ZABURA.
21.
Dauda lɛ̀ɛ. Dikiri, kína tɛn pↄnna kɛ kũ n gbãnao, a pↄ nna manamana kũ n tò à zĩ̀i blè. 
N pↄ́ kũ a pↄ yeii kpàa, ńdi gí a wɛ́kɛna síiro. 
N daalɛ kũ arubarika zↄ̃kↄ̃ↄo, n wura fùraa kùnɛ. 
À wɛ̃̀ndii gbɛ̀kamma, akũ n kpàa, n tò àgↄ̃ kun ari gↄrↄ sĩnda pínki. 
A gakuri zↄ̃kↄ̃ kũ n tò à zĩ̀i blè, n bɛ̀ɛrɛ kũ zↄ̃kↄ̃kɛo kpàa. 
Ndìgↄ̃ arubarika daagu gↄrↄ sĩnda pínki, n kunna kãao tò a pↄ kɛ̀ nna. 
Zaakũ kína Dikiri náani kɛ̀, kunna Luda Musude gbɛ̃kɛn ani yĩgãro. 
N ↄ ni n ibɛrɛnↄ kũ ń pínki, ĩni n zãngurinↄ kũ kũ n ↄplao. 
Ĩni ń kɛ tãmatɛ yàka ũ n sugↄrↄa. Dikiri ni ń kakatɛ a pↄfɛ̃gↄrↄa, ani tó tɛ́ ń ble. 
Ĩni ń nɛ́nↄ dɛdɛ andunia gũn, ĩni ń burinↄ kɛ̃ bisãsirinↄa. 
Bee tó ò lɛ́ kpàkũsũnyĩ, ń pↄyeinayã ni zĩ kɛro. 
Ĩni kà dↄdↄ ń wɛ́a, ĩni tó ò kpɛ li. 
N gbãnakɛ gũn, Dikiri, ǹ n zĩda sɛ́ lei, óni lɛ̀ sí ò n zↄ̃kↄ̃kɛ sáabu kpá.