ZABURA.
17.
Dauda aduakɛnaa Dikiri, ǹ ma yãzɛde ma, ǹ sã kpá ma wikilɛnaai, ǹ ma wɛ́kɛna sí, zaakũ matɛn kɛ kũ manafikioro. 
N kĩnaan mani yã nna len, n wɛ́ tɛn yã kũ à zɛ́ vĩ e sãnsãn. 
N ma swɛ̃̀ɛ gwà, n wɛ́ tɛ́mai gwãani, n ma tàasii kà, ńdi yãke emaro, zaakũ ma zɛo kũ ma lɛ́ ni ma kari boro. 
Madì tɛ́ bisãsiri yãkɛnanↄiro, madì gbɛ̃ pãsĩnↄ turuba sɛ́ro. 
Ma kure n zɛ́n súsu, mádi pã n yãnɛro. 
Matɛn lɛ́ zunyĩ, zaakũ ĩni wema. Luda, ǹ sã kpá ma aduakɛnaai. 
Ǹ n gbɛ̃kɛ yãbonsarɛ kɛmɛnɛ, ǹ gbɛ̃ kũ ò nànyĩnↄ bo ń ibɛrɛnↄ ↄĩ. 
Ǹ laakari dↄma lán n wɛ́nɛ bà, ǹ ma sↄtↄ n orun. 
Ǹ ma sí gbɛ̃ pãsĩ kũ òdi wari dↄmanↄa, ma ibɛrɛ kũ ò likanamai pìnↄ. 
Òdi gbɛ̃ke wɛ́ gwaro, ń lɛ́ dì zĩda sɛna lei yã o. 
Ò pɛ̀tɛmai ò lìkamai, ò wɛ́ pìtima de ò le ò ma pãtɛ zĩtɛ. 
Ò ye ò ma kɛ yákiyaki lákũ músu nàdɛri dì kɛ nà, lán músu kũ à natɛna gukpado bà. 
Dikiri, ǹ futɛ ǹ dańlɛ ǹ ń nɛ, ǹ ma sí gbɛ̃ pãsĩnↄa kũ n fɛ̃nɛdao. 
Ǹ ma bo ń ↄĩ kũ n gbãnao. Ń baka kú andunia díkĩna gũn, ń aruzɛkɛ dìgↄ̃ dińyĩ, ń nɛ́nↄ dì kã, òdi pↄ́ kũ à dìńyĩnↄ kátɛ ń nɛ́nↄnɛ. 
Makũ sↄ̃, mani wɛ́ kɛ pla kũnwo ma nɛ̀sɛmana yãi, tó ma n e ma vugↄrↄa, abirekũ ni ma kã.