1 Dikiri, ǹ ma aduakɛna sí,

ǹ sã kpá ma wɛ̃nda wikii,

ǹ wema n náani kũ n manao yãi.

2 Ǹsun yãkpatɛ kɛ kũ makũ n zↄ̀bleriioro,

zaakũ gbɛ̃ke taari sari n kĩnaaro.

3 Ma ibɛrɛ pɛ̀tɛmai à ma nɛ,

à tò má kú gusiran

lán gbɛ̃ kũ à gà zaa gìkɛnaa bà.

4 Akũ ma nɛ̀sɛɛ yàka manamana,

ma sↄ̃pɛ̀tɛ vãni.

5 Yã zĩzĩnↄ dↄ̀magu,

madì laasun lɛ́ n zĩkɛnanↄa,

madì n yãkɛnanↄ da.

6 Ma a ↄ dↄnyĩ,

madì n ni dɛ lán gukori dì í ni dɛ nà.

7 Ǹ wema likalika Dikiri,

ma gbãna làka.

Ǹsun mìkpɛrɛ zumɛnɛro,

de màsun gↄ̃ lán gbɛ̃ kũ ò sì gyãwãnnↄ bàro.

8 Ǹ n gbɛ̃kɛ mↄmɛnɛ kↄnkↄ,

zaakũ mↄkↄ̃mmɛ má n náani vĩ.

Ǹ ma da zɛ́ kũ à de mà sɛ́a,

zaakũ mↄkↄ̃mmɛ ma a swɛ̃̀ɛ kpàmma.

9 Ǹ ma sí ma ibɛrɛnↄa, Dikiri,

mↄkↄ̃mmɛ ma nanyĩ.

10 Mↄkↄ̃mmɛ ma Luda ũ,

ǹ n pↄyenyĩna yã damɛnɛ.

Ǹ tó n Nini mana domɛnɛ arɛ gusaran.

11 Ǹ ma wɛ̃̀ndi dãkpã n tↄ́ yãi, Dikiri,

ǹ ma bo yã'ũmmanaa gũn n mana yãi.

12 Ǹ ma ibɛrɛnↄ láka n gbɛ̃kɛ yãi,

ǹ ma zãngurinↄ dɛdɛ ń pínki,

zaakũ n zↄ̀bleriimɛ ma ũ.