Luda yã takada kũ Bisã yão ZABURA 112

112

Gbɛ̃ kũ à Dikiri vĩna vĩ

1 Aleluya!

Arubarikademɛ gbɛ̃ kũ à Dikiri vĩna vĩ ũ,

akũsↄ̃ Dikiri yãditɛnanↄ dì kánɛ manamana.

2 A nɛ́nↄ nigↄ̃ gbãnadenↄ ũ ń bùsun,

nɛ̀sɛpurade burinↄ nigↄ̃ de arubarikadenↄ ũ.

3 Ɔgↄ kũ aruzɛkɛo di a bɛa,

a yãmanakɛna lakana vĩro.

4 Bee gusiran gu dì pu gbɛ̃ mananɛ,

nɛ̀sɛpurade kũ à sùru kũ wɛ̃ndao vĩ.

5 Gbɛ̃ kũ àdi ↄ poro, kũ àdi pↄ́ sãkãńnɛ,

akusↄ̃ àdi yã kɛ a zɛ́a, yã dì bo kãao nna.

6 Pↄ́ke ni gbɛ̃ mana lá ble zikiro,

a yã nigↄ̃ dↄńgu gↄrↄ sĩnda pínki.

7 Baaru vãni dì a vĩna kũro,

a laakarii dìgↄ̃ kpatɛna, àdigↄ̃ Dikiri náani vĩ.

8 A kùu dì vĩro, vĩna dì a kũro

ari à gɛ́ à yↄ̃̀gↄ̃ kɛ a ibɛrɛnↄa.

9 Àdi pↄ́ fã takasidenↄnɛ,

a yãmanakɛna lakana vĩro,

a gbãna dìgↄ̃ kara kũ bɛ̀ɛrɛɛo.

10 Gbɛ̃ vãni dì a e à pↄ fɛ̃,

àdi saka kakũn à nagui,

gbɛ̃ vãni pↄyeinaa dì kɛ pã.