1 Ǹ ma dãkpã Luda, mↄkↄ̃n ma nanyĩ.

2 Ma pì Dikirinɛ: Mↄkↄ̃mmɛ ma Dikiri ũ,

n baasiro má pↄ́ mana ke vĩro.

3 N gbɛ̃ kũ ò kú bùsu dí gũnnↄ,

mↄ́kↄ̃nↄmɛ gakuride kũ ò kàmagunↄ ũ.

4 Gbɛ̃ kũ òdi wã ò gɛ́ tãna kĩnaanↄ

dì yã'ũmmana kpá ń zĩdaimɛ.

Mani sa'o'aru kↄ́tɛ kũńworo,

oni ń tãnanↄ tↄ́ ma ma lɛ́nlo.

5 Dikiri, mↄkↄ̃mmɛ má n vĩ ndo,

n ma ka ma bakaaa,

ma wɛ̃̀ndi kú n ↄĩmɛ.

6 N zĩtɛ lɛ́zɛkinↄ dàmɛnɛ gu mana gũn,

gba kũ n dàmɛnɛ kàmagu.

7 Mani Dikiri sáabu kpá kũ àdi lɛ́ dama yãi,

bee gwãani àdi tó ma swɛ̃̀ ma gba laakarii.

8 Madìgↄ̃ Dikiri e ma wɛ́n baala'i,

lákũ à kú ma ↄplai nà, pɛ́ke ni ma lukaro.

9 Abire yãi ma pↄ dìgↄ̃ nna,

ma nɛ̀sɛgũn pù.

Má tãmaa vĩ kũ ma mɛ̀ nigↄ̃ kun,

10 zaakũ ĩni ma tó mira gũnlo,

ĩni we n gbɛ̃ kũ à kú adona yagi kũro.

11 N ma da wɛ̃̀ndi zɛ́a,

ma pↄnna nigↄ̃ pana n kĩnaa,

pↄ́ mananↄ nigↄ̃ kú n ↄĩ gↄrↄ sĩnda pínki.