BONAA.
20.
Luda yã díkĩna ò pínki à pì: 
Makũmɛ Dikiri á Luda ũ. Ma á bↄ́tɛ zↄ̀blen Misila. 
Àsungↄ̃ dikiri ke vĩ ma gbɛraro. 
Àsun pↄ́ke taka kɛ à kútɛ à donyĩ kɛnɛro, pↄ́ kũ à kú musu ke zĩtɛ ke í gũnn yá, zaakũ makũ Dikiri á Luda, nɛ̀sɛgↄ̃bademɛ ma ũ. Madì gbɛ̃ kũ à yemaironↄ yã vãni wí ń burinↄ musu ari à gɛ́ pɛ́ ń sãkpɛnↄa kũ ń nasionↄ. 
Gbɛ̃ kũ ò yemai ò ma dokayãnↄ kũnanↄ sↄ̃, madìgↄ̃ gbɛ̃kɛ vĩ kũńwomɛ ari ń buria. 
Àsun makũ Dikiri á Luda tↄ́ sí pãpãro, zaakũ gbɛ̃ kũ à ma tↄ́ sì pãpã mani tó à bo pãro. 
Àgↄ̃ dↄn kámmabogↄrↄ bi ma pↄ́mɛ. 
Àgↄ̃ á bura zĩ kũ á zĩ sĩnda pínkio kɛ gↄrↄ suddo, 
a supplade gↄ̃ deárɛ kámmabogↄrↄ ũ, zaakũ makũ Dikiri á Luda ma pↄ́mɛ. Àsun zĩ ke kɛ gↄrↄ pì zĩro, ákↄ̃nↄ ke á nɛ́gↄ̃gbɛ̃ ke á nɛ́nↄgbɛ̃ ke á zĩkɛri gↄ̃gbɛ̃ ke nↄgbɛ̃ ke á pↄ́kãde ke nibↄ kũ à kú á bɛa. 
Zaakũ gↄrↄ suddon ma musu kũ zĩtɛo kɛ̀ kũ ísirao kũ pↄ́ kũ ò kú ń gũnnↄ pínki, akũ ma kámma bò a gↄrↄ supplade zĩ. A yã mɛ́ à tò ma arubarikaa dà kámmabogↄrↄ pìn ma dìtɛ ma pↄ́ ũ. 
Àgↄ̃ á de kũ á dao bɛ̀ɛrɛ dↄ̃, de à gì kɛ bùsu kũ makũ Dikiri á Luda matɛn kpááwan. 
Àsun gbɛ̃ dɛro. 
Àsun zina kɛro. 
Àsun kpãni oro. 
Àsun yã dí á gbɛ̃dakearo. 
Àsun á gbɛ̃dake ↄn ni dɛro. Àsun a nↄ ni dɛro ke a zĩkɛri gↄ̃gbɛ̃ ke nↄgbɛ̃ ke a zù ke a zaaki ke pↄ́ kũ à vĩnↄ pínki. 
Gbɛ̃ sĩnda pínki legũpũtãnaa mà kũ kuru yĩsãmpanaao, ò legũpinaa è kũ túsukpɛo dↄ kpi musu, akũ vĩna ń kũ òtɛn lukaluka ò zɛ zã̀ dire. 
Ò pì Musanɛ: Ǹ yã owɛrɛ n zĩda, óni ma. Ǹsun tó Luda yã owɛrɛro, de òsun gagaro yãi. 
Musa pìńnɛ: Àsun tó vĩna á kũro, zaakũ kũ à á yↄ̃ à gwa yãin à sù, de àgↄ̃ a vĩna vĩ akũsↄ̃ àsun durunna kɛro yãi. 
Ò zɛ zã̀ dire, akũ Musa nà túsukpɛ gègetee pìii, gu kũ Luda kun pìn. 
Akũ Dikiri pì Musanɛ: Ǹ yã dí o Isarailanↄnɛ: A mà kũ á zĩdao lákũ ma yã òárɛ zaa musu nà. 
Àsun tãna ke kɛ à namaro. Àsun andurufu ke wura pi tãnanↄ ũro. 
À ma gbagbaki bo kũ ɛ̃o à sa oa kũ sãnↄ kũ zùnↄ, sa'opↄ kũ òdi ká tɛ́n à tɛ́ kũ kũ kɛnnakũkↄ̃o sa'opↄo. Gu kũ ma dìtɛárɛ àgↄ̃ ma sísin, mani su á kĩnaa mà arubarika daágu. 
Tó átɛni ma gbagbaki pì bo kũ gbɛ̀ɛo, àsun bo kũ gbɛ̀ anaaoro, zaakũ tó a gã pɛ̀tɛa, a tò à gbã̀a lɛ̀n gwe. 
Àsun ma gbagbaki bo à a didiki kɛro, de á pótompokɛ sún bo gbagbaki pìiaro yãi.