1 Vĩnla dikpɛ kũ Burodi Futɛnasari dikpɛo gↄ̃̀ gↄrↄ pla, akũ sa'orikinↄ kũ ludayãdannɛrinↄ tɛn zɛ́ wɛtɛ kũ ↄ̃ndↄ̃o ò Yesu kũ ò dɛ. 2 Zaakũ ò pì: Òsun kɛ dikpɛ zĩro, de gbɛ̃nↄ sún zuka káro yãi.

3 Gↄrↄ kũ Yesu kú Bɛtani, Simↄ kusu bɛa, àtɛn pↄ́ ble gɛngɛsɛkɛna, akũ nↄgbɛ̃ ke nài a lo fítinna kũ nísi gbĩ nna buri mana ↄgↄde kú a gũn kũna. Akũ à lo pì wakaa ɛ̀, à nísi pìi kù Yesu mìia. 4 Gbɛ̃kenↄ kú gwe, ń pↄ fùtɛ ò pì: Bↄ́mɛ nísi pì laalasekɛna ũu? 5 Oni fↄ̃ ò yía de andurufu wàa do kpɛ́ basↄↄrola ò a ↄgↄ kpá takasidenↄa. Akũ ò lɛ́fↄtↄ kpà nↄgbɛ̃ pìii. 6 Akũ Yesu pì: À a tó gwe. Bↄ́ yã mɛ́ à tò átɛn wari dↄaa? À zĩ mana kɛ̀mɛnɛmɛ. 7 Takasidenↄ nigↄ̃ kú kãáo gↄrↄ sĩnda pínki, gↄrↄ kũ á yei, áni fↄ̃ à kɛńnɛ. Makũ sↄ̃ manigↄ̃ kú kãáo gↄrↄ sĩnda pínkiro. 8 À kɛ̀ a gbãna lɛ́mmɛ, à gĩnakɛ à nísi kù ma mɛ̀ɛa de à ma gɛ̀ kɛomɛ. 9 Yãpuran matɛn oárɛ, gu kũ òtɛni ma baaru nna waazi kɛn andunia gũn pínki, onigↄ̃ yã kũ nↄgbɛ̃ pìi kɛ̀ o a dↄngu yãi.

10 Abire gbɛra gbɛ̃nↄn kuri awɛɛplanↄ do kũ òdi pinɛ Yudasi Isikariↄti gɛ̀ɛ sa'orikinↄ kĩnaa de à Yesu kpáḿma. 11 Kũ ò a yã mà, akũ ń pↄ kɛ̀ nna, akũ ò lɛ́ sɛ̀nɛ kũ oni ↄgↄ kpáa. Akũ àtɛn zɛ́ wɛtɛ à Yesu kpáḿma.

12 Burodi Futɛnasari dikpɛgↄrↄ káaku zĩ kũ òdi Vĩnla sãnɛ bↄ̀rↄↄ kùtu kpá, Yesu ìbanↄ a là ò pìnɛ: Mán ń ye ò gɛ́ kɛkɛnnɛ ǹ Vĩnla pↄ́ blenn? 13 Yesu gbɛ̃nↄn pla zĩ̀ a ìbanↄ tɛ́ à pìńnɛ: À gɛ́ wɛ̃tɛ gũn. Gↄ̃gbɛ̃ ke ni daálɛ à í sɛna kũ loo. À tɛ́i 14 ari ↄn kũ ani gɛ̃n. À o ↄn pì bedenɛ, dannɛri pì mán a kipaki kunn, gu kũ áni Vĩnla pↄ́ blen kũ a ìbanↄo? 15 Ani kpɛ́ musu zↄ̃kↄ̃ kũ ò kɛ̀kɛ mↄárɛ. À pↄ́bleyã kɛkɛwɛrɛ gwe. 16 Yesu ìbaa pìnↄ dà zɛ́n, ò gɛ̃̀ wɛ̃tɛ pìi gũn, akũ ò lè lákũ à òńnɛ nà. Akũ ò Vĩnla pↄ́bleyã kɛ̀kɛ gwe.

