ZABURA.
51.
Lɛ̀ kũ Dauda dà gↄrↄ kũ annabi Natã gɛ̀ɛ a kĩnaa a zinakɛna kũ Basɛbao gbɛra Luda, ǹ ma wɛ̃nda gwa n yenyĩ gũn, ǹ ma taarinↄ gogo n mana zↄ̃kↄ̃ yãi. 
Ǹ ma durunna kɛ̃ma mà gↄ̃ swáswa, ǹ ma durunna kɛ̃ma míↄmiↄ. 
Má a taarinↄ dↄ̃ sà, ma durunna dìgↄ̃ sãmaguro. 
Mↄkↄ̃mmɛ ma durunna kɛ̀nnɛ, ma yã kũ ń yeiro kɛ̀. Tó n yã ò, n yã nigↄ̃ zɛ́ vĩ, tó n yãkpatɛ kɛ̀ kũmao, n yã nigↄ̃ nna. 
Zaa ma da nɛ̀sɛn má vãni, má durunna vĩ zaa ma ina gↄrↄmɛ. 
Nɛ̀sɛmana mɛ́ àdi kángu, ǹ ↄ̃ndↄ̃ damɛnɛ ma swɛ̃̀ɛ gũn. 
Ǹ ma zú o kũ sakoo mà pu swáswa, ǹ ma nɛ̀sɛ pípimɛnɛ mà gↄ̃ púu táitai. 
Ǹ tó mà pↄnna kɛ kũ yáadↄnaao, ǹ tó ma wá kũ n bùsanↄ were. 
Ǹsun ma durunnanↄ yã daro, ǹ ma yã vãninↄ bo ǹ zukũna pínki. 
Luda, ǹ nɛ̀sɛpura damɛnɛ, ǹ ɛra ǹ tó ma laakari gↄ̃ kpatɛna. 
Ǹsun ma zukũnaro, ǹsun n Nini símaro. 
Ǹ ɛra ǹ tó ma pↄ kɛ nna kũ n ma sura bà yãi. Ǹ ma nini gba màgↄ̃ n yã ma, 
gbasa mà n yã dada yãvãnikɛrinↄnɛ, durunnakɛrinↄ ni ɛra ò arɛ dↄmma. 
Ǹ ma bo gbɛ̃dɛna yãn, Luda, Luda ma surabarii, mani lɛ̀ sí n yãkɛna a zɛ́a musu. 
Dikiri, ǹ ma gba lɛ́ mà n sáabu kpá. 
Sa'onaa dì kɛnnɛ nnaro, tó lɛnlo de ma ò. Sa'opↄ kũ òdi ká tɛ́n à tɛ́ kũ dì kánguro. 
Sa kũ matɛn ommamɛ ma nɛ̀sɛyĩda ũ, ndì wɛ̃ndade sùrude gya boro. 
Luda, ǹ arubarika da Zaiↄ̃gu n pↄyeina mana gũn, ǹ Yurusalɛmu bĩni gba gbãna, 
gbasa sa'ona a zɛ́a ni kángu kũ sa'opↄ kũ òdi ká tɛ́n à tɛ́ kũo, oni sa o kũ zùsanɛnↄ n gbagbakia.