30
Nɔɔ mwɛɛ ni Yinni Gusunɔ
u Isirelibɑ kuɑ
1 Gusunɔ, Isirelibɑn Yinni, u Yeremi sɔ̃ɔwɑ u nɛɛ, 2 ɑ gɑri yi kpuro yoruo tireru sɔɔ yi nɑ nun sɔ̃ɔwɑ. 3 Nɑ nɛɛ, tɔ̃ru gɑrɑ sisi tè sɔɔ kon nɛn tɔmbu Isirelibɑ kɑ Yudɑbɑ yɑkiɑmɑ yorun di, n kɑ bu wurɑmɑ ben temɔ. Kon de bu wurɑmɑ tem mɛ nɑ ben bɑɑbɑbɑ wɛ̃ sɔɔ, kpɑ mu ko begim.
4 Wee ye Yinni Gusunɔ u Yeremi sɔ̃ɔwɑ Isirelibɑ kɑ Yudɑbɑn sɔ̃. 5 U nɛɛ,
nɑ nɑndɑbun kuuki nɔɔmɔ.
Tɔmbɑ bɛrum soore,
bɑ ǹ bɔri yɛndu mɔ.
6 I bikio kpɑ i nɔ tɔn durɔ ù n dɑ yiire u mɑ.
Ǹ n mɛn nɑ, mbɑn sɔ̃nɑ nɑ tɔmbu wɑ
bɑ ben gɑ̃ɑnu nɛni
nge tɔn kurɔ wi u yiire u kĩ u mɑ.
Mbɑn sɔ̃nɑ be kpuron wuswɑɑ burisinɛ.
7 Annɑ ɑ wɑhɑlɑ bɑkɑ wɑ yɑ wee.
Tɔ̃ɔ te, tɔ̃ɔ kɔ̃surɑ.
Tɑ ǹ kɑ tɔ̃ru gɑru weenɛ.
Te sɔɔrɑ Isirelibɑ bɑ koo nɔni swɑ̃ɑ bɑkɑru wɑ.
Adɑmɑ kɑ mɛ, kon bu fɑɑbɑ ko.
8 Yen tɔ̃ɔ te, nɛ, Yinni Gusunɔ, nɛ wi nɑ wɔllu kɑ tem tɑkɑ kuɑ, kon ben sugu wunɑ sɑɑ ben wĩinun di n bɔɔku kpɑ n wɛ̃ɛ yi bɑ rɑɑ kɑ bu sɔri kɑsuku, n ben yoru kpeesiɑ. Bɑ ǹ mɑɑ tɔn tukobu sɑ̃ɑmɔ. 9 Nɛ, Gusunɔ ben Yinniwɑ bɑ koo sɑ̃, kɑ sere mɑɑ Dɑfidin kɔsire wi kon swĩi ben sinɑ gɔnɑɔ.
10 Bɛɛ Isirelibɑ, Yɑkɔbun bweseru,
bɛɛ be i sɑ̃ɑ nɛn sɔm kowobu,
i ku nɑndɑ, i ku diiri.
Wee, kon bɛɛ yɑkiɑmɑ sɑɑ tem tukum di mi i yoru dii,
bɛɛ kɑ bɛɛn bibun bweseru.
I ko i wurɑmɑ kpɑ i wɛ̃rɑ i n wɑ̃ɑ bɔri yɛndu sɔɔ.
Goo kun mɑɑ bɛɛ tɔ̃yɑ mɔ̀.
11 Domi ko nɑ n kɑ bɛɛ wɑ̃ɑ kpɑ n bɛɛ fɑɑbɑ ko.
Kon bwesenu kpuro kpeerɑsiɑ nìn mi i rɑɑ yɑrinɛ i wɑ̃ɑ.
Adɑmɑ bɛɛ, nɑ ǹ bɛɛ kpeerɑsiɑmɔ.
Kon bɛɛ sɛɛyɑsiɑwɑ nge mɛ n weenɛ.
Domi nɑ ǹ kpɛ̃ n bɛɛ deri n nɛɛ, i ǹ gɑ̃ɑnu kue.
12 Wee ye nɛ, Yinni Gusunɔ nɑ mɑɑ bɛɛ Yerusɑlɛmugibu sɔ̃ɔmɔ.
Nɑ nɛɛ, bɛɛn bɑrɑrɑ kpɑ̃,
bɛɛn mɛɛrɑ yɑ ǹ bɛkurɑmɔ.
13 Goo kun bɛɛn wɔnwɔndu mɔ̀ u bɛɛn mɛɛrɑ ye tim doke.
Tim gɑm sɑri mɛ mu koo bɛɛn mɛɛrɑ ye bɛkiɑ.
14 Be bɑ rɑɑ kɑ bɛɛ ɑrukɑwɑni bɔkuɑ, bɑ ǹ mɑɑ bɛɛ kɑsu,
domi nɑ bɛɛ sowɑ nge mɛ bɑ rɑ yibɛrɛ so.
Nɑ bɛɛ sɛɛyɑsiɑ kɑ dɑm bɛɛn durum dɑbinun sɔ̃.
15 Mbɑn sɔ̃nɑ i mɛɛrɑn weeweenu mɔ̀ ye i wɑ bɛɛn torɑnun sɔ̃.
I n yɛ̃ mɑ bɛɛn durum bɑkɑn sɔ̃nɑ nɑ bɛɛ yeni kuɑ.
16 Adɑmɑ be bɑ bɛɛ wɔri bɑ di, kon ben tii wɔriwɑ n di.
Be bɑ sɑ̃ɑ bɛɛn yibɛrɛbɑ kpuro
bɑ koo bu yoru mwɛɛriwɑ.
Be bɑ bɛɛn yɑ̃nu gurɑmɔ,
kon de bu mɑɑ ben tiin yɑ̃nu gurɑ.
17 Adɑmɑ bɛɛ, be bɑ rɑɑ mɔ̀ i kɑm kuɑ,
mɑ goo kun bɛɛn lɑɑkɑri mɔ̀,
kon bɛɛn mɛɛrɑn bosu bɛkiɑ.
Nɛ, Yinni Gusunɔwɑ nɑ yeni geruɑ.
18 Nɑ wure nɑ nɛɛ,
wee, kon bɛɛ Isirelibɑ Yɑkɔbun bweseru yɑrɑ yorun di,
kpɑ i wurɑ bɛɛn yɛnusɔ.
Kon bɛɛn yɛnusun wɔnwɔndu ko,
kpɑ n bɛɛn wuu bɑni gen bɑnsɔ
n bɛɛn sinɑ kpɑɑru seeyɑ n swĩi mi tɑ rɑɑ wɑ̃ɑ.
19 I ko i siɑrɑbun womusu ko kɑ nuku dobun kuuki.
Kon bɛɛ dɑbiɑsiɑ, i ǹ mɑɑ kɑɑrɑmɔ.
Kon de bu bɛɛ bɛɛrɛ wɛ̃, kpɑ bu ku bɛɛ gɛm.
20 I ko i n sɑ̃ɑwɑ nge yellu,
kpɑ i n dɑ bɛɛn mɛnnɔsu ko nɛn wuswɑɑɔ.
Kpɑ n be bɑ bɛɛ dɑm dɔremɔ kpuro sɛɛyɑsiɑ.
21 Bɛɛn turowɑ koo ko bɛɛn sunɔ.
Kpɑ n de u mɑn susimɑ,
domi goo kun kɑ̃kɔ u mɑn susi,
mɑ n kun mɔ nɑ nùn sokɑ.
Nɛ, Yinni Gusunɔwɑ nɑ yeni geruɑ.
22 Sɑɑ ye sɔɔrɑ i ko i n mɑɑ sɑ̃ɑ nɛn tɔmbu,
kpɑ n ko bɛɛn Yinni.
23 Wee, nɛ, Yinni Gusunɔn mɔru yɑ wee nge guru woo bɔkɔ,
kpɑ yu tɔn kɔ̃sobu wɔri.
24 Nɛn mɔru ye, yɑ ǹ suremɔ
mɑ n kun mɔ yɑ nɛn himbɑ yibiɑ.
Amɛn biru kpɑ yu bɛɛ yeeri.