ZABURA.
34.
Lɛ̀ kũ Dauda dà gↄrↄ kũ à a zĩda dìtɛ ĩade ũ Abimɛlɛki arɛ, ari Abimɛlɛki pɛ̀a à tà. Manigↄ̃ Dikiri tↄ́ sɛ́ lei lakanaa sari, manigↄ̃ a tↄ́ kpá lákũ gu dìgↄ̃ dↄ nà. 
Manigↄ̃ ĩa dã Dikiri yã musu, takasidenↄ ni ma ò pↄnna kɛ. 
À zↄ̃kↄ̃kɛ dↄ̃ Dikirinɛ kũmao, ò a tↄ́ bo lɛɛlɛ. 
Ma Dikiri ki wɛ̀tɛ, akũ à wèma, à ma bo ma vĩnanↄ gũn. 
Gbɛ̃ kũ ń wɛ́ dↄinↄ ãn nigↄ̃ werena, wé'i ni ń kũ zikiro. 
Gbɛ̃ takaside dí Dikiri sìsi, akũ à wèa, à a bò a warinↄ gũn pínki. 
Dikiri Malaika dìgↄ̃ kú a vĩnakɛrinↄ sarɛ, àdi ń mì sí. 
À lɛ́ kɛ à gwa, áni dↄ̃ kũ Dikiri nna, arubarikaden gbɛ̃ kũ à nài ũ. 
Dikiri gbɛ̃nↄ, à vĩna kɛnɛ, pↄ́ke dì kĩa à vĩnakɛrinↄaro. 
Nà dì músunↄ dɛ, pↄ́ble dì kĩaḿma, ama pↄ́ mana ke dì kĩa Dikiri ki wɛtɛrinↄaro. 
Gbɛ̃nↄ, à mↄ́ à ma yã ma, mà vĩnakɛna Dikirinɛɛ dadaárɛ. 
Ákↄ̃nↄ kũ á ye á wɛ̃̀ndi gↄ̃ mana akũsↄ̃ á ye á kunna gↄ̃ nna, 
à á lɛ́ kũ kũ yãvãni'onaao, àsun tó ɛ́kɛ bo á lɛ́nlo. 
À kpɛ li yã vãninɛ à yã mana kɛ, à aafia zɛ́ wɛtɛ àgↄ̃ tɛ́i. 
Dikiri dìgↄ̃ wɛ́ tɛ́ gbɛ̃ mananↄi, àdi sã kpá ń ↄ́ↄdↄnaai. 
Dikiri dì kpɛ li yãvãnikɛrinↄnɛ, de ń yã sún dↄ gbɛ̃keguro yãi. 
Tó gbɛ̃ mananↄ lɛ́ zù Dikirii, àdi ma, àdi ń bo ń warinↄ gũn pínki. 
Dikiri kãni kũ gbɛ̃ kũ ń pↄ yàkanↄ, àdi kpá gbɛ̃ kũ ń ãn sisinanↄi. 
Wari dìgↄ̃ gbɛ̃ mana le gɛ̃̀n baaakↄ̃, ama Dikiri dì a bo a gũn pínki. 
Àdi a wánↄ dãkpã pínki, a ke dì ɛ́ro, bee mɛ̀n do. 
Kisira ni gbɛ̃ vãninↄ dɛdɛ, yã ni vutɛ gbɛ̃ mana ibɛrɛnↄa. 
Dikiri dì a zↄ̀blerinↄ mì sí, yã ni vutɛ gbɛ̃ kũ à naiaro.