1 Ma pì, manigↄ̃ ma zĩda kũna dↄ̃,

mani tó ma lɛ́ ma da durunnakɛnaa gũnlo.

Tó gbɛ̃ vãni kú kũmao, mani ma lɛ́ kũ.

2 Ma lɛ́ nakↄ̃ana, ma yĩtɛ kítikiti,

mádi yãke oro, bee yã mana se,

akũ ma yã'ũmmanaa ɛ̀ra à kàra.

3 Ma swɛ̃̀ɛ puusu bò ma gũn,

kũ ma laasunn lɛ̀, ma nɛ̀sɛɛ wã̀,

akũ ma lɛ́ bò ma pì:

4 Dikiri, ǹ tó mà a wɛ̃̀ndigↄrↄ lɛ́ dↄ̃

kũ ma gↄrↄ dasi lɛ́o.

Ǹ tó màgↄ̃ dↄ̃ lákũ ma wɛ̃̀ndii ni láka nà araga.

5 N ma wɛ̃̀ndi lɛ́ yↄ̃̀ n ↄla lɛ́n,

ma kunna de wɛ́ kũ yĩola n kĩnaaro.

Gbɛ̃ sĩnda pínki dì gɛ̃tɛ lán ĩa bàmɛ,

6 bisãsiri tɛna dìgↄ̃ de lán uraa bàmɛ.

Àdi kɛ gàragara à aruzɛkɛ kakara,

ama à dↄ̃ ke dín ani gↄ̃nɛro.

7 Tó lɛmɛ, bↄ́ tãmaan manigↄ̃ vĩi?

Mↄkↄ̃mmɛ ma wɛ́ donyĩ, Dikiri.

8 Ǹ ma taarinↄ kɛ̃ma,

ǹsun tó yↄ̃nkↄnↄ ma foboro.

9 Ma lɛ́ nakↄ̃ana, mádi ma lɛ́ wɛ̃kↄ̃aro,

zaakũ mↄkↄ̃n mɛ́ n yã bire kɛ̀.

10 Ǹsun ma lɛ́ doro,

n okũ tɛni ma ká gaa.

11 Ndì gbɛ̃ toto ndì wɛ́ tãa a durunna yãi,

ndì a aruzɛkɛ ble lán blɛ́ bà.

Gbɛ̃ sĩnda pínki dì gɛ̃tɛ lán ĩa bàmɛ.

12 Ǹ ma aduakɛna sí Dikiri,

ǹ sã kpá ma wikilɛnaaa.

Ǹsun sã tata ma ↄ́ↄdↄnaanɛro,

zaakũ n nibↄↄn ma ũ,

má de gbɛ̃ zĩ̀tↄ ũ lán ma dizinↄ bà.

13 Ǹ wɛ́ goma de ma pↄ le àgↄ̃ nna dↄ,

ari màgↄ̃ gɛ́ andunia tó.