ZABURA.
62.
Dauda lɛ̀ɛ. Luda ado mɛ́ à tò ma laakari kpátɛna, àkũ mɛ́ àdi ma sura ba. 
Àkũmɛ ma gbɛ̀si ũ ma surabari ũ, madì gbãna lea, mani yĩgã zikiro. 
Gɛ̃̀n ũgban ánigↄ̃ futɛ gbɛ̃aa? Áni a nɛ lán gbĩ̀ kũ à ɛ̀ à kpán ke kara zĩ bàn yá? 
A gona a tía lɛ́n átɛn kpákũsũ, ɛ́kɛtona mɛ́ àdi kɛárɛ nna. Adì sa mana o gbɛ̃nɛ kũ lɛ́omɛ, akũ adì ń ká á swɛ̃̀ɛ gũn. 
Luda ado mɛ́ à tò ma laakari kpátɛna, zaakũ àkũmɛ ma wɛ́ dↄi. 
Àkũmɛ ma gbɛ̀si ũ ma surabari ũ, madì gbãna lea, mani yĩgã zikiro. 
Ma aafia kũ ma bɛ̀ɛrɛɛo dì bo a kĩnaamɛ, àkũmɛ ma gbɛ̀si gbãna ũ, ma utɛki ũ. 
Gbɛ̃nↄ, àgↄ̃ a náani vĩ gↄrↄ sĩnda pínki, à á swɛ̃̀ wɛ̃nɛ, àkũmɛ ó utɛki ũ. 
Talakanↄn de lán lɛ́'ĩa bàmɛ, gbãnadenↄn kú pↄ́ke lɛ́iro. Tó ò ń yↄ̃ kilooa, ń pínki nigↄ̃ de fáuunle. 
Àsun gbɛ̃ble'ↄgↄ náani kɛro, àsun ĩa dã kũ kpãni pↄ́oro. Tó á aruzɛkɛ tɛn kↄ̃, àsun tó à á swɛ̃̀ blero. 
Yã mɛ̀n don Luda ò, yã mɛ̀n pla dínↄn ma mà: Luda, mↄkↄ̃n mɛ́ ń gbãna vĩ, 
Dikiri, mↄkↄ̃n mɛ́ ń gbɛ̃kɛ vĩ, akũ ndì fĩna bo baadinɛ a yãkɛnaaa.