AYUBA.
40.
Akũ Dikiri ɛ̀ra à pì Ayubanɛ: 
Makũ Gbãnasĩndapinkide, ĩni ma taari e ǹ ma gba laakari yá? Ludavãnibori, ǹ yã wema sà. 
Akũ Ayuba wèa à pì: 
Pↄ́ken ma ũro fá! Deran mani wemmaa? Séde mà ↄ kú ma lɛ́a baasiro. 
Ma yã ò gɛ̃̀n do, mani ɛra mà o doro, ma ò gɛ̃̀n pla se, mani yã wemma doro. 
Akũ Dikiri ɛ̀ra à yã ò Ayubanɛ zàga'ĩa gũn à pì: 
Ǹ futɛ ǹ zɛ lán nɛ́gↄ̃gbɛ̃ bà, mani n lala yãi, ĩni wema. 
Ĩni lá kú ma yãkɛna a zɛ́alan yá? Ń ye ǹ ma taari e de n yã bo nnan yá? 
N gã̀sã gbãna kà ma pↄ́ ũ yá? N kòto ni fↄ̃ à gu yĩgã lán ma pↄ́ bà yá? 
Ǹ zↄ̃kↄ̃kɛ kũ kíkɛo da pↄ́kasa mananↄ ũ, ǹ gakuri kũ bɛ̀ɛrɛɛo da uta zↄ̃kↄ̃ ũ. 
Ǹ n pↄfɛ̃ kipaḿma, ǹ zĩdabirinↄ gwa kũ wɛ́ pãsĩo ǹ wé'i daḿma. 
Ǹ zĩdabirinↄ gwa kũ wɛ́ pãsĩo ǹ ń busa, ǹ ń dúgu zↄ̃ gu kũ ò kún, 
ǹ ń vĩ zĩtɛ ń pínki, ǹ ń yĩyĩ ǹ ń ká gyãwãnn, 
gbasa mà n sáabu kpá, kũ n zĩ̀i blè kũ n gã̀sã gbãnao yãi. 
Ǹ ũma gwa, kũ ma a kɛ̀ lákũ ma n kɛ nà. Àdi sɛ̃̀ ble lán zùu bàmɛ. 
A gbãna kú a wógbaaamɛ, a iko kú a gbɛrɛ báasiamɛ. 
A vlã porona lán sida lí bà, a gbáda tĩ de lán bà tãnaa bà. 
A wánↄ gbãna lán mↄ̀gotɛ̃ bà, a gbánↄ de lán mↄ̀ gòo bà. 
A zↄ̃kↄ̃ mɛ́ à de pↄ́ bɛ̃nɛ kũ ma kɛ̀nↄla pínki, a Kɛ̀ri ado mɛ́ ani a fↄ̃. 
Sĩ̀sĩnↄ musun àdi pↄ́ blen, gwen nↄ̀bↄsɛ̃ntɛnↄ dì fàai bon ń pínki. 
Àdi wútɛ lɛ̀'itɛ gbáru, àdigↄ̃ sↄtↄ vↄ̃n dã̀dãa gũn. 
Lɛ̀'itɛ uraa dì daala, swa sarɛ lubanↄ dì likai. 
Bee tó ísↄ̃ tɛn vĩvĩ, àdi bídi kɛro, tó Yoda ísↄ̃kɛna tɛni a lɛ́ pá, a laakarii dìgↄ̃ kpátɛnamɛ. 
Oni fↄ̃ ò a wɛ́ wíwi ò a kũ yá? Oni fↄ̃ ò ↄ̃ndↄ̃ kɛnɛ ò a yĩ fↄ̃ yá?