1 Kũ o vutɛ Babilↄnu swanↄ sarɛ,

Zaiↄ̃ yã dↄ̀ógu, akũ o ↄ́ↄ dↄ̀.

2 O ó mↄrↄnↄ tò lokona luba línↄa gwe.

3 Gwen gbɛ̃ kũ ò ó kũnanↄ pì ò lɛ̀ síńnɛ,

ó wɛ́tãmmarinↄ ye ò kↄ̃kↄ̃ ońnɛ,

ò Zaiↄ̃ lɛ̀nↄ doke síńnɛ.

4 Deran óni Dikiri lɛ̀nↄ sí nà

buri pãndenↄ bùsuu gũnn?

5 Tó n yã sã̀magu Yurusalɛmu,

ma ↄpla ga.

6 Tó Yurusalɛmu yã dí dↄmaguro,

tó mádi a ditɛ ma pↄnnakɛna mìde ũro,

ma nɛ́nɛ natɛ.

7 Dikiri, ǹ dↄ yã kũ Ɛdↄmunↄ kɛ̀n

zĩ kũ ò yã mↄ̀ Yurusalɛmunɛ

ò pì: À wíwi,

à wíwi à datɛ manamana.

8 Babilↄnudenↄ bi pↄ́ kakatɛnanↄmɛ!

Arubarikademɛ gbɛ̃ kũ ani yã kũ a kɛ̀wɛrɛ fĩna boárɛ ũ,

9 kũ ani á nɛ́nↄ kũkũ à ń pápa gbɛ̀ɛa.