1 Dikiri, mↄkↄ̃mmɛ ma gbɛ̀si ũ, matɛni n sísi,

ǹsun n sã tatamɛnɛro.

Tó n yĩtɛma dé,

mani gↄ̃ lán gbɛ̃ kũ ò sì gyãwãnnnↄ bàmɛ.

2 Matɛn kpányĩ ↄ́ↄ dↄnnɛ,

ǹ sã kpámai,

matɛni ma ↄ sɛ́ n kúkia.

3 Ǹsun ma gátɛ lɛɛlɛ kũ gbɛ̃ bɛ̃̀nɛnↄ ke vãnikɛrinↄoro.

Òdi yã nna o ń gbɛ̃dakenↄnɛ,

ama zãngu mɛ́ à kú ń swɛ̃̀n.

4 Ǹ kɛńnɛ ń yãkɛnaaa kũ ń vãnikɛnaao,

ǹ fĩna bońnɛ ń dàaa

de a gbɛ̀ wí ń musu.

5 Òdi Dikiri yãkɛna kũ à zĩkɛnaao yã daro,

ani ń litɛ kpɛdangara, ani ń futɛ doro.

6 Arubarikademɛ Dikiri ũ,

zaakũ à sã kpà ma wɛ̃nda wikilɛnaai.

7 Dikirimɛ ma gbãna ũ kũ ma sɛ̃gbakoo,

má a náani vĩ ma swɛ̃̀n.

Àdi kpámai, ma pↄ dì kɛ nna,

madì a sáabu kpá kũ lɛ̀sinaao.

8 Dikirimɛ a gbɛ̃nↄ gbãna ũ,

à de utɛki ũ kína kũ à kàanɛ, àdi a sura ba.

9 Ǹ n gbɛ̃nↄ sura ba ǹ arubarika dańgu,

ǹ ń dãkpã ǹgↄ̃ ń kũna gↄrↄ sĩnda pínki.