ZABURA. 64. Dauda lɛ̀ɛ. Luda, ǹ ma ndana ma, ǹ ma bo ma ibɛrɛ kũ òtɛni vĩna damainↄ ↄĩ. Ǹ ma utɛ gbɛ̃ vãni kũ ò lɛ́ kpàkũsũmainↄnɛ, yãvãnikɛri zukade pìnↄ. Òdi ń lɛ́ kɛkɛ lán fɛ̃nɛda bà, yã pãsĩnↄ dì bo ń lɛ́n lán kà sɛwɛde bà. Òdi taarisaride dãdã ò a pá, òdi a pá kãnto, vĩna dì ń kũro. Òdi tɛ́ kákↄ̃gu ń vãnikɛnaa gũn, òdi bàkpakpannɛna gusarɛ yã gↄ̃gↄ̃ òdi pi: Gbɛ̃ke ni ó ero. Òdi vãnikɛna yã gↄ̃gↄ̃ ò pi, yã kũ o a lɛ́ kpàkũsũ papana. Bisãsiri nɛ̀sɛgũnyãnↄ asiri zↄ̃kↄ̃. Ama Luda ni ń pá kũ kàao, ani ń kĩnna kãnto. Ani tó yã kũ ò ò wí ń musu, gbɛ̃ kũ à ń é pínki nigↄ̃ mì kɛ dékũdekũ ò pi taarɛ. Vĩna ni gbɛ̃ sĩnda pínki kũ, oni Luda yãkɛnanↄ baba, onigↄ̃ yã kũ à kɛ̀nↄ laasun lɛ́. Gbɛ̃ mananↄ, àgↄ̃ pↄnna kɛ Dikiri gũn ò nai, nɛ̀sɛpuradenↄ, àgↄ̃ a táaki lɛ́ ń pínki.