17 Kũ ↄkↄsi kɛ̀, akũ Yesu gɛ̀ɛ gwe kũ a gbɛ̃nↄn kuri awɛɛpla pìnↄ. 18 Kũ ò gɛngɛsɛkɛna òtɛn pↄ́ ble, akũ à pì: Yãpuran matɛn oárɛ, á gbɛ̃ mɛ̀n do kũ ótɛn pↄ́ ble lɛɛlɛ ni ma kpáḿma. 19 Ń nɛ̀sɛɛ yàka, akũ òtɛni a la dodo: Asa makũroo? 20 Akũ à pìńnɛ: Á gbɛ̃nↄn kuri awɛɛplanↄ do kũ ótɛn pↄ́ ble ta gũn lɛɛlɛmɛ. 21 Bisãsiri Nɛ́ ni kpágui lákũ a kɛ̃na a yã musu nà, ama waiyoo gbɛ̃ kũ ani Bisãsiri Nɛ́ kpáḿma pìi. Ani kɛ sã̀na adenɛ tó odi a i yãro.

22 Kũ òtɛn pↄ́ ble, Yesu burodii sɛ̀ à arubarikaa dàn, akũ à lìkↄ̃rɛ à kpà a ìbanↄa à pì: À sí, ma mɛ̀ɛn dí. 23 Akũ à toko sɛ̀ à arubarikaa dàn à kpàḿma, akũ ò mì ń pínki. 24 Akũ à pìńnɛ: Ma arun yɛ̀, Luda bàka kunna kũ gbɛ̃ dasinↄ aru ũ kũ ani bↄtɛma. 25 Yãpuran matɛn oárɛ, mani geepi'i mi gĩa doro ari kpata kũ à bò Luda kĩnaa gɛ́ boo gupuraa, gbasa mà a dufu mi sà. 26 Kũ ò lɛ̀ɛ sì, akũ ò bↄ̀tɛ ò gɛ̀ɛ Kùkpɛ sĩ̀sĩgɛrɛɛi.

27 Akũ Yesu pìńnɛ: Á pínki áni fuma, zaakũ ò kɛ̃̀ Luda yãn ò pì: Mani sãdãri lɛ́, sãnↄ ni fãkↄ̃a. 28 Ama ma vunaa gbɛra mani doárɛ arɛ gɛna Galili. 29 Akũ Pita pìnɛ: Bee tó ò fù ń pínki, mani furo. 30 Akũ Yesu pìnɛ: Yãpuran matɛn onnɛ, gwãaniala ari ko gↄ̃ gɛ́ lɛ́ zu gɛ̃̀n pla, ĩni ledi kpámai gɛ̃̀n aakↄ̃. 31 Akũ Pita pì mámmam: Bee tó mani sù mà ga kũnwo, mani ledi kpányĩ zikiro. Akũ ò ò lɛ se ń pínki.

32 Ò kà gu kũ òdi pi Gɛtɛsɛmani, akũ Yesu pì a ìbanↄnɛ: À vutɛ la ari mà gɛ́ adua kɛ. 33 À Pita kũ Yamisio kũ Yuhanao sɛ̀ à gɛ̀ɛ kũńwo. Pↄsira a kũ̀ a nɛ̀sɛyↄkↄ sì. 34 Akũ à pìńnɛ: Ma pↄ sira kũ̀ manamana ari ga lɛ́i. À zɛ la à ibɛ̃nɛ kɛ. 35 Kũ à gɛ̀ɛ arɛ fíti, akũ à kùtɛ zĩtɛ à adua kɛ̀ tó ani sí kɛ, gↄrↄ zakaa pì gɛ̃tɛala. 36 À pì: Baa, ma De, pↄ́ sĩnda pínki dì sí kɛnnɛ. Ǹ toko'i dí síma, ama adi kɛ yã kũ má yeinlo, sé kũ ń yeii. 37 Akũ à ɛ̀ra à sù à a ìbanↄ lè, òtɛn i o. Akũ à pì Pitanɛ: Simↄ, ntɛni i on yá? Ńdi fↄ̃ n ibɛ̃nɛ kɛ̀ bee awa doroo? 38 À ibɛ̃nɛ kɛ àgↄ̃ adua kɛ de àsun fu yↄ̃ogwanaaaro yãi. Nini yei, ama mɛ̀ busɛ. 39 À ɛ̀ra à gɛ̀ɛ adua kɛ, akũ à yã dokↄ̃nↄ pìi ò dↄ. 40 Kũ à ɛ̀ra à sù à ń lé, òtɛn i o, zaakũ òtɛn idekũ dɛdɛ. Ò dↄ̃ deran oni yã onɛ nàro. 41 A suna gɛ̃̀n aakↄ̃deo à pìńnɛ: Átɛn i o átɛn kámma bo ari teran yá? À mↄ̀ lɛ. Gↄrↄ kà sà. À gwa, ò Bisãsiri Nɛ́ kpà durunnakɛrinↄa. 42 À futɛ ò gɛ́. Gbɛ̃ kũ à ma kpaḿma pì tɛn su fá.

43 Kũ à kpɛ́ àtɛn yã pì o, akũ Yudasi a ìba gbɛ̃nↄn kuri awɛɛplanↄ doke sù kũ pario, ò fɛ̃nɛdanↄ kũkũna kũ gònↄ. Ò bò sa'orikinↄ kũ ludayãdannɛrinↄ kũ gbɛ̃ zↄ̃kↄ̃nↄ kĩnaa. 44 Bonkpɛde pì sↄ̃ à sèedaa òńnɛ à pì: Gbɛ̃ kũ mani lɛ́ pɛ́a, àkũn dí. À a kũ gbãna à tá kãao. 45 Akũ à mìi pɛ̀ Yesua gↄ̃̀nↄ à pìnɛ: Rabi! Akũ à lɛ́ pɛ̀a. 46 Akũ ò ↄ pɛ̀tɛ Yesua ò a kũ̀ gíngin. 47 Akũ gbɛ̃ kũ ò zɛna gwenↄ doke a fɛ̃nɛda wòto à sa'oriki zĩ̀ri ke lɛ̀o à a sã gò. 48 Akũ Yesu pìńnɛ: Kpãni wɛ́dewɛn ma ũ kũ a su à ma kũ kũ fɛ̃nɛdanↄ kũ gònↄo yá? 49 Madìgↄ̃ kú kãáo Luda ↄnn lákũ gu dìgↄ̃ dↄ nà, madìgↄ̃ yã daárɛ, ádi ma kũro. Ama sé yã kũ ò kɛ̃̀ Luda yãn papa. 50 Akũ a ìbanↄ bàa lɛ̀ ń pínki ò a tòn.

51 Kɛfɛnna ke tɛ́i à pↄ́ke danaro, bizatarun à kùala. Kũ ò a kũ̀, 52 akũ à bò ń ↄĩ à a biza tòńnɛ gwe à bàa sì à tà punsi.

53 Akũ ò gɛ̀ɛ kũ Yesuo sa'oriki zↄ̃kↄ̃ bɛa. Sa'orikinↄ kũ gbɛ̃ zↄ̃kↄ̃nↄ kũ ludayãdannɛrinↄ kàkara gwe ń pínki. 54 Pita tɛ́ a kpɛ zã̀ dire ari à gɛ̀ɛ à gɛ̃̀ sa'oriki zↄ̃kↄ̃ bɛ ↄnn. À vùtɛ gwe àtɛn tɛ́ kpákpa kũ dogarinↄ lɛɛlɛ. 55 Sa'orikinↄ kũ Yuda yãkpatɛkɛrinↄ ń pínki tɛn sèeda wɛtɛ Yesui ò a dɛ, akũ odi a lero. 56 Ò ɛ́kɛyã dìdia dasi, ama ń yãke dí kↄ̃ sɛ́ro. 57 Akũ gbɛ̃kenↄ fùtɛ ò ɛ́kɛyã dìdia ò pì: 58 O mà à pì áni Luda kpɛ́ kũ bisãsiri bò wí áni a pãnde bo gↄrↄ aakↄ̃ dagura kũ bisãsiri dí boro. 59 Bee kũ abireo ń yã dí kↄ̃ sɛ́ro. 60 Akũ sa'oriki zↄ̃kↄ̃ↄ fùtɛ à zɛ̀ ń arɛ à Yesu gbɛ̀ka: Ń yãke vĩ ǹ weḿmaroo? Yã kũ òtɛn didimma dí de deraa? 61 Yesu yĩtɛ kpɛ̃n adi yãke wearo, akũ sa'oriki zↄ̃kↄ̃ↄ pìi ɛ̀ra à a gbɛ̀ka: Mↄkↄ̃n Arumasihu, Luda arubarikade Nɛ́ ũ yá? 62 Akũ Yesu pì: Makũmɛ a ũ. Áni Bisãsiri Nɛ́ e vutɛna Gbãnasĩndapinkide ↄplai, akũsↄ̃ áni a suna e ludambɛ lukun. 63 Akũ sa'oriki zↄ̃kↄ̃ↄ pì a utanↄ gà à kɛ̃̀ à pì: À kɛ̀ dera ótɛn sèedade pãnde kenↄ wɛtɛ dↄↄ? 64 A mà lákũ à dↄkɛ̀ kũ Ludao nà. Yã kpaten a zɛo teraa? Akũ ò yã dàala ń pínki ò pì ò a dɛ. 65 Akũ gbɛ̃kenↄ fùtɛ ò lɛ́'i kàa. Akũ ò pↄ́ yĩ̀nɛ a ãnnwa, òtɛni a lɛ́lɛ kũ okũo òtɛn pinɛ: Ǹ annabikɛyã o ǹ gbɛ̃ kũ à n lɛ o. Akũ dogarinↄ a kũ̀ ò a sãn kɛ̀kɛ.

66 Pita kú ↄnn zĩtɛ, akũ sa'oriki zↄ̃kↄ̃ↄ zↄ̀nↄkparenↄ doke sù gwe. 67 Kũ à Pita è àtɛn tɛ́ kpákpa, akũ à wɛ́ dìa à pìnɛ: Mↄkↄ̃n sↄ̃ ndìgↄ̃ kú lɛɛlɛ kũ Yesu Nazɛrao. 68 Akũ à ledi kpà à pì: Má a dↄ̃ro, mádi yã kũ ntɛni o dↄ̀rↄ dↄ̃ro. Akũ à fùtɛ à gɛ̃̀ gãnun. 69 Kũ zↄ̀nↄkpare pì a è gwe dↄ, akũ à ò gbɛ̃ kũ ò zɛna gwenↄnɛ à pì: Ń gbɛ̃ mɛ̀n don dí. 70 Akũ Pita ledi kpà dↄ. Kũ à kɛ̀ saa fíti, gbɛ̃ kũ ò zɛna gwenↄ pì Pitanɛ: Yãpuramɛ ń gbɛ̃ domɛ n ũ, zaakũ Galili gbɛ̃mɛ n ũ. 71 Akũ Pita fùtɛ à a zĩda kà à la dà à pì: Má gbɛ̃ kũ átɛni a yã o pì dↄ̃ro. 72 Zaa gwe gↄ̃̀nↄ ko lɛ́ gɛ̃̀n plade zù, akũ yã kũ Yesu òo dↄ̀ Pitan, kũ à pì, ari ko gↄ̃ gɛ́ lɛ́ zu gɛ̃̀n pla, ani ledi kpáai gɛ̃̀n aakↄ̃. Akũ à nà ↄ́ↄdↄnaaa.