ZABURA.
19.
Dauda lɛ̀ɛ. Musu dì Luda gakuri bo gupuraa, sarapurapↄnↄ dì a ↄzĩ mↄńnɛ. 
Àdigↄ̃ yã o'ońnɛ lán gu dìgↄ̃ dↄ nà, àdi dↄ̃na kpáńnɛ gwãani kũ gwãanio. 
Àdi yã oro, a yã'ona buri ke kunlo, òdi a kĩni maro. 
A kòtoo dì da anduniala pínki, a yã'onaa dì gɛ́ ari zĩtɛ lɛ́a. Luda kpɛ́ bò ifãntɛ̃nɛ gwe, 
àdi bo kpɛ́n à futɛ lán nↄsɛrii bà, àdi futɛ táo kũ pↄnnao lán gↄ̃sa gbãna bà. 
Àdi futɛ ludambɛlɛa la, àdi bikũ à gɛ́ ari a lɛ́a dire, pↄ́ke dìgↄ̃ utɛna a puusuiro. 
Dikiri doka papana, àdi ń kunna kɛkɛ à kɛńnɛ dↄ. Dikiri yã náani vĩ, àdi lɛ́ da ↄ̃ndↄ̃saridenↄa. 
Dikiri dì ↄdↄki dↄńnɛ súsu, àdi ń pↄ kɛ nna. Dikiri yãditɛnanↄn gbãsĩ vĩro, àdi ń ãn wereńnɛ. 
Mìnatɛna Dikirinɛ zɛ́ pì wɛ́bona, onigↄ̃ tɛ́i gↄrↄ sĩnda pínki, Dikiri yãkpatɛkɛna yãpura vĩ, àdigↄ̃ mana swáswa. 
A mana de wurala, bee wura mana, a nna de zↄ́'ila, bee zↄ́ búsu. 
Abire musu ndì lɛ́ da makũ n zↄ̀bleriia, gbɛ̃ kũ à n yã kũnaa àree dìgↄ̃ zↄ̃kↄ̃. 
Dí mɛ́ ani fↄ̃ à yã kũ à zã̀anↄ dↄ̃ↄ? Ǹ sùru kɛ kũmao kũ ma taari kũ ò utɛnanↄ. 
Ǹsun tó makũ n zↄ̀bleri taari kɛnnɛ gbĩnigbĩniro, ǹsun tó durunnanↄ kí blemaro, manigↄ̃ kun swáswa taari zↄ̃kↄ̃ sari. 
Ǹ tó yã kũ àtɛn bo ma lɛ́n kángu kũ laasun kũ à kú ma swɛ̃̀ɛ gũnwo, Dikiri, ma gbɛ̀si, ma surabarii.