47
Gɑri yi Yinni Gusunɔ u geruɑ
Filisitibɑn sɔ̃
1 Egibitin sinɑ boko u sere Gɑsɑ tɑbu wɔri, wee ye Yinni Gusunɔ u Yeremi sɔ̃ɔwɑ Filisitibɑn sɔ̃. U nɛɛ,
2 wee, yibɛrɛbɑ bɑ wee sɑɑ sɔ̃ɔ yɛ̃sɑn nɔm geu giɑn di,
bɑ tɛriɑmɔ tem sɔɔ nge dɑɑ te tɑ nim yibumɔ tɑ bɔ̃ɔ sɑrɑmɔ.
Mɑ bɑ tem kɑ ye yɑ wɑ̃ɑ mɛ sɔɔ wukiri
kɑ mɛn wusu kɑ tɔn be bɑ wɑ̃ɑ si kpuro sɔɔ.
Tɔn be kpuro bɑ kuuki mɔ̀, bɑ weeweenu mɔ̀.
3 Dumin nɑɑ dɑmu dɑmusu kɑ tɑbu kɛkɛbɑn uruubɑn wɔkinu nɔɔrɑmɔ.
Bɑɑbɑbɑ bɑ ben bibu derimɔ,
domi ben gɔmɑ kpuro dwiiyɑ.
4 Sɑɑ yɑ tunumɑ yè sɔɔ bɑ koo Filisitibɑ kpuro go,
kɑ tɔn be bɑ koo kpĩ bu Tirigibu, kɑ Sidonigibu somi,
kɑ tɔn be bɑ tie bɑ wɑ̃ɑ tem bure te bɑ mɔ̀ Kɑfitoriɔ.
5 Gɑsɑgibu bɑ wɑ̃ɑwɑ nuku sɑnkirɑnu sɔɔ
bɑ wii pɔɔnu pote.
Asikɑlonigibu kɑ be bɑ wɑ̃ɑ wɔwɑɔ bɑ nɔɔ mɑɑri.
Bɛɛ be i tie, sere sɑɑ yerɑ̀ i ko i n wɑ̃ɑ
i n tii muririmɔ i kɑ gɔɔ swĩ.
6 Wee, i gerumɔ i mɔ̀,
Yinni Gusunɔn tɑkobi, dommɑ kɑɑ wɛ̃rɑ.
A wuro wunɛn kɑrɑrɔ,
kpɑ ɑ n wɑ̃ɑ mi sɛ̃ɛ.
7 Amɔnɑ yɑ koo kɑ wɛ̃rɑ.
Domi Yinni Gusunɔn tiiwɑ u ye woodɑ wɛ̃,
yu kɑ Asikɑlonigibu kɑ nim wɔ̃kun goonugibu wɔri.