BONAA.
1.
Isaraila nɛ́ kũ ò tà Misila kũ ń de Yakubuo, baadi kũ a bɛ gbɛ̃nↄ tↄ́n dí: 
Rubɛni, Simɛↄ, Levi, Yuda, 
Isaka, Zɛbuluni, Biliaminu, 
Dã, Nafatali, Gada kũ Asao. 
Yakubu buri pìnↄ ń pínki gbɛ̃nↄn baaakↄ̃ akurimɛ. Yusufu sↄ̃ a gĩnakɛ à kú Misila kↄ̀. 
Akũ Yusufu gà kũ a vĩ̀ninↄ kũ gbɛ̃ kũ ò kun a gↄrↄanↄ ń pínki. 
Isarailanↄ nɛ́ ì ò kɛ̀ dasi ò kàra ò dasi kũ̀ manamana, ò dà bùsuu pìla pínki. 
Kína dufu kũ à Yusufu dↄ̃ro kpata blè Misila, 
akũ à pì a gbɛ̃nↄnɛ: À Isarailanↄ gwa, ò dasi kũ̀ ò dàóla. 
Ò gɛ́ ò ↄ̃ndↄ̃ kɛńnɛ de òsun kararo yãi. Tó zĩ̀i fùtɛ, ò na ó ibɛrɛnↄa ò zĩ̀ ká kũoo ò bↄtɛ ó bùsun. 
Akũ ò gbɛ̃nↄ dìtɛńnɛ ń dikirinↄ ũ ò wɛ́ tãḿma kũ zĩ gbãna kɛnaao. Lɛmɛ ò Pitomu kũ Ramɛsɛo kàtɛ Firi'aunanɛ a pↄ́blekatɛkianↄ ũ lɛ. 
Ama lán òtɛn wari dↄḿma nà, lɛmɛ òdigↄ̃ kara lɛ òtɛn dagula, akũ swɛ̃̀ɛ kɛ̃̀ Misilanↄgu ń yã musu. 
Akũ ò ń dá zↄ̀zĩ pãsĩn 
ò ń pↄ yàka ò ɛ̃ zĩ gbãna dàńnɛ kũ kúnkubonaao kũ bura zĩ sĩnda pínkio. Ò zĩ pìnↄ dàńnɛ pínki pãsĩpãsĩ. 
Akũ Misilanↄ kína Eberu nɛ́sɛtɛrinↄ sìsi, a do tↄ́n Sifira, a do Pua. 
À pìńnɛ: Tó áni nɛ́ i Eberu nↄgbɛ̃nↄnɛ tera sa, tó gↄ̃gbɛ̃mɛ, à a dɛ. Tó nↄgbɛ̃mɛ sↄ̃, à a tó. 
Nↄgbɛ̃ pìnↄn Luda vĩna vĩ, odi yã kũ à òńnɛ kɛro, òtɛn nɛ́gↄ̃gbɛ̃nↄ tó. 
Akũ kína pì ń sísi à ń lá à pì: À kɛ̀ dera a kɛ̀ lɛ a nɛ́gↄ̃gbɛ̃nↄ tòo? 
Ò wèa ò pì: Eberu nↄgbɛ̃nↄ de lán Misila nↄgbɛ̃nↄ bàro, ò wãna òdi nɛ́ i ari ògↄ̃ ká. 
Lɛmɛ Isarailanↄ tɛn kara lɛ òtɛn dasi kũ. Akũ Luda yã mana kɛ̀ nɛ́sɛtɛrii pìnↄnɛ 
à ń gbá nɛ́nↄ, kũ ò a vĩna vĩ yãi. 
Akũ Firi'auna yã dìtɛ a gbɛ̃nↄnɛ ń pínki à pì: À Eberu nɛ́gↄ̃gbɛ̃ kũ ò ń ínↄ ká Nili ín ń pínki, ama à nɛ́nↄgbɛ̃nↄ tó.