2
1 Bɛɛ Yudɑbɑ, wee goo u nɑ guunu wɔllɔ
u bɔri yɛndun lɑbɑɑri geɑ kpɑrɑmɔ.
Yen sɔ̃, i bɛɛn tɔ̃ɔ bɑkɑ ni i rɑ rɑɑ di Yinni Gusunɔn sɔ̃ dio.
I bɛɛn nɔɔ mwɛɛnu yibio.
Domi tɔn kɔ̃so wi, u ǹ mɑɑ wee bɛɛn suunu sɔɔ.
Nɑ nùn kpeerɑsiɑwɑ mɑm mɑm.
2 Bɛɛ Ninifugibu, kɑm koosio u bɛɛ wɔrim wee.
Yen sɔ̃, i bɛɛn gbɑ̃rɑru mɑruo,
kpɑ i bɛɛn swɛɛ kɔ̃su.
I sɔɔru koowo,
kpɑ i wɔrugɔru sɔ̃ɔsi kɑ bɛɛn dɑm kpuro.
3 Wee Yinni Gusunɔ u Yɑkɔbun bweseru, Isirelibɑ ben bɛɛrɛ wesiɑmɔ,
be, be yibɛrɛbɑ bɑ wɔri bɑ ben yɑ̃nu gurɑ
nge mɛ bɑ rɑ resɛm kɑ̃ɑsi yɑkiri.
Bɑ Ninifu wɔri
bɑ yen yɑ̃nu gurɑ
4 Ninifun yibɛrɛbɑn tɑbu durɔ dɑmgibun tɛrɛnu nu sɔ̃ri.
Mɑ bɑ yɑ̃ɑ wunɔmginu doke.
Tɑbun tɔ̃ru tɑ̀ n turɑ,
ben tɑbu kɛkɛ be dumi gɑwe
yi rɑ kurɑmɛwɑ yi n bɑllimɔ nge dɔ̃ɔ buri,
kpɑ bɑ n yɑɑsi fĩɑmɔ.
5 Bɑ tɑbu kɛkɛbɑ yɑkiɑmɔ swɛɛ sɔɔ nge wiirobu.
Bɑ dɑɑmɔ bɑtumɑ kpuro sɔɔ kɑ dɑm.
À n bu wɑ, ɑ rɑ n tɑmɑɑ dɔ̃ɔ yɑriyɑ.
Kpɑ bɑ n duki mɔ̀ nge guru mɑɑkinu.
6 Ninifun sinɑ boko u win tɑbu durɔ dɑmgibu yɑɑyɑ u sokumɔ.
Adɑmɑ be wee, bɑ sĩimɔ bɑ bɑ̃ɑrimɔ.
Ben yibɛrɛbɑ bɑ sɛnde bɑ kɑ dɔɔ wuun gbɑ̃rɑru giɑ.
Mɑ bɑ tii kuku yenu kuɑ.
7 Subɑru sɔɔ, bɑ dɑɑnun swɛɛ kɛniɑ,
mɑ sinɑ kpɑɑrɑ wɔrukɑ.
8 Bɑ Ninifu ye mwɑ bɑ yen yɑ̃nu gurɑ bɑ kɑ doonɑ.
Yen tɔn kurɔbu bɑ sumɔ nge kpɑrukonu,
mɑ bɑ toronu soomɔ.
9 Ninifu ye, yɑ sɑ̃ɑwɑ nge nim bwee bɑkɑru
tèn nim mu gɛ̃ɛrɑ mu doonɑ.
Mɑ nɔɔgirɑ nɔɔrɑmɔ tɑ mɔ̀,
i yɔ̃ro, i yɔ̃ro.
Adɑmɑ goo kun yɔ̃re.
10 I sii geesu kɑ wurɑ guro.
Ben dukiɑ yɑ ǹ nɔru mɔ.
Dukiɑ bwese bwesekɑwɑ bɑ mɔ.
11 Bɑ gurɑmɔ, bɑ goomɔ, bɑ sɑnkumɔ.
Tɔmbu kpuron gɔmɑ dwiiyɑ.
Ben dũunu soonɑmɔ, mɑ ben dɑm doonɑ.
Be kpuron wuswɑɑ burisinɛ.
Ninifu yɑ sɑ̃ɑwɑ
nge gbee sunɔ ge bɑ kɑmiɑ
12 Mɑnɑ Ninifu ye, yɑ wɑ̃ɑ tɛ̃,
ye, ye yɑ rɑɑ sɑ̃ɑ nge gbee sinɑnsun wɑ̃ɑ yeru,
mi gbee sunɔ dwɑɑ kɑ ninu kɑ binu nu rɑ n bɔsu,
goo ku rɑ mɑɑ nu nɑre,
13 kpɑ dwɑɑ ye, yu yen kurɔbu kɑ yen binu yɑɑ goowɑ,
kpɑ yu wɑ̃ɑ yee te yɑɑ yibiɑ.
14 Gusunɔ wɔllu kɑ tem Yinni u nɛɛ, nɛ wee.
Nɛnɑ nɑ sɑ̃ɑ yen yibɛrɛ.
Kon de yen tɑbu kɛkɛbɑ bu dɔ̃ɔ mwɑɑrɑ.
Kon de bu yen bibu go tɑbu sɔɔ.
Kon de yu ku mɑɑ tɔmbun yɑ̃nu gurɑ.
Goo kun mɑɑ yen sɔmɔbun nɔɔ nɔɔmɔ.