ZABURA.
44.
Kora burinↄ lɛ̀ɛ. Luda, yã kũ n kɛ̀ zaa gìkɛna ó dizinↄ gↄrↄa, ò òwɛrɛ ó sã mà. 
N ↄ sↄ̃̀ burinↄi n wari dↄ̀ḿma, n ó dizinↄ kàtɛ ń gbɛ̀n, n ń kara ò dàgula. 
Adi kɛ ń fɛ̃nɛda mɛ́ à ń ká bùsu díaro, ń gã̀sã gbãnan ò zĩ̀i blèoro. N zĩda gã̀sã gbãna mɛ́ à tò, n arɛ dↄ̀ḿma kũ ń yeńyĩ yãi. 
Mↄkↄ̃mmɛ ma Kína ũ ma Luda, ndì tó Yakubu burinↄ zĩ̀ ble. 
N gãin odì ↄ sↄ̃ ó ibɛrɛnↄi, kũ n tↄ́on odì gbá pɛ́tɛpɛtɛ ó zãngurinↄa. 
Adi kɛ ma sá náanikɛnanlo, adi kɛ ma fɛ̃nɛda mɛ́ àdi ma boro. 
Zaakũ mↄkↄ̃n mɛ́ ndì ó sí ó ibɛrɛnↄa, ndì wé'i da ó zãngurinↄa. 
Luda, odìgↄ̃ n sáabu kpá gↄrↄ sĩnda pínki, odìgↄ̃ n tↄ́ kpá lakanaa sari. 
Bee kũ abireo n giwái n tò wé'i ó kũ, ndì bo kũ ó zĩ̀karinↄ doro. 
N tò o boru kpɛ ó ibɛrɛnↄnɛ, n tò ó zãngurinↄ ó pↄ́nↄ nàkↄ̃a. 
N ń gbá zɛ́ ò ó dɛdɛ lán sãnↄ bà, n ó fãkↄ̃a burinↄ tɛ́. 
N n gbɛ̃nↄ yìa araga, ńdi àre le a gũnlo. 
N tò ó gbɛ̃dakenↄ ó sↄ̃sↄ̃, gbɛ̃ kũ ò kú ó sarɛnↄ ó lalandii kɛ̀. 
N tò o gↄ̃ baaru pↄ́ ũ burinↄnɛ, gbɛ̃nↄ dì ń mì yĩgãwɛrɛ. 
Madìgↄ̃ kú kũ wé'io gↄrↄ sĩnda pínki, ma gasuu gↄ̃̀ kpá ma wɛ́i 
ma lalandikɛrinↄ kũ ma sↄ̃̀sↄ̃rinↄ yãi kũ ma ibɛrɛ kũ ò ye ò fĩna bomanↄ yão. 
Abirekũ ó lé pínki, bee kũ n yã dí sãóguro, ódi n bàka kunna kũoo yã gbororo. 
Ó laasun dí kɛ̃mmaro, ódi kɛ̃ n zɛ́aro. 
N ó kɛ́ dúgudugu, n ó bùsu kɛ̀ gbɛ̃gbonnↄ kureki ũ, n gusira níkiniki dàóla. 
Tó ó Dikiri tↄ́ sã̀ógu yã, ke tó ó wɛ́ dↄ̀ buri zĩ̀tↄnↄ tãnanↄi, 
Luda ni gí ei yá? Zaakũ àkũ mɛ́ à ó nɛ̀sɛgũnyãnↄ dↄ̃ pínki. 
N yãi ó kú ga lɛ́i zaa kↄnkↄ ari ↄkↄsi, òdi ó ditɛ lán sã kũ oni ń kùtu kpánↄ bà. 
Ǹ vu Dikiri! À kɛ̀ dera ntɛn i oo? Ǹ futɛ! Ǹsun gíwái gↄrↄ sĩnda pínkiro. 
À kɛ̀ dera n kↄ̀kↄtↄↄ dↄ̀wɛrɛɛ? Ó wɛ̃ndakɛ kũ ó wɛ́tãmmanaao sã̀ngun yá? 
O gↄ̃ yĩna lukutɛ̃n, o gↄ̃ wutɛna zĩtɛ. 
Ǹ futɛ ǹ kpáwái, ǹ mↄ́ ǹ ó bo n yenyĩ yãi.