AYUBA.
4.
Akũ Temana gbɛ̃ Ɛlifaza yã wèa à pì: 
Asa tó gbɛ̃ yã ònnɛ, ĩni pↄ fɛ̃roo? Zaakũ mani fↄ̃ màgↄ̃ yĩtɛnaro. 
Ǹ dↄn lákũ n lɛ́ dà gbɛ̃nↄa dasi nà, n gbɛ̃ kũ ń gbãna làkanↄ gbà swɛ̃̀ɛ. 
N yã gbɛ̃ kũ òtɛn funↄ sɛ̀ lei, n gbɛ̃ kũ ò busananↄ gbà gbãna. 
Kũ yã n le sà, akũ ntɛn fu, kũ à sùmma, n bídi kɛ̀. 
N vĩnakɛna Ludanɛ dí n laakari kpátɛroo? N kunna taari sari dì tó ǹgↄ̃ tãmaa vĩroo? 
Ǹ laasun lɛ́ ǹ gwa! Kisira taarisaride lè ziki ari à gà yá? Mán ò gbɛ̃ mananↄ kàkatɛn zikii? 
Gbɛ̃ kũ à yã vãni bú wì à yãkete tↄ̃̀a, ma è abire mɛ́ àdi butɛnɛ. 
Luda lɛ́'ĩa mɛ́ àdi a kakatɛ, a pↄ́ bona a yĩn mɛ́ àdi a dúgu zↄ̃. 
A pũtãna kũ kòto gbãnao lán músuu bà dì láka, Luda dì a saka woronɛ. 
Àdi ga lán músu kũ à nↄ̀bↄↄ wɛ̀tɛ à kùraii bà, a nɛ́nↄ ni gbasa ò fãkↄ̃a. 
Yã sùma kpãni asiri gũn, a ĩa gɛ̃̀ ma sãn. 
Gↄrↄ kũ matɛn nana bɛ̃̀nɛ o gwãani, gↄrↄ kũ gbɛ̃nↄ i ò ò kà zã̀, 
vĩna ma kũ matɛn lukaluka, ma mɛ̀gu sĩnda pínki tɛn luka. 
Ĩa ke buri ma pa ma ãnnwa, ma mɛ̀kãsɛsɛɛ fùtɛ à zɛ̀. 
Kũ à zɛ̀, mádi a taka dↄ̃ro, pↄ́ pì kú ma arɛ, akũ ma a kòto kpãni mà à pì, 
bisãsiri ni fↄ̃ àgↄ̃ de yãnnade ũ Ludanɛ yá? Gbɛ̃ ni fↄ̃ àgↄ̃ zɛ̃na a Kɛ̀ri arɛ yá? 
Zaakũ Luda dì a malaikanↄ náani kɛro, akũsↄ̃ àdi a zĩkɛrii pìnↄ taari le, 
ókↄ̃nↄ kũ ó mɛ̀ de lán ɛ̃ kpɛ́ bà, ó kasana de bùsu kori ũ akũsↄ̃ òdi ó dúgu zↄ̃ lán dã̀mboroo bà, oni ó pↄ́ o dↄ yá? 
Zaa kↄnkↄ ari ↄkↄsi gbɛ̃nↄ dì gaga, òdi kakatɛ ari gↄrↄ sĩnda pínki, òdi ń tàasi káro. 
Luda dì ń kuta lí gborońnɛ, akũ òdi ga ↄ̃ndↄ̃ sari.