ZABURA.
40.
Dauda lɛ̀ɛ. Ma wɛ́ dↄ̀ Dikirii manamana, akũ à arɛ dↄ̀ma à ma ↄ́ↄdↄnaa mà. 
À ma bo tↄ̃̀nↄwɛɛɛ gũn, à ma bo fokon. À ma gbá pɛ̀tɛ gbɛ̀si musu, à ma zɛ gwe gíngin. 
À lɛ̀ dufu dàmɛnɛ ma lɛ́n ó Luda sáabukpana pↄ́ ũ. Gbɛ̃nↄ ni e dasi, vĩna ni ń kũ, ò Dikiri náani kɛ. 
Arubarikaden gbɛ̃ kũ à Dikiri náani vĩ ũ, akũsↄ̃ àdi arɛ dↄ zĩdabirinↄ kũ tãnagbagbarinↄaro. 
Dikiri ma Luda, n yãbonsarɛkɛnanↄn dasi, oni fↄ̃ ò yã kũ ntɛn pɛ́awɛrɛ dↄdↄro. Tó matɛn babannɛ, à lɛ́ vĩro, mani fↄ̃ mà o pínkiro. 
Ń ye sa'opↄ ke gbairo, akũ n ma gba sã mà yã mao. Ńdi sa'opↄ kũ òdi ká tɛ́n à tɛ́ kũ ke durunna kútɛkɛbↄ gbɛkaro. 
Akũ ma pì: Makũmɛ la, ma su lákũ à kɛ̃na takadan ma yã musu nà. 
Má ye n pↄyenyĩna kɛmɛ, ma Luda, n doka kú ma swɛ̃̀ɛ gũn. 
Mani yãzɛde baaru kpá pari kↄ̃kakaranaa gũn, mani ma lɛ́ nakↄ̃aro, lákũ ń dↄ̃ nà Dikiri. 
Mádi n yãzɛdekɛ utɛńnɛro, ma n náani kũ n surabanaao yã ò. Mádi gí n yenyĩ kũ n yãpurao oi pari kↄ̃kakaranaa gũnlo. 
Dikiri, ǹsun gí ma wɛ̃nda gwairo, n yenyĩ kũ n yãpurao gↄ̃ ma dãkpã. 
Zaakũ yã vãni kũ à likanamai lɛ́ vĩro, ma taarinↄ dàmala, matɛn gu ero, à dasi de ma mìkãla, swɛ̃̀ɛ kɛ̃̀magu. 
Dikiri, ǹ sùru kɛ ǹ ma sura ba, Dikiri, ǹ kɛ likalika ǹ mↄ́ ǹ kpámai. 
Wé'i gbɛ̃ kũ òtɛn wɛtɛ ò ma dɛnↄ kũ, ò ń mì pɛ́tɛ. Gbɛ̃ kũ ò ye mà kisira enↄ kpɛ li, ń ãn gↄ̃ sisina. 
Gbɛ̃ kũ òdi pimɛnɛ, taarɛ, taarɛnↄ, wé'i ń kũ ò gↄ̃ gìri. 
Gbɛ̃ kũ òtɛni n ki wɛtɛnↄ, ǹ tò ń pↄ kɛmma nna ò yáa dↄ. Gbɛ̃ kũ ò ye n surabanainↄ gↄ̃ pi Dikiri zↄ̃kↄ̃. 
Takaside wɛ̃ndademɛ ma ũ, ǹ laasun lɛ́ ma yãa, Dikiri. Mↄkↄ̃mmɛ ma kpanyĩri ũ kũ ma mìsiriio, ma Luda, ǹsun gì kɛro.