AYUBA.
5.
Ǹ lɛ́ zú sà ǹ ma tó gbɛ̃ke ni wemma. Malaika kpaten ĩni arɛ dↄaa? 
Íbɛtɛsɛnaa dì yↄ̃nkↄ dɛ, nɛ̀sɛgↄ̃baa dì mìsaride kakatɛ. 
Ma è yↄ̃nkↄ zĩni pɛ̀tɛ, akũ zĩni pìi yↄ̀ kãnto. 
A nɛ́nↄ zã̀ kũ aafia kĩnaao, òdi ń yãnↄ mátɛmatɛńnɛ yãkpatɛkɛkia, gbɛ̃ke dì zɛ kũńworo. 
Nàdɛrinↄ dì a burapↄnↄ ble, bee pↄ́ kũ à lɛ̀ɛ lìkainↄ, ímidɛrinↄ dì luka a aruzɛkɛi. 
Kisira dì futɛ bùsunlo, wari dì butɛ zĩtɛro. 
Lákũ tɛ́pũtãna gɛna musu sika vĩro nà, lɛn gbɛ̃ kũ ò ì pínki dì wari le lɛ. 
Tó makũmɛ sↄ̃, Ludan mani gbɛka, mani ma yã kpátɛ a arɛ. 
Àdi yã zↄ̃kↄ̃ kɛ kũ oni fↄ̃ ò a gbá dↄ̃ro, oni fↄ̃ ò a yãbonsarɛkɛnanↄ lɛ́ dↄ̃ro. 
Àdi tó legũ ma zĩtɛ, àdi tó a í dagula sɛ̃̀ntɛ. 
Àdi gbɛ̃ busananↄ sɛ́ lei, àdi wɛ̃ndadenↄ da pↄnnan. 
Àdi yã kũ manafikidenↄ tɛn pɛ́a gboro, de ń ↄzĩ súngↄ̃ arubarika vĩro yãi. 
Àdi ↄ̃ndↄ̃rinↄ kũ ń wɛ́zɛ̃ gũn, àdi tó yãlɛkpɛrɛ'orinↄ yãgↄ̃gↄ̃na kɛ pã. 
Gu dì sira kũḿma fãnantɛ̃, òdi ↄ mátɛmatɛ fãnantɛ̃ lán gwãani bà. 
Àdi takasidenↄ bo ga lɛ́i, àdi pↄ́saridenↄ bo gbãnamↄnnɛrinↄ ↄĩ. 
A yã mɛ́ à tò gbãnasaridenↄn tãmaa vĩ, yãzɛdesaridenↄ dì yĩtɛ kyáu. 
Arubarikaden gbɛ̃ kũ Luda dì a toto ũ. Tó àtɛni n sã gaga, ǹsun yãvunu káro. 
Zaakũ àdi gbɛ̃ kĩnna akũ àdi a bↄ̀ gwa, àdi gbɛ̃ wíwi akũ àdi a werekↄ̃a. 
Ani n bo yãn gɛ̃̀n suddo, bee tó à kà gɛ̃̀n suppla, kisira ni n lero. 
Ani n sí gaa nàgↄrↄ, ani n bo fɛ̃nɛda lɛ́i zĩ̀lan. 
Dikiri ni n bo gbɛ̃yakarinↄ ↄĩ, tó yakanaa sù, vĩna ni n kũro. 
Ĩni yakana kũ nàao yáa dↄ, ĩni vĩna kɛ nↄ̀bↄ pãsĩnↄnɛro. 
Zaakũ ĩnigↄ̃ kun aafia kũ gbɛ̀nↄ, ĩnigↄ̃ nna kũ nↄ̀bↄsɛ̃ntɛnↄ, 
ĩnigↄ̃ dↄ̃ kũ n ↄn nigↄ̃ nna, tó n gɛ n kpàsan, pↄ́ke ni kĩaro. 
Ĩnigↄ̃ dↄ̃ kũ n nɛ́nↄ ni kɛ dasi, n burinↄ ni dagula lán sɛ̃̀ɛ bà. 
Ĩni zĩ kũ yúkuyuku gbasa ǹ ga lán ése kũ à mà ò kɛ̃̀ a gↄrↄaa bà. 
Kũ o yã pìi asiri gbɛ̀ka, lɛn à de lɛ. Ǹ yã pì sí ńgↄ̃ dↄ̃ kũ n zĩda yãmɛ.