àdi lákaro gbãna yãimɛ. 17 Zaakũ ò pì:

Ĩnigↄ̃ de sa'ori ũ gↄrↄ sĩnda pínki Mɛlɛkizɛdɛki gã̀n.

18 Ò doka kũ à kun yã pìi kpà kpado, kũ à gbãnaro, akũsↄ̃ à kun pↄ́ke ũro. 19 Zaakũ doka pì dí tó gbɛ̃ke gↄ̃̀ papanaro. Akũ tãmaa kũ à sã̀na zɛ́ bòwɛrɛ, kũ o nao Ludai.

20 Abire gbɛra Luda dí abirekũ kɛ ladanaa sariro. Gbɛ̃ kparanↄ gↄ̃̀ sa'orinↄ ũ ladanaa sarimɛ, 21 ama Yesu gↄ̃̀ sa'ori ũ kũ ladanaao, kũ Luda pìnɛ:

Dikiri la dà ani lɛ́ sukparo,

à pì anigↄ̃ de sa'ori ũ gↄrↄ sĩnda pínki.

22 Ladanaa pì yãi Yesumɛ zɛnkpɛkɛ ũ kũ Luda bàka kunna kũńwo dufu de a zĩla. 23 Abire gbɛra sa'orinↄn dasi yã, zaakũ ga dì tó ògↄ̃ kú ń zĩ gũn gↄrↄ sĩnda pínkiro. 24 Ama kũ Yesu kun gↄrↄ sĩnda pínki yãi, a sa'orikɛnaa gɛ̃nɛblena vĩro. 25 Abire yãi ani fↄ̃ à gbɛ̃ kũ òdi na Ludai kũ a gbãnaonↄ sura ba mámmam, zaakũ à kun gↄrↄ sĩnda pínki de àgↄ̃ kútɛ kɛńnɛ Ludanɛ.

26 Sa'oriki bire taka mɛ́ à kↄ̃ sì kũoo. A kunna adona. À yã vãni ke gbãsĩ vĩro. Luda a kɛ̃̀kↄ̃a kũ durunnakɛrinↄ, à a sɛ̀ à tào musu ari a kĩnaa. 27 A bàka kú kũ sa'ona lákũ gu dìgↄ̃ dↄ nào lán sa'oriki kparanↄ bàro. Gbɛ̃ pìnↄ dì sa o ń zĩda durunnanↄ yãi kũ ń gbɛ̃nↄ pↄ́nↄ dↄ. Àkãa sↄ̃, à ò gɛ̃̀n domɛ, kũ à a zĩda kpà. 28 Musa doka dì gbɛ̃nↄ ká sa'orikinↄ ũ ń gbãnasarikɛ gũmmɛ, ama kũ Luda sì kũ a kunnaao doka pì ditɛnaa gbɛra, akũ à a Nɛ́ kũ à gↄ̃̀ papana ari gↄrↄ sĩnda pínki kàn.