Luda yã takada kũ Bisã yão MAAKU 11

Gbãnakɛkpana Yesui Yurusalɛmu

(Mat 21:1-11, Luk 19:28-40, Yuh 12:12-19)

1 Kũ ò kà kãni kũ Yurusalɛmuo, ò kà Bɛtɛfage kũ Bɛtani kũ à kú Kùkpɛ sĩ̀sĩgɛrɛɛiio, akũ Yesu a ìbanↄ zĩ̀ gbɛ̃nↄn pla 2 à pìńnɛ: À gɛ́ lakutu kũ à kátɛ á arɛ dire gũn. Tó a gɛ̃ gↄ̃̀nↄ, áni zaakinɛ bↄ̀rↄ e bàdↄna gwe, gbɛ̃ke dí dia zikiro. À poro à suo. 3 Tó ò á lá ò pì, bↄ́n átɛn kɛ gwe, à pi Dikiri mɛ́ à yei, ani ɛra à suo tera. 4 Akũ ò gɛ̀ɛ ò zaaki è bàdↄna kpɛ́lɛlɛ bàai. Kũ òtɛn poro, 5 akũ gbɛ̃ kũ ò zɛ gwenↄ ń lá ò pì: Bↄ́n átɛn kɛ kũ zaaki pìio kũ átɛn poroo? 6 ò wèḿma lákũ Yesu òńnɛ nà, akũ ò ń tó ò táo. 7 Ò sù kũ zaaki pìio Yesunɛ, ò ń utanↄ kpàtɛa, akũ Yesu dìa. 8 Gbɛ̃nↄ tɛni ń utanↄ kpátɛ zɛ́ gũn dasi, gbɛ̃kenↄ tɛn lánↄ zↄ̃ sɛ̃̀n òtɛn kpátɛ dↄ. 9 Gbɛ̃ kũ ò tɛ́ arɛnↄ kũ gbɛ̃ kũ ò tɛ́ kpɛnↄ tɛn wiki lɛ́ òtɛn pi:

Ǹ gbãna kɛ!

Arubarikaden gbɛ̃ kũ àtɛn su kũ Dikiri tↄ́o ũ.

10 Luda arubarika da ó dizi Dauda kpata kũ àtɛn bo gupuraan.

Ò gbãnakɛ kpái ari ludambɛ.

11 Kũ Yesu kà Yurusalɛmu, à gɛ̃̀ Luda ↄnn, akũ à pↄ́ sĩnda pínki gwà à lìkai. Kũ ifãntɛ̃ tɛn gɛ̃ kpɛ́n yãi, akũ à bò à gɛ̀ɛ Bɛtani kũ a ìba gbɛ̃nↄn kuri awɛɛplanↄ.

Yesu láaribona kaka lía kũ a kunna Luda ↄnnwo

(Mat 21:12-22, Luk 19:45-48, Yuh 2:13-22)

12 Kũ gu dↄ̀, ò bò Bɛtani, akũ nà tɛn Yesu dɛ. 13 À kaka lí è zã̀ dire a lá kù. Akũ à gɛ̀ɛ gwa ke tó à nɛ́ vĩ. Kũ à kà gwe, adi pↄ́ke lero, sé a lánↄ, zaakũ kaka gↄrↄ dí ká kↄ̀ro. 14 Akũ à pì lí pìinɛ: Gbɛ̃ke ni n nɛ́ ble ziki doro. A ìbanↄ yã pìi mà.

15 Kũ ò kà Yurusalɛmu, Yesu gɛ̃̀ Luda ↄnn, akũ à pɛ̀ ɛtɛblerinↄa kũ lagatarinↄ à ń bↄ́tɛ. À ↄgↄlilinkɛrinↄ teburunↄ kũ potɛ̃nɛyarinↄ gbànↄ yĩ̀pa à kↄ̀tɛńnɛ. 16 Adi we gbɛ̃ke a aso sɛ̀ à gɛ̃̀tɛo Luda ↄnnlo. 17 Akũ à yã dà gbɛ̃nↄnɛ à pì: Ò kɛ̃̀ Luda yãn ò pì: Ma kpɛ́ nigↄ̃ de aduakɛkpɛ ũ buri sĩnda pínkinɛ, akũ a kɛ̀ gbɛ̃blerinↄ tò ũ. 18 Sa'orikinↄ kũ ludayãdannɛrinↄ yã pìi mà, akũ òtɛn zɛ́ wɛtɛ ò a dɛ. Òtɛn vĩna kɛnɛ, zaakũ a yãdannɛnaa bò gbɛ̃ sĩnda pínki sarɛ. 19 Kũ ↄkↄsi kɛ̀, akũ Yesu kũ a ìbanↄ bↄ̀tɛ wɛ̃tɛ pìi gũn.

20 Kũ gu dↄ̀, òtɛn gɛ̃tɛ, akũ ò kaka lí pìi è à kori kɛ̀ kũ a zĩnio. 21 Akũ à yã dↄ̀ Pitan, akũ à pì Yesunɛ: Rabi, ǹ kaka lí kũ n láari bòa gwa, à kori kũ̀. 22 Yesu wèḿma à bè: Àgↄ̃ Luda náani vĩ. 23 Yãpuran matɛn oárɛ, tó gbɛ̃ ò kpi dínɛ à futɛ à a zĩda sɛ́ à zu sɛ̀bɛn, tó ádi sika kɛ a nɛ̀sɛɛ gũnlo, tó à náani vĩ kũ yã kũ à òo pì ni kɛ, ani kɛnɛmɛ. 24 Abire yãi matɛn oárɛ, tó átɛn adua kɛ, yã kũ a a wɛ́ kɛ̀ pínki, à ditɛ à gĩnakɛ a lè kↄ̀, áni le sↄ̃. 25 Tó a futɛ átɛn adua kɛ, tó á nɛ̀sɛ vãni kũna kũ gbɛ̃keo, à kɛ̃nɛ, de á De kũ à kú musu á durunnanↄ kɛ̃árɛ dↄ. 26 Tó ádi gbɛ̃nↄ kɛ̃ sↄ̃ro, á De kũ à kú musu ni á durunnanↄ kɛ̃árɛ sero.

Yesu gbɛkana a ikooi

(Mat 21:23-27, Luk 20:1-8)

27 Akũ ò kà Yurusalɛmu. Lákũ Yesu tɛn kure Luda ↄnn nà, sa'orikinↄ kũ ludayãdannɛrinↄ kũ gbɛ̃ zↄ̃kↄ̃nↄ sù 28 ò a la ò pì: Iko kpaten ntɛn yã dínↄ kɛoo? Dí mɛ́ à n gba yã pì kɛna ikoo? 29 Akũ Yesu wèḿma à pì: Yã mɛ̀n don mani gbɛkaáwa. À wema, mani iko kũ matɛn yã dínↄ kɛo oárɛ. 30 À omɛnɛ. Yahaya gbɛ̃nↄ da'itɛkɛnaa bò Luda kĩnaan yá, ke bisãsiri kĩnaamɛ? 31 Akũ ò yã gↄ̃̀gↄ̃ ò pì: Tó o pì Luda kĩnaamɛ, ani ó lá bↄ́yãin ódi Yahaya yã síroo? 32 Tó o pì bisãsiri kĩnaamɛ sↄ̃, tↄ̀! Ò gbɛ̃nↄ vĩna vĩ, zaakũ gbɛ̃ sĩnda pínki Yahaya annabikɛ sì. 33 Akũ ò wè Yesua ò pì: Ó dↄ̃ro. Akũ Yesu pìńnɛ: Ɛ̃hɛ̃ makũ se, mani iko kũ matɛn yã dínↄ kɛo oárɛro.

MAAKU
<
11
>