1 Sedesiɑsi Yudɑbɑn sinɑ bokon bɑndun wɔ̃ɔ nɔɔbɑ nnɛse, yen suru wɔkuruse sɔɔrɑ Nɛbukɑnɛsɑɑ, Bɑbilonin sinɑ boko u Yerusɑlɛmu wɔrimɑ kɑ win tɑbu kowobu kpuro. Mɑ bɑ sɑnsɑni girɑ yen bɔkuɔ, mɑ bɑ kuku yenu kuɑ bɑ kɑ sikerenɑ. 2 Sedesiɑsin bɑndun wɔ̃ɔ wɔkurɑ tiɑsen suru nnɛse, yen sɔ̃ɔ nɔɔbɑ nnɛse sɔɔrɑ bɑ gbɑ̃rɑru yɑbɑ. 3 Sɑɑ yerɑ Bɑbilonin tɑbu sinɑmbu bɑ duɑ bɑ wuu ge tɑrusi gen kɔnnɔ wuu suunuguu giɑn di. Tɑbu sinɑm ben yĩsɑ wee, Nɛɛgɑli Sɑrɛsɛɛ, kɑ Sɑngɑɑ Nɛbu, kɑ Sɑɑsekimu, sinɑ bokon sɔm kowobun wirugii, kɑ mɑɑ Nɛɛgɑli Sɑrɛsɛɛ wi u sɑ̃ɑ dobo dobogibun wirugii, kɑ sere sinɑ bokon tɑbu sinɑm be bɑ tie.

4 Ye Sedesiɑsi, Yudɑbɑn sinɑ boko kɑ win tɑbu kowobu bɑ bu wɑ, yerɑ bɑ duki yɑrinɑ wɔ̃kuru bɑ yɑrɑ kɑ kɔnnɔ ge gɑ wɑ̃ɑ gbɑ̃rɑnu yirun bɑɑ sɔɔ sinɑ bokon dɑ̃ɑ gbɑɑrun bɔkuɔ wɔwɑn berɑ giɑ. 5 Adɑmɑ Bɑbilonin tɑbu kowo be, bɑ sinɑ boko Sedesiɑsi nɑɑ swĩi mɑ bɑ nùn nɑɑmwɛ Yerikon wɔwɑɔ. Yerɑ bɑ nùn mwɑ bɑ kɑ dɑ Bɑbilonin sinɑ bokon mi, Ribilɑɔ, Hɑmɑtin temɔ. Miyɑ u nùn siri. 6 Mɑ u derɑ bɑ Sedesiɑsin bibu kɑ win sinɑ ɑsɑkpɔbu sɑkirɑ Ribilɑ mi, win nɔni biru. 7 Yen biru u Sedesiɑsin tiin nɔni wɔwɑ mɑ u nùn bɔkuɑ kɑ sii gɑndun yɔni bɑ kɑ dɑ Bɑbiloniɔ.

8 Bɑbilonigii be, bɑ Yerusɑlɛmun sinɑ kpɑɑru kɑ yen yɛnusu dɔ̃ɔ mɛni, mɑ bɑ yen gbɑ̃rɑru sururɑ. 9 Yen biru Nɛbusɑrɑdɑ, kɔ̃sobun wirugii, u tɔn be bɑ tie Yerusɑlɛmuɔ kɑ be bɑ nùn tii wɛ̃ kɑ sere mɑɑ be bɑ tie tem mɛ sɔɔ gurɑ u kɑ doonɑ Bɑbiloniɔ. 10 Adɑmɑ u ben bwɛ̃ɛbwɛ̃ɛ be bɑ ǹ gɑ̃ɑnu mɔ deri tem mɛ sɔɔ mɑ u bu gbeɑ wɛ̃.

11 Mɑ Nɛbukɑnɛsɑɑ, Bɑbilonin sinɑ boko u Nɛbusɑrɑdɑ, kɔ̃sobun wirugii woodɑ wɛ̃ Yeremin sɔ̃ u nɛɛ, 12 ɑ nùn mɛɛrio kpɑ ɑ nùn kɔ̃su. A ku nùn kɔ̃sɑ gɑɑ kuɑ. Ye u nun sɔ̃ɔwɑ kpuro, ɑ koowo. 13 Mɑ Nɛbusɑrɑdɑ, kɔ̃sobun wirugii, kɑ Nɛbusɑsibɑni, sinɑ bokon sɔm kowobun wirugii, kɑ Nɛɛgɑli Sɑrɛsɛɛ, dobo dobogibun wirugii, kɑ sere sinɑ bokon tɑbu sinɑmbu kpuro, 14 bɑ gɔrɑ bu Yeremi yɑrɑmɑ pirisɔm dirun di, kpɑ bu kɑ nùn dɑ bu Gedɑliɑ, Akikɑmun bii, Sɑfɑnin debubu nɔmu sɔndiɑ. Wiyɑ u kɑ nùn dɑ win yɛnuɔ. Nge mɛyɑ Yeremi u kɑ yɑrɑ u wɑ̃ɑ kɑ Yudɑ be bɑ tie.

15 Sɑɑ yè sɔɔ Yeremi u wɑ̃ɑ pirisɔm sɔɔ, Yinni Gusunɔ u nùn sɔ̃ɔwɑ u nɛɛ, 16 ɑ doo ɑ Ebɛdi Mɛlɛki, Etiopigii wi sɔ̃ ɑ nɛɛ, nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ rɑɑ geruɑ nɑ nɛɛ, kɔ̃sɑ yɑ koo wuu ge deemɑ, n ǹ mɔ geɑ. Tɛ̃, kon de kɔ̃sɑ ye, yu tunumɑ. Ye kpurowɑ yɑ koo koorɑ win nɔni biru. 17 Adɑmɑ yen tɔ̃ɔ te, kon nùn yɑkiɑ. Bèn bɛrum u mɔ̀ mi, bɑ ǹ nùn nɔmɑ turi. 18 Nɑ ǹ derimɔ bu nùn go. Kon win wɑ̃ɑru yɑkiɑ, domi u mɑn nɑɑnɛ kuɑ. Nɛ, Yinni Gusunɔwɑ nɑ yeni geruɑ.