ZABURA.
3.
Lɛ̀ kũ Dauda dà gↄrↄ kũ à bàa lɛ̀ a nɛ́ Abusalomunɛ. Dikiri, ma wɛtɛrinↄn dimmɛ fá, gbɛ̃ kũ ò ibɛrɛɛ sɛ̀ kũmaonↄn dasi. 
Òtɛni ma yã o dasidasi, òtɛn pi Luda ni ma sura baro. 
Mↄkↄ̃n sↄ̃ Dikiri, ndì ↄ likamai sɛ̃gbako ũ, ma gakurimɛ n ũ, ndì tó ma mì gↄ̃ dana íla. 
Madì wiki lɛ́ Dikiria, àdi wema zaa a kúkia kpi musu. 
Madì wútɛ mà i o mà vu, zaakũ Dikirimɛ ma kũna ũ. 
Gbɛ̃nↄn dúbu kurinↄ tɛni ma wɛ kpa sĩnda pínkia, ama madì vĩna kɛńnɛro. 
Ǹ futɛ, Dikiri, ǹ ma sura ba, ma Luda, ǹ ma ibɛrɛnↄ sãn kɛkɛ, ǹ gbɛ̃ vãninↄ saka ɛ́'ɛ. 
Dikiri mɛ́ àdi gbɛ̃ sura ba. Ǹ arubarika da n gbɛ̃nↄgu.