ZABURA.
10.
Dikiri, bↄ́yãi ń zɛna zã̀zãa? À kɛ̀ dera ndì n zĩda utɛ warikɛgↄrↄaa? 
Gbɛ̃ vãni dì gbãnasaride wɛtɛ à dɛ zĩdabi gũn, àdi manafiki kɛnɛ à a kũ. 
Gbɛ̃ vãni dì a pↄ́nidɛnanↄ ĩa dã, àdi sãnkarade sáabu kpá àdi Dikiri tↄ́ yaka. 
Gbɛ̃ vãni zĩdabi mɛ́ à tò àdi Dikiri ki wɛtɛro, à Luda laasun vĩro. 
Yã kũ àdi kɛ pínki dì bonɛ manamɛ, àdi a zĩda kara, àdi n doka daro, àdi lɛ́zuki kɛ a ibɛrɛnↄa. 
Àdi pi áni kpágularo, ánigↄ̃ kú kũ pↄnnao warikɛnaa sari. 
Ɛ́kɛ kũ gbɛ̃kanaao kũ yã pãsĩo a lɛ́ pà, àlesi pãsĩ kũ yã vãnio mɛ́ àdigↄ̃ da a lɛ́n. 
Àdi natɛ taarisaridenɛ lakutu kpɛ de à le à a dɛ asiri gũn, àdi àleside kpákpa gukpado. 
Àdi natɛ gbɛ̃nↄnɛ asiri gũn lán músu bà, àdi natɛ lákpɛn de à le à gbãnasaride kũ. Tó à a kũ̀, àdi a gátɛ kũ a bàao. 
Gbɛ̃ kũ à a lè à kũ̀ dìgↄ̃ wutɛna sùum, gbãna mɛ́ à a nɛ̀. 
Gbɛ̃ vãni dì pi Luda dì yã tàasi káro, àdi ↄ kú a wɛ́amɛ àdi gu ero. 
Dikiri, ǹ futɛ ǹ su kũ n gbãnao, Luda, ǹgↄ̃ takasidenↄ tàasi ká. 
Luda, bↄ́yãin gbɛ̃ vãni dì dↄkɛ kũnwo lɛɛ? Àdi pi a swɛ̃̀ɛ gũn ĩni wari dↄáwaro. 
Bee kũ abireo ndì gbɛ̃nↄ yã'ũmmana e sãnsãn, ndì ń pↄsira yã da de ǹ le ǹ ↄ daḿma. Gbãnasaride dì a zĩda kpámma, tonɛ kũ à gwàri vĩro kpànyĩriimɛ n ũ. 
Ǹ gbɛ̃ vãninↄ kũ gbɛ̃ pãsĩnↄ gã̀sã ɛ́ńnɛ, ǹ ń yã vãni kũ òtɛn da ò dↄ̃ro ɛraḿma. 
Dikiri dìgↄ̃ kí ble gↄrↄ sĩnda pínki, a yãdarisarinↄ ni kakatɛ a bùsun. 
Dikiri dì takasidenↄ wɛ́kɛna sí, àdi ń gba swɛ̃̀ɛ, àdi sã kpá ń ↄ́ↄ dↄi. 
Àdi zɛ kũ tonɛ kũ à gwàri vĩronↄ kũ gbɛ̃ kũ òtɛn wɛ́ tãḿmanↄ, de bisãsiri kũ à de bùsutiti ũ sún tó swɛ̃̀ kɛ̃ gbɛ̃nↄgu doro yãi.