ZABURA.
45.
Yenyĩ lɛ̀ kũ Kora burinↄ dà. Yã nna tɛn pípi ma swɛ̃̀ɛ gũn, lákũ matɛn lɛ̀ díkĩna da kínanɛ nà. Ma lɛ́ nna lán takadakɛ̃ri mana takadakɛ̃bↄↄ bà. 
N manakɛ de gbɛ̃ sĩnda pínkila, n lɛ́gbɛɛ dìgↄ̃ nna, arubarika kũ Luda dàngu lakana vĩro. 
Mↄkↄ̃n zĩ̀kari pãsĩ, ǹ n fɛ̃nɛda sɛ́ ǹ loko n kíkɛgakuri sèeda ũ. 
Ǹ di sↄ̃a ǹ gɛ́ zĩ̀ ble n gakurikɛ gũn yãpura kũ nɛ̀sɛdoo kũ yãzɛdeo yãi, ǹ yã náasidenↄ kɛ kũ n ↄpla gbãnao. 
Kí, n kànↄ lɛ́ sↄ̃ntɛ, àdi gɛ̃ à n ibɛrɛnↄ swɛ̃̀ zↄ̃, burinↄ dì lɛ́tɛ n gbá sarɛ. 
Luda, ĩnigↄ̃ vutɛna kpatan gↄrↄ sĩnda pínki, ĩnigↄ̃ n kíkɛgo kũna yãzɛde ũ. 
Ń ye yãmanakɛnaai, n zã a yãvãnikɛnagu. À yã mɛ́ à tò Luda, n Luda, n ka kín, à pↄnna pìsimma de n gbɛ̃nↄla. 
Lí'ↄ gbĩ nnanna pìsi n pↄ́kasanↄa, mↄrↄ'ũ dì n pↄ kɛ nna n kpɛ́ kũ ò kɛ̀kɛ kũ wisa sakaao gũn. 
Kína nɛ́nↄgbɛ̃nↄn kú n nↄ yenyĩdenↄ tɛ́, n nↄ dufu kú n ↄplai, à Ofi bùsu wurapↄnↄ dana. 
Nɛ́nↄkpare, ǹ sã kpá ǹ ma! N de bɛ kũ n gbɛ̃nↄ yã sún donnɛ arɛro. 
N nↄmanakɛ tɛn kína mɛ̀ɛ luka, ǹ mì natɛnɛ, zaakũ n dikirimɛ a ũ. 
Tayadenↄ ni su ò gba dannɛ, aruzɛkɛdenↄ ni n wɛ́ wɛtɛ. 
Kína nɛ́nↄkpare vutɛna kpɛ́nɛ gũn kũ gakurio, ò ↄzĩ kɛ̀ a pↄ́kasanↄa kũ wura bàao. 
Òtɛn su kãao kínanɛ kũ a pↄ́kasa wãnzãndenↄo dana. Nɛ́nↄkpare zɛnnɛrinↄ tɛ́i, òtɛn su kãao a kĩnaa. 
Òtɛn gɛ̃ kũńwo kínabɛa, òtɛn pↄnna kɛ kũ ayuwiikɛnaao. 
N nɛ́gↄ̃gbɛ̃nↄ ni gↄ̃ n denↄ gɛ̃nɛ ũ, ĩni ń ditɛditɛ kínanↄ ũ andunia gũn pínki. 
Mani tó n tↄ́ gↄ̃ dↄ gbɛ̃nↄgu lakanaa sari, burinↄ nigↄ̃ n sáabu kpá gↄrↄ sĩnda pínki.