Luda yã takada kũ Bisã yão ZABURA 53

Yↄ̃nkↄ yã'onaa

Dauda lɛ̀ɛ.

1 Yↄ̃nkↄ dì pi a swɛ̃̀n Luda kunlo.

Gbɛ̃nↄ yàka, ń yãkɛnaa vãni,

yãmanakɛri ke kú ń tɛ́ro.

2 Zaa musu Luda dì bisãsirinↄ tàasi ká

à gwa tó gbɛ̃ke ↄ̃ndↄ̃ kà à a kĩnaa wɛtɛ.

3 Ò sã̀tɛ ń pínki ò gↄ̃̀ dↄ̀rↄↄ sari míↄmiↄ,

yãmanakɛri ke kú ń tɛ́ro, bee mɛ̀n do.

4 Yãvãnikɛrinↄↄ dↄ̃na vĩroo?

Òdi ma gbɛ̃nↄ mↄ́mↄ lán ú bà,

òdi Luda sísiro.

5 Gwen vĩna ń kũn manamana,

vĩnapↄnↄn kú gwe sↄ̃ro.

Luda tò gbɛ̃ kũ ò lɛ̀tɛáwanↄ gↄ̃̀ katɛna gɛ̀nↄ ũ,

a wé'i dàḿma kũ Luda gìńyĩ yãi.

6 Luda, ǹ bo Zaiↄ̃ ǹ mↄ́ ǹ Isarailanↄ sura ba!

Tó Luda ɛ̀ra à sù kũ a gbɛ̃nↄ ń gwena zĩn,

Yakubu burinↄ ni pↄnna kɛ,

Isarailanↄ ni yáa dↄ.