NAANAA.
49.
Yakubu a nɛ́nↄ sìsi, akũ à pì: À kↄ̃ kakara mà yã kũ ani á le ziakpɛzĩ oárɛ. 
À kↄ̃ kakara ma nɛ́nↄ à sã kpá, à á de Isaraila yã ma. 
Rubɛni ma daudu ma gbãna, ma kana gↄ̃ lɛ́i nɛ́ káaku, n bɛ̀ɛrɛ deńla kũ n gbãnao. 
Ń pãsĩ lán ísↄ̃ bà, ama ĩnigↄ̃ deńlaro, zaakũ n didi n de gádoa, n wutɛ kũ ma nↄnↄ dokeo. 
Simɛↄ kũ Levio mɛ́ ò kↄ̃ gbɛ̃nↄ ũ, ò pãsĩ kũ fɛ̃nɛdao. 
Ma lɛ́ kú ń kakaranaa gũnlo, ma baka kú ń yãgↄ̃gↄ̃naa gũnlo, zaakũ ò gbɛ̃nↄ dɛ̀dɛ pↄfɛ̃ gũn, ò zù gbátĩnↄ zↄ̃̀zↄ̃ lákũ ò yei nà. 
Luda láari boḿma ń pↄfɛ̃ zↄ̃kↄ̃ yãi, à lɛ́ kɛńnɛ ń pãsĩkɛ yãi. Mani ń kɛ̃kↄ̃a Yakubu burinↄ tɛ́, mani ń burinↄ fãkↄ̃a Isarailanↄ gũn. 
Yuda, n gbɛ̃nↄ ni n tↄ́ kpá. Ĩni n ibɛrɛnↄ kũ ń wakaaa, n de nɛ́nↄ ni kútɛnnɛ. 
Yuda de lán músu bà, ma nɛ́ pìi dì su kũ tofekao àdi gátɛ àdi wútɛ a tòn. Dí mɛ́ ani fↄ̃ à a futɛɛ? 
Kpata ni go Yudalaro, a burinↄ mɛ́ onigↄ̃ gò kũna ari Silo gɛ́ su, buri sĩnda pínki ni mì natɛnɛ. 
Ani a zaaki dↄ geepi lía, ani a zaakinɛ yĩ geepi lí manaa. Sèwɛ̃ nigↄ̃ dimɛ ani a pↄ́kasanↄ pípio, ani a uta pípi kũ geepi'io. 
Sèwɛ̃ ni a wɛ́ tɛ̃ra kũ, vĩ ni a saka pura kũ. 
Zɛbuluni nigↄ̃ kú ísira sarɛ, a bùsu nigↄ̃ de gó'itɛnↄ bàdↄki ũ. A bùsu lɛ́ ni zɛ Sidↄ̃. 
Isaka de lán zaaki gbãna kũ à wutɛna aso mɛ̀n pla dagura bà. 
Tó a burinↄ è ń kámmaboki mana, akũsↄ̃ ń bùsu pì vutɛna nna, oni natɛ asosɛnaanɛ ò zↄ̀zĩ kɛ. 
Dã ni a gbɛ̃nↄ bo yãn Isaraila burinↄ doke ũ. 
Dã nigↄ̃ de lán mlɛ̃̀ kũ à kú zɛ́ sarɛ bà, lán pitiko kũ à kú zɛ́wɛwɛ gũn bà. Àdi sↄ̃ lɛ́ a gbáa, de gbɛ̃ kũ à di a musu lɛ́tɛ a kpɛdangara. 
Dikiri, madì wɛ́ dↄ n surabanaai. 
Gada sↄ̃, zĩ̀karinↄ ni sińgu, ama oni lɛ́tɛ ń kpɛdenↄa. 
Asa pↄ́blewɛ nigↄ̃ nísi vĩ, pↄ́ble kũ a blena nna kínanↄnɛɛn ani kpá. 
Nafatali de lán gbɛ̃tɛ̃ lí kũ àdi gã̀ mananↄ bo bà. 
Yusufu de lán lí nɛ́'iri kũ à kú ísɛ̃boki sarɛ bà, a gã̀nↄ dì poro à da gbĩ̀la. 
Kàzurinↄ ni ibɛrɛ sɛ́o, ò pɛ́a kũ kàao. 
Anigↄ̃ a sá kũna yĩgãnaa sari Yakubu Luda gbãnade gãi, a ↄ gbãna nigↄ̃ wãna Isarailanↄ Gbɛ̀si kũ àdi donɛ arɛ yãi. 
N de Luda pì ni kpányĩ, Gbãnasĩndapinkide pì ni arubarika dangu kũ legũ'i kũ àdi bo musuo, kũ arubarika kũ à katɛna zĩtɛ gbáruo, de n nↄnↄ kũ n pↄ́nↄ gↄ̃ de nɛ́randenↄ ũ. 
Sa'olɛ kũ n de kɛ̀nnɛ de ma dizinↄ pↄ́la, à zↄ̃kↄ̃ de kpi zĩnↄla. Luda tó arubarika dínↄ gↄ̃ Yusufu mìia, gbɛ̃ kũ ò dìtɛ adona a gbɛ̃nↄ tɛ́ musu. 
Biliaminu de lán lɛwanna pãsĩ bà, àdi lɛ́tɛ gbɛ̃nↄa kↄnkↄ, àdi ń pↄ́nↄ kpàatɛ ↄkↄsi. 
Isaraila buri mɛ̀n kuri awɛɛplanↄn gwe ń pínki. Sa'olɛ kũ ń de kɛ̀ńnɛn gwe baadi kũ a pↄ́o. 
Akũ à pìńnɛ: Tó ma andunia tò, à ma vĩ ma dizinↄ gbɛ̀wɛɛ kũ à kú Iti buri Ɛflↄnu bura gũn. 
Gbɛ̀wɛɛ pì kú Makpɛlamɛ, Mamare ifãboki kpa Kanaanↄ bùsun, bura kũ Ibrahĩ lù Iti buri Ɛflↄnua gɛ̀vĩki ũ. 
Gwen ò Ibrahĩ kũ a nanↄ Sarao vĩ̀n. Gwen ò Isaaku kũ a nanↄ Rɛbɛkao vĩ̀n. Gwen ma Lea vĩ̀n. 
Ò bura pì kũ a gbɛ̀wɛɛɛoo lù Itinↄamɛ. 
Kũ Yakubu lɛ́ dìtɛ a nɛ́nↄnɛ à làka, à ɛ̀ra à wùtɛ, akũ à gà.