ZABURA.
59.
Lɛ̀ kũ Dauda dà gↄrↄ kũ Solu gbɛ̃nↄ zĩ̀ ò a dãdã a bɛa ò a dɛ. Ma Luda, ǹ ma sí ma ibɛrɛnↄa, ǹ ma bo gbɛ̃ kũ ò fùtɛmainↄ ↄĩ. 
Ǹ ma sí yãvãnikɛrinↄa, ǹ ma bo gbɛ̃dɛrinↄ ↄĩ. 
Ǹ gwa, òtɛni ma kpákpa, gbɛ̃ pãsĩnↄ tɛn fìti kɛ kũmao. Dikiri, mádi taari ke durunna kɛńnɛro, 
mádi zãńnɛ yãkearo, akũ ò kú kũ soruo ò nakarama. Ǹ ma wɛ̃nda gwa ǹ futɛ ǹ mↄ́ ǹ kpámai! 
Mↄkↄ̃n Dikiri Luda Zĩ̀karide, Isarailanↄ Luda, ǹ futɛ ǹ wɛ́ tã buri kũ̀nↄa ń pínki. Ǹsun bonkpɛde vãni kũ̀nↄ wɛ̃nda gwaro. 
Òdi ɛra ò su ↄkↄsi dↄ, òdi likara zↄ̃ wɛ̃tɛn, òdi hũ̀u kɛma lán gbɛ̃nↄ bà. 
Ǹ gwa, ń lɛ́'i tɛn tↄ, fɛ̃nɛ kpá ń lɛ́n, òdi pi gbɛ̃ke tɛni ń maro. 
Mↄkↄ̃n sↄ̃ Dikiri, ndì ń yáa dↄ, ndì buri pìnↄ lalandi kɛ ń pínki. 
Luda ma gbãna, ma wɛ́ dↄnyĩ, mↄkↄ̃mmɛ ma aafialeki ũ. 
Luda ni domɛnɛ arɛ a gbɛ̃kɛ gũn, ani tó mà yↄ̃̀gↄ̃ kɛ ma zãngurinↄa. 
Dikiri ó sɛ̃gbako, ǹsun ń dɛdɛro, de ń yã sún sã ma gbɛ̃nↄguro yãi. Ǹ tó ò likara zↄ̃ ǹ ń kↄ́tɛ kũ n gbãnao. 
Yã kũ àdi bo ń lɛ́n bi durunna yãmɛ. Ǹ tó ń karambaanikɛna ń kũ, zaakũ òdi ɛ́kɛ to òdi gbɛ̃ ká. 
Ǹ ń kakatɛ kũ pↄfɛ̃o, ǹ ń dúgu zↄ̃, òsungↄ̃ kun doro, gbasa ògↄ̃ dↄ̃ ari andunia lɛ́a kũ Luda tɛn kí ble Yakubu burinↄa. 
Òdi ɛra ò su ↄkↄsi dↄ, òdi likara zↄ̃ wɛ̃tɛ gũn, òdi hũ̀u kɛ lán gbɛ̃nↄ bà. 
Òdi likara ògↄ̃ pↄ́ble wɛtɛ, tó odi kãro, òdi wiki lɛ́. 
Makũ sↄ̃, mani lɛ̀ sí n gbãna yã musu, mà ayuwii kɛ kↄnkↄ n gbɛ̃kɛ yãi, zaakũ mↄkↄ̃mmɛ ma aafialeki ũ, mↄkↄ̃mmɛ ma utɛki ũ warikɛgↄrↄa. 
Luda ma gbãna, mani n táaki lɛ́, zaakũ mↄkↄ̃mmɛ ma aafialeki ũ, Luda kũ àdi gbɛ̃kɛ kɛmɛnɛ.