NAANAA.
10.
Nuhu nɛ́gↄ̃gbɛ̃nↄ Sɛmu kũ Hamuo kũ Yafɛtio kũ ń nɛ́gↄ̃gbɛ̃ kũ ò ì í dana anduniala gbɛranↄ yãn dí. 
Yafɛti nɛ́gↄ̃gbɛ̃nↄ tↄ́n dí: Goma, Magↄgu, Midiã, Girisi, Tubala, Mɛsɛki kũ Tirasao. 
Goma nɛ́gↄ̃gbɛ̃nↄ tↄ́n dí: Asakɛnaza, Rifa, Tↄgama. 
Girisi nɛ́gↄ̃gbɛ̃nↄ tↄ́n dí: Ɛlisa, Tasisi, Sipiru, Rodanimu. 
Buri pìnↄ mɛ́ ò dàgula ísira gɛrɛɛi, ò kↄ̃ kpàatɛtɛ bùsu kũ bùsuuo buri kũ burio danɛdanɛ, baadi kũ a buriyão. 
Hamu nɛ́gↄ̃gbɛ̃nↄ tↄ́n dí: Etiopia, Misila, Libia kũ Kanaao. 
Etiopia nɛ́gↄ̃gbɛ̃nↄ tↄ́n dí: Sɛba, Avila, Sabata, Raama kũ Sabatɛkao. Raama nɛ́gↄ̃gbɛ̃nↄmɛ Seba kũ Dedão ũ. 
Nimlↄdu bi Etiopia burimɛ dↄ. Àkũmɛ andunia gbãnazↄ̃kↄ̃de tↄ́de káaku ũ. 
Tofe sàamɛ Dikiri kĩnaa. A yã mɛ́ à tò òdi pi: Lákũ Nimlↄdu de tofe sà ũ Dikiri kĩnaa nà. 
Babilↄnia bùsu kũ à kí blèa káaku wɛ́ranↄmɛ Babɛli kũ Ɛrɛkio kũ Akadao kũ Kalanɛo ũ. 
Bona gwe à gɛ̀ɛ Asiria bùsun, akũ à Ninɛva kàtɛ kũ Reobo'irio kũ Kalao 
kũ Rɛsɛ̃ kũ à kú Ninɛva dagura kũ Kalao. Ninɛvamɛ wɛ́ra zↄ̃kↄ̃ ũ. 
Misila burinↄn dí: Ludunↄ, Anamunↄ, Lɛabanↄ, Nafatunↄ, 
Patarusinↄ, Kasalunↄ kũ Kɛrɛti kũ Filisitininↄ bò ń gũnnↄo. 
Kanaa daudu Sidↄ̃ burinↄn dí: Itinↄ, 
Yebusinↄ, Amↄrinↄ, Gigasinↄ, 
Ivinↄ, Akinↄ, Sininↄ, 
Avadanↄ, Zɛmarinↄ kũ Amatanↄo. Kanaa pìnↄ dàgula kpɛkpɛ. 
Ń bùsu lɛ́zɛkin dí. Bona zaa Sidↄ̃ gɛna Gera kũ à kú Gaza sarɛ ari Sↄdↄmu kũ Gↄmↄrao kũ Adamao kũ Zeboimu kũ à kú Lasa sarɛo. 
Hamu nɛ́gↄ̃gbɛ̃nↄn gwe buri kũ burio bùsu kũ bùsuuo danɛdanɛ, baadi kũ a buriyão. 
Yafɛti dakũna Sɛmu buri kɛ̀ dↄ. Àkũmɛ Eberunↄ dizi káaku ũ. 
Sɛmu nɛ́gↄ̃gbɛ̃nↄ tↄ́n dí: Elamu, Asiria, Apasada, Ludu kũ Aramuo. 
Aramu nɛ́gↄ̃gbɛ̃nↄ tↄ́n dí: Uzu, Hulu, Geta kũ Mɛsɛkio. 
Apasada mɛ́ à Sela ì, akũ Sela Eberu ì. 
Eberu nɛ́gↄ̃gbɛ̃nↄ ì gbɛ̃nↄn pla. A do tↄ́n Pɛlɛgi, zaakũ a gↄrↄn ò kɛ̃̀kↄ̃a andunia gũn. A dakũna tↄ́n Yↄkↄtã. 
Yↄkↄtã nɛ́gↄ̃gbɛ̃nↄ tↄ́n dí: Alamↄdada, Sɛlɛfi, Azamavɛ, Yera, 
Adoramu, Uzala, Dikala, 
Obala, Abimaɛli, Seba, 
Ofi, Avila kũ Yobabuo. Yↄkↄtã nɛ́gↄ̃gbɛ̃nↄn gwe pínki. 
Bona Mɛsa gɛna Sefa kũ kpi kũ ò kú ifãboki kpanↄ, àkũmɛ ń bùsu ũ. 
Sɛmu nɛ́gↄ̃gbɛ̃nↄn gwe pínki buri kũ burio bùsu kũ bùsuuo danɛdanɛ, baadi kũ a buriyão. 
Nuhu nɛ́gↄ̃gbɛ̃nↄ burinↄn gwe danɛdanɛ bùsu kũ bùsuuo. Ń kĩnaan andunia buri sĩnda pínki bòn ò dàgula í dana anduniala gbɛra.