1 Má ye Dikirii, zaakũ à ma yã mà,

à ma wikilɛnaawa mà.

2 Manigↄ̃ a sísi ari ma wɛ̃̀ndi lɛ́n,

kũ à sã kpàmai yãi.

3 Ga bàa fĩ̀kãmai yã,

mira wãwã tↄ̃̀ma,

wɛ́tãmmana kũ pↄsirao dàmala.

4 Akũ ma Dikiri sìsi ma pì:

Dikiri, n yã nna, ǹ ma mì sí.

5 Dikirin sùru vĩ akũsↄ̃ à mana,

ó Luda wɛ̃nda vĩ.

6 Dikiri dì gbãnasaridenↄ dãkpã,

kũ ma busa, à ma sura bà.

7 Ma swɛ̃̀, ǹ kɛkɛ ǹ kpátɛ,

zaakũ Dikiri yã mana kɛ̀nnɛ.

8 Dikiri, n ma bo ga lɛ́i,

n wɛ́'i wàramɛnɛ, ńdi tó ma gɛ̃̀ síro,

9 de màgↄ̃ tɛ́ n arɛ gbɛ̃ bɛ̃nɛnↄ kukia la.

10 Bee kũ wari tↄ̃̀ma ma gↄ̃ búgubugu,

má kpɛ́ a náanikɛna, akũ ma yã ò.

11 Bídi ma kũ ma pì:

Gbɛ̃ sĩnda pínki bi ɛ́kɛdenↄmɛ.

12 Bↄ́n mani fĩna boo Dikirinɛ

yã mana kũ à kɛ̀mɛnɛ pínki musuu?

13 Mani Dikiri surabana toko sɛ́ musu,

mani a sísio.

14 Mani lɛ́ kũ ma kɛ̀ Dikirianↄ papa

a gbɛ̃nↄ wára ń pínki.

15 Dikiri yãmarinↄ gana bɛ̀ɛrɛ vĩnɛ.

16 Dikiri, n yã nna, n zↄ̀bleriimɛ ma ũ,

nↄgbɛ̃ kũ à zↄ̀ↄ blènnɛ nɛ́mɛ ma ũ,

n ma bo bàn.

17 Mani kɛnnakũkↄ̃o sa omma,

mani n sísio, Dikiri.

18 Mani lɛ́ kũ ma kɛ̀ Dikirianↄ papa

a gbɛ̃nↄ wára ń pínki

19 a kpɛ́ ↄnn Yurusalɛmu gũn.

Aleluya!