ZABURA.
63.
Lɛ̀ kũ Dauda dà gↄrↄ kũ à kú Yuda gbárannan. Luda, ma Ludamɛ n ũ, matɛni n arɛ wɛtɛ, ma nini yenyĩ, matɛni lukanyĩ lán zĩtɛ kori kũ à ye íi bà. 
Ma n e n kúkia, ma wɛ́ sì n gbãna kũ n gakuriolɛ. 
Zaakũ n gbɛ̃kɛ manamɛnɛ de wɛ̃̀ndila, n sáabukpana nigↄ̃ da ma lɛ́n. 
Manigↄ̃ n tↄ́ kpá ari ma wɛ̃̀ndi lɛ́n, mani ↄ sɛ́ musu mà n sísi. 
Ma nɛ̀sɛ ni kã lákũ òdi pↄ́ nna ble ò kã nà, n táakilɛna nigↄ̃ da ma lɛ́n kũ ayuwiikɛnaao. 
N yã dì dↄmagu ma wútɛkia, madì laasun lɛ́mma gwãani. 
Ma sↄtↄna n orun, matɛn lɛ̀ sí, zaakũ mↄkↄ̃mmɛ ma kpanyĩri ũ. 
Ma nini namma, ń ma kũna n ↄplan. 
Gbɛ̃ kũ òtɛni ma wɛnↄ ni kakatɛ, ò gɛ̃ zĩtɛ. 
Luda ni tó ò ń dɛdɛ kũ fɛ̃nɛdaomɛ, ò gↄ̃ gbɛ̃gbonnↄ pↄ́ble ũ. 
Kína sↄ̃ ani pↄnna kɛ kũ Ludao. Gbɛ̃ kũ òdi la da kũ Ludaonↄ ni a sáabu kpá, ɛ́kɛdenↄ sↄ̃, ń lɛ́ nigↄ̃ nakↄ̃ana